لعبة الزمن

لعبة الزمن 25

#لعبة_الزمن
الحلقة 25

في الصبح اليوم التالي:

ناضت نجاح ورندة فطروا هما والصغار
رندة:أمتى بتمشوا
أحمد:والله ياعمتي حسيتك متحمسة أكثر من أمي
محمد:ايه صح من الصبح نسمع فيها تسأل عليه
رندة:خزي عليكم الحق فيا انا لبنمشي معاكم
الجميع:😂😂😂
نجاح: لا بنمشوا توا
رندة: جاهزة والله فرحانة لبنطلع
نجاح: توا حرام معقولة محمد مايطلعش فيك بكل
رندة: بالله اسكتي تو زيك أنتي زي طلعتي مع محمد لودتين ونروح
نجاح: بتلبسي خمار راه
رندة: تو نطلبوه من نورة عندها مافيش مشكلة

نجاح: هيا تعالي معاي خلى نحطوا الحاجات في السيارة
ورندة: مشت لنورة بعد سلام وهدرزة ونشدة تدكرت على شن جاية ... بالله نورة كان عندك خمار اعطيهالي
نورة: باهي تو نجيبهالك غير كان خشيتي طاسة قهوة
رندة: بعد هالهدرزة هذي كلها من بكري وتقوللها مستعجلة وهي ليها من بكري تهدرز
نورة: ضحكت ومشت جابتهلها وين عندك عرس
رندة: لا مش عرس بنطلع مع نجاح
نورة: باهي كويس
رندة: هيا مع السلامة قريب نلقاهم ماشيين عليه من بكري وأنا نهدرز
نورة: مع السلامة سلميلي عليهم
رندة: تعالي وسلمي بروحك وطلعت ومشت لحوش نجاح: القتهم يستنوا فيها ... قصدكم بتمشوا كلكم
نجاح: لا بيقعد معاهم أحمد بنمشوا احني ومحمد
رندة: عامين ثلاثة وخلي محمد هو يسوق
نجاح: لالا خليه هكي شن بيدير بيها السيارة غير بيتبعلي مردس
رندة: لا معاك وأنتي أمه مش حيتبع حد غير كان الأخلاق وخوه
نجاح: شن عرفك
رندة: سمعتك امبارح لما تنصحي فيه مع على خوته إنه هو قدوتهم وفعلا ليديره لكبير يمشوا عليه الثانيين قاعدة جديدة نضافت لقاموسي
نجاح: ههههههه باهي ياحنة

ركبوا للسيارة ومشوا
رندة: افتحيلنا غناية حتى طشة
نجاح: لا
محمد: أمي مانعتنا قالت الأغاني للمفرخ مش للنساوين
رندة: شبحت لا أمك عندها حق عيب شن منظرنا ماشيات نساوين بخماراتهم فاتحات أغاني عيب عليك يامحمد افتحيلنا قرآن
نجاح: ههههههه ولت شيخة
رندة: ايه ولدك ماعاد تخليه يقولك ولعي أغاني حتى طشة عيب وحرام
محمد: عمتي مش أنتي لقلتي افتحيلنا غناية حتى طشة
رندة :عيب عليك يامحمد أنا مانسمعش في الأغاني ابدا
نجاح: تضحك عليهم وخلاص
رندة: تلقي جوها حلو وتمشي مع أي حد مع الصغار تبصر وتلعب ومع الكبار تهدرز ومع اللفاعي يأمي ارحميني

وصلوا للمحل ونزل محمد ورفع الحلويات وسلمهم لصاحب المحل
ص.م: تستنى صاحبهم يجيهم تستلم منه
محمد: لا والله أنا مستعجل
ص.م: تمام ناخدهم منك كأنك جايبهم للمحل مدله فلوس حقهم
محمد: عطاها مجموعة المجموعة هذي للمحل
ص.م: مانحسابش تلحقوا غير للطلبية
محمد: كيف بنخلوا المحل فاضي
ص.م: ابتسم تمام هذا حقهم
محمد: خدي لفلوس وطلع وهو سعيد وركب في السيارة ومد لفلوس لأمه
نجاح: شن بنديروا زعما
رندة: أنا جاي خاطري في مشوي دجاج
محمد: من يسأل فيك أنتي
رندة: خزي عليه يامحمد هكي تقول لعمتك الحلوة
نجاح: والله فكرة خلى نطلعوا من جو الروتين بم انه رانية جاية ونورة
رندة: ايه صح بنديروا مشاوي زي أيام قبل
نجاح: ان شاء الله