#حور
كعدت من النوم على صوت صياح امي تكلي اليوم احد والساعة بال٧ ونص كمت من النوم فازة يالله شراح الحك لمن فتحت الموبايل لكيت الساعة بال٦ ونص يالله شوكت تبطل امي هذا طبعها تأخر الوقت ساعة وتكعدني فازة طبعا كمت من النوم ورحت للحمام سويت روتيني الطبيعي غسلت وجهي فرشت اسناني وهسة لازم البس ملابسي طبعا محظرة ملابسي من الليل فبس البس حطيت مكياج شوية وسويت شعري وهسة نزلت جوة شفت ماما
حور:صباح الخير يا وجه الخير
حنان:صباح النور يلة تعالي اكلي دتروحين بساع
حور:شبيج مستعجلة اكثر مني هي شغلة ثانيتين اوصل للكلية
حنان:ديلة ياعيني استعجلي مو حتى تودين اخوج وياج للمدرسة
حور:اي يا امي كوليها من البداية لخاطر مصلحتج تردين اودي حمودي
حنان:انجبي ادبسز والله مشايفة هيج بنية اني اكو وحدة هيج تحجي وية امها
حور:اي اني المهم بابا شوكت ينزل من الواجب
حنان:ان شاء الله اليوم البارحة خابرته
حور:الحمدلله والله شكد مشتاقتله
حنان:اي والله صار ٣ اشهر مشايفيه كله يادوب نسمع صوته بالموبايل
حور:يلة ماما حطلع يلة كوم حمودي
احمد:اي هسة ثواني البس الحذاء
حور:صارلك سنة معرفت تلبس الحذاء
احمد:اهووو هسة واذا تأخرت شوية شو انت صارلج ساعة تخرطين
حور:انجب ادبسز والله اكول البابا عليك
احمد:ديلة اي امشي
طلعت برة ركبت سيارة بابا الجمسي وصلت احمد لمدرسته ورحت للكلية وممستعدة ابد للدوام المتعب ويوم الأحد يكربون علينا كرب تطلع من محاظرة تطب المحاظرة صبحت بوجه مروة تشتغل بامن الكلية اكلتني بالسلام عبالك صار سنة مشايفتني وهي كلها صار يومين من ملتقين بس هي هذا طبعها وتعودت عليه شفت صديقاتي المقربات مريم وهدى سلمت عليهم وهيج يوم طبيعي
اكيد كلكم تسائلتوا علية منو اني شنو عمري بأي كلية هسة اجة وكت التعارف اني حور عمري 24 سنة مرحلة سادسة طب بغداد شكلي طبيعي وعادي مثل أي بنية شعري لونه اسود وشوية بشرتي بيضة على سمار وعيوني هي الشي الوحيد ألمميز لونها رصاصي ووحدة فاتحة شوية ووحدة طوخ فاني البس عدسات بعين وحدة واخلي بس الطوخ تبين ومحد يدري عندي اختلاف بلون عيوني بس عائلتي وماما جانت دائما ترزلني انة تعودت البس بصف الرابع اعدادي لان هواية تعرضت التنمر بسببها ماما ربة بيت على كد حالها خلصت كلية وكعدت بالبيت حالها حال اي طالب بالعراق يتعب ويكمل تالي ماكو شي وبابا حبيبي فديته ضابط اسمه ياسر وعندي خوات ثنين اكبر مني سارة ومُنى ثنينهن متزوجات سارة عمرها 28 عدها ولد واحد اسمه علي يجنن المدلل مالتنا عمره سنتين ومنى عمرها 26 متزوجة صارلها ٣ اشهر وحامل جديد وعندي اخ واحد واحد اسمه احمد عمره 17 سنة حمودي هذا ضلعي وصديقي اندمج وياه اكثر من خواتي دائما نلعب بلي سوة ونلعب طوبة سوة وهيج احنة ثنينة الباقين يم بابا وماما وهم مدللينا
YOU ARE READING
حوريتي//my nymph
Romanceقصة تتحدث عن فتاة وحياتها اليومية وكيف تعرفت على زوجها وكيف حبوا بعض القصة باللهجة العراقية ادري وصفي مو حلو بس القصة حلوة يعني ادخل وجرب تقراها يجوز تعجبك ويجوز لا كتبت لان حاليا مدالكة ولا قصة تشبه الأفكار اللي ببالي
