سلف و دين بقلم /لولو_محمد

الحلقه ١٧

(((((((((( سلف و دين )))))))))))
#لولو_محمد
الحلقه ١٧
فى المطعم عند على
انور / على على
على / ايوه يا حج
انور / عملت ايه فى موضوع السفر
على / والله ما عملتش حاجه انشغلت
انور / كويس تعال
انور يقوم و يدخل العماره و على وراه و يدخلوا المكتب و انور يقفل الباب
على / فى ايه يا حج
انور / اقعد يابنى عاوزك فى كلمتين
......................
على يقعد
انور / بص يا على انت عارف ان ربنا ما اكرمنيش بعيال و انا مهما عشت ايامى معدوده
على / ليه بس الكلام الوحش ده يا حج ما تقولش كدا
انور / انا مليش اخوات و قرايبى فى البلد عقارب ما شوفتش منهم فى حياتى غير الاذى هما السبب انى اسيب بلدى و اجى مصر حتى مراتى ما سلمتش من اذاهم و بصراحه مش ضامن يعملوا فيها ايه بعد ما اموت
على / ما تقلقش يا حج ربك ما بينساش حد
انور / بص يا على انت راجل جدع و ابن حلال و انا اللى مربيك من سنين
على / و جميلك فى رقبتى ليوم الدين
انور / انا بعتلك كل اللى حلتى
انور يطلع ملف و يديه لعلى
على / ايه ده يا حج
انور / العقود بيع وشرا كل حاجه حلتى كتبتها باسمك بس عاوزك تعاهدنى
على / من غير ما اعاهدك انا مش هقبل الحاجات دى انا ما استحقهاش وربنا يديك طوله العمر و تعيش و تاخد بالك من حاجتك
انور / ما انا عشت يا على عشت و خدت بالى من حاجتى و كبرتها لحد ما بقت زى ما انت شايف و جه الوقت اللى اخد اجازه بقى و ارتاح
على / و ماله ارتاح و انا هبقى اجيب الحسابات و اجى اراجعها معاك كل فتره
انور يبتسم
انور / انا كدا ارتحت يا على عشان اطمنت ان العمال اللى فى المحل مش هيتشردوا من بعدى و البيوت اللى مفتوحه بسببى مش هتتقفل ارتحت لانى عارف انى مش هتبهدل فى اخر ايامى لانا و لا مراتى
على / يا حج بلاش الكلام ده و بعدين
انور يمسك ايد على
انور / انا خدت قرارى و بلغتك بيه عشان ده اخر يوم ليا فى المحل
على / انا مش هقدر على الامانه دى يا حج
انور / لو ما كنتش قدها ما كنتش شيلتهالك
على / يا حج ابوس ايدك بلاش انا
انور / لو مش انت مش هيكون حد تانى اصلا
على / يا حج ارجوك اسمعنى
انور / سمعتك و ردى عليك ان لما ابوك يقول كلمه ما تكسرهالوش يا على يلا انا ماشى بقى هاخد المدام و نسافر كام يوم نتفسح و نعيش اللى ما عشناهوش هههههههههههههههههههه
على مصدوم
انور / سلام يا على
على يبصله و ساكت انور يخبطه على كتفه
انور / قول مع السلامه ياله
على يبتسم و يبص فى الارض
على / مع السلامه يا حج
انور يطلع من المكتب و يروح على الشاورما يلاقى احمد واقف
احمد / على فين بدرى كدا يا حج
انور / مسافر و هاخد اجازه حبه من بعدى على هو المدير محدش يتعبه
احمد / امرك يا حج
انور / مع السلامه
احمد / بالسلامه يا حج
...............................
فى الفندق
حسام / اخيرا خلصنا
ندى / انا ضهرى اتقطم
حسام / ضهرك ايه ياختى و انتى كنتى عملتى ايه
ندى تضحك
حسام / الست تدعى علينا انا هعملها و لا بتعرفى تنضفى و لا بتعرفى تنيلى و انا اللى ادبست فى الاخر
ندى / الله اعملك ايه يعنى
حسام / هش و لا كلمه ليكى عين تبجحى كمان دانا هرقد يومين
ندى / ربنا يخليكى يا ماما هيرقد من تنضيف اوضه
حسام / احب افكرك ان ماما مش هتسافر معانا
الضحكه تروح من على وش ندى
حسام / مالك وشك قلب كدا ليه هو انا قولت حاجه غلط
ندى / لا بس انت معاك حق انا كنت طول الوقت مركزه فى دراستى و بس لا بعرف اطبخ و لا انضف و لا اغسل و لا اعمل اى حاجه و دلوقت
حسام / ما فرقش حاجه انا و انتى هنحط ايدينا فى ايدين بعض
حسام يمسك ايديها
حسام / و نتعلم سوا
ندى / بجد
حسام / بكره تبقى بريموا فى كل حاجه و اجدع من اجدع ست بيت و بكره تقولى حسام قال
ندى / ربنا يسهل
حسام / فكيها بقى ما بحبش اشوف البوز ده
ندى تبتسم حسام يمسكها من دقنها
حسام / ايوه بقى خلى الشمس تطلع بقولك روحى اللبسى بسرعه عشان نازلين
ندى تهز راسها و تمشى
..........................
قدام عماره أية
غاده تركن العربيه
أية / شكرا
غاده / العفو على ايه
أية / هتعوزوا منى حاجه
غاده / ميرسى ما نتحرمش
أية / انا ماشيه
غاده / مع السلامه
أية تبص على عمر قاعد قدام و مش بيعبرها تفتح الباب و تنزل و تطلع العماره و غاده تطلع بالعربيه
غاده / مدام مش طايقها اوى كدا خلتها تفطر معانا ليه و كمان طلبت انى اوصلها
عمر / مش حوار مش طايقها
غاده / امال ما ردتش عليها ليه كانت بتكلمك انت على فكره
عمر / عشان عاوزها تبعد عنى مش عاوزها تلاقى منى اى معامله حلوه فتفهم غلط و تفضل لازقالى
غاده / كنت خلتها تمشى من الاول
عمر / الشنطه اللى معاها فيها فلوس و خافت تتسرق منها
غاده / فلوس ايه
عمر / يوووووه يا غاده
غاده / اسفه
عمر / انا اللى اسف بجد مخنوق اركنى فى اى جنب
غاده / انت مش ملاحظ انك كل متضايق ما بتطلعش همك غير فيا و انا مستحملاك
عمر يبصلها غاده تركن
عمر / انا اسف و على فكره انا مقدر اوى انك مستحملانى بس انا تعبان مخنوق و مش قادر
غاده / و ده واضح عليك و صدقنى انا بحاول اساعدك
عمر يبص فى الدواسه و ينفخ و يسكت
غاده / اوك اوك انا مش هضغط عليك انا هوصلك تمام
عمر / لا انا هتمشى يمكن افك شويه هكلمك بالليل تمام
غاده / تمام
...........................
فى المطعم
احمد / مالك يابنى هو الحج قالك ايه جوه
على ميردش و سرحان
احمد / على على انت يابنى بكلمك
على / ايه
احمد / اللى واخد عقلك مش كدا فى ايه مالك
على / مليش فى ايه
احمد / بقولك مالك مسهم من ساعه ما خرجت من مكتب الحج
على / مفيش حاجه يابنى سرحت شويه ما تعملش حوار
احمد / صحيح بخصوص موضوع السفر اللى كنت كلمتنى عليه
على / ما عدلوش لزوم
احمد / يا سلام بعد ما كلمت الناس
على / حقك عليا يا احمد والله كنت ناوى بس الظروف اتكعبلت فوق نفوخى
احمد / و ايه يعنى و هى من امتى ظروفك كانت عدله اساسا دانا من يوم ما عرفتك و انت متكحور
على يبصله بحزن  احمد يخبط بالراحه على ضهره و يبتسم
احمد / بس انت طول عمرك كنت قدها يا صاحبى مالك فى ايه احكى لاخوك
على / الشيله تقلت عليا
احمد يبص ورا على
احمد / اوبااااااا
على / فى ايه
احمد / العروسه
عربيه حسام تركن تحت بيتها و حسام و ندى ينزلوا ندى تبص على على حسام يلفلها و يحوطها بدراعه و ياخدها و يطلعوا و هى بتحاول تبص على على و على عينه معاها
احمد / ايه انسى بقى
على / خاسه كانها ما بتاكلش
احمد / هههههههههههه تلاقيها مش فاضيه تاكل بتشقى ههههههههههههه
على يقوم و يزق احمد و يطلع و احمد بيجرى وراه
احمد / بهزر بهزر انت يابنى بهزر .... يووووه زعل
....................
فى شقه أية
أية تطلع البلكونه تنشر الغسيل تلاقى عمر واقف الناحيه التانيه ساند على عربيه يشوفها يقوم و يمشى و يقف بعد شويه و يبصلها تانى و هى عينها معاه بلهفه يبص الناحيه التانيه و يتنهد و يبصلها تدخل تجرى على جوه
أية / ماما انا نازله اجيب حاجه حلوه نفسى هفانى على شيكولاته
سمر تطلع من المطبخ
سمر / ما انتى كنتى بره
أية / كنت فاكره ان عندنا و ما لقتش مش هتاخر ماشى
سمر / هاتيلى معاكى كيس ملح و كيلو مسحوق اوتوماتيك و خدى فلوس من البك
أية / تمام تمام ثوانى و جايه
أية تلبس الشوز من على الباب و تنزل بعبايه الشارع تبص يمين و شمال تلاقى عمر بعيد تجرى عليه يحس بيها يبص و يقف
عمر / فى ايه انتى كويسه
أية / انت بتعمل ايه هنا
عمر / هنا فين
أية / انت مش قولت
عمر / انا عارف انا قولت ايه انا بتمشى فى شارع الحكومه
أية / انت ما كنتش بتتمشى انت كنت قاعد قدام البيت
عمر / دا كان بيتى اتولدت و اتربيت فيه ماشى
أية / انت ليه قاسى عليا اوى كدا
عمر / مستنيه منى ايه
أية / هو احنا ما ينفعش نرجع زى زمان
عمر / ما ينفعش حتى لو عاوزين
أية / لا لو عاوزين هنقدر مفيش حاجه هتمنعنا بس نكون عاوزين
عمر / انا لازم امشى
أية تمسك ايده يبصلها
أية / انت عاوز نرجع زى زمان صح
عمر / سلام يا أية
عمر يسحب ايده من ايد أية و يسيبها و يمشى و هى تبص عليه بحزن و ترجع البيت و تقفل الباب
سمر / جبتى المسحوق
أية / هاه
سمر / الله امال نزلتى ليه
أية / نسيت اخد البك و ما افتكرتش الا لما روحت هناك
سمر / اللى واخد عقلك ياختى خلاص مش مشكله هبقى اجيب و انا نازله انا هغرف تعالى ساعدينى
أية تهز راسها
........................
فى شقه ندى
مها / حبيبه قلبى وحشانى وحشانى وحشانى
ندى / و انتى كمان يا ماما
مها / تعالى ساعدينى فى المطبخ نحط الاكل
ندى تهز راسها و تدخل
حسام / بالراحه عليا فى النميمه لاشرق منكوا هههههههههههههههههههه
مصطفى / اقعد اقعد عاوزك
حسام / خير يا عمى
مصطفى / انتوا عاملين ايه طمنى عليكوا
حسام / الحمد لله كلو تمام
مصطفى / ما عرفتش اتكلم معاك فى البيت عندكوا عشان كدا طلبت انك تيجى هنا ناخد راحتنا
حسام / فى ايه يا عمى قلقتنى
مصطفى / ندى
حسام / مالها
مصطفى / عامله معاك ايه
حسام / كويسه هتعمل ايه يعنى
مصطفى / ندى ما بتبصليش ما بتردش سلامى حتى
حسام / هى زعلانه منك شويه حضرتك عارف هى قد ايه عنيده
مصطفى / و ازاى اتاقلمت معاك بالسرعه دى ازاى اقنعتها توافق
حسام / ما كانش سهل اعترف بس هى عارفه قد ايه بحبها و لما شافت الفرح و الفستان و الفندق و عرفت انها هتسافر الامارات طبعا اقتنعت
مصطفى / تمام ربنا يطمنك
حسام / اطمن يا عمى
..........................
فى المطبخ
مها / طمنينى عامله ايه مع حسام
ندى / الحمد لله
مها / كويس معاكى
ندى / اه طبعا بصراحه كتر خيره اوى
مها / حسام ابن عمك و من لحمك و دمك و مفيش حد هيصونك و يخاف عليكى قده
ندى تهز راسها
مها / و بعدين هى الواحده مننا هتعوز ايه اكتر من واحد يكون بيحبها و حسام بيموت فيكى
ندى تهز راسها
مها / مالك يا ندى فيكى ايه
..............................
ندى / مفيش انا كويسه
مها / امال ما بتكلميش ابوكى ليه
ندى / عادى يعنى مفيش حاجه
مها / خدى حطى الاطباق على السفره و تعالى خدى منى
ندى / حاضر
ندى تاخد طبقين و تطلع بره تحطهم على السفره ترفع عينها ستاره شيفون بيطيرها الهوا من وراها على واقف فى بلكونته تقف و تبص عليه حسام يدخل و يقفل البلكونه
حسام / انتى لسه تعبانه
مها تطلع من المطبخ شايله صينيه
مها / تعبانه مالها
حسام / ايه يا عمتوا مل تقلقيش دور برد خفيف و بعدين مهى قدامك اهى كويسه
مها / انتى كويسه يا حبيبتى
ندى تهز راسها و تدخل المطبخ و هى بتمسح دموعها
حسام / والله قولتلها نروح لدكتور نطمن اكتر قالت انا كويسه
مها تطبطب على كتف حسام و تدخل المطبخ تلاقى ندى بتعيط اول ما تشوف امها تمسح دموعها و تعمل نفسها بتاخد صينيه مها تمسك ايدها
مها / ندى مالك يا ضنايا بتعيطى ليه
ندى تسيب الصينيه و تدخل الحمام و تقفل عليها الباب
...............................
على السفره
الكل قاعد بياكل و ندى بتبص للطبق و سرحانه حسام يمسك ايدها تبصله
حسام / ايه يا قلبى ما بتاكليش ليه
حسام يبوس ايدها
ندى / معلش انا اسفه بطنى مقلوبه شويه انا بجد اسفه
مها / خير يا قلبى اعملك كبايه ينسون تهدى معدتك
ندى / انا هقوم اعمل نعناع
مها / لا بلاش لتكونى حامل بس
حسام / هههههههههههههههههه حامل ايه بس يا عمتى
مها / انت مش قولت من امبارح بطنها مقلوبه
حسام / و هو الحمل بيحصل فى اسبوع الاعراض دى على الاقل مش قبل شهرين
مها / اووووووووف كسرت فرحتى يا حسام
حسام / حقك عليا و بعدين ملحوقه قريب باذن الله هنبلغكوا البشاره مش كدا يا قلبى
حسام يبوس ايد ندى تانى ندى تسحب ايدها و تقوم
ندى / عن اذنكوا
ندى تقوم تدخل اوضتها تبص من الشباك على البلاكونه مفيش حد تبص فى الشارع مفيش حد حسام يدخل يحط ايده على كتافها تبصله و تبص فى الارض
حسام / بلاش تخلى مامتك تضايق اكتر من كدا
ندى / انا تعبانه اوى يا حسام تعبانه بجد
ندى تعيط حسام ياخدها فى حضنه و يطبطب عليها
ندى / مش لاقيه حد اتكلم معاه و لا حد يسمعنى مش قادره استحمل مش قادره امثل
حسام يرفع عنيها لعنيه و يمسك خدودها بايديه
حسام / كلو هيبقى تمام اوعدك كلو هيبقى احسن
ندى تهز راسها حسام يوطى على راسها يبوسها مها تدخل و معاها كبايه ينسون
مها / احم احم
حسام يبعد خطوه
مها / الله هو انا هبقى عزولكوا و لا ايه لا خدوا راحتكوا انا عملتلك الينسون عشان يريح معدتك هروح انا بقى اكمل اكل
حسام / الف هنا
مها / تحب اجبلك اكلك
حسام / انا شبعت تسلم ايدك
مها / تمام
مها تطلع و تقفل الباب
حسام / تفتكرى خدت بالها انك بتعيطى
ندى / ما اعرفش
حسام / لا باذن الله ما اخدتش بالها باذن الله عدت على خير
............................
قدام البيت
حسام و ندى نازلين ندى تفتح باب العربيه عشان تركب عمر معدى تبصله يتف فى الارض و يطلع عنيها تدمع
حسام / اركبى يا نونو يلا
ندى تمسح وشها و تركب
...........................
فى الشقه عند على
على و عمر كل واحد نايم فى سرير و باصين للسقف و فجاه هما الاتنين ينفخوا يبصوا لبعض
عمر / مالك
على / العادى بتاعى و انت مالك
عمر/ سيبك منى انت مضايق عشان ندى شوفتها النهرده باين كانت عند امها مع اسم النبى حارسه و صاينه
على / شوفتهم
عمر / و ده اللى مضايقك طبعا
على / ندى مش سعيده مع الكائن ده
عمر / احسن اياكش تولع
على يقوم يقعد
على / ليه كدا يا عمر
عمر / انت لسه بتدافع عنها بعد كل اللى عملته
على / ما ما ... ما اعرفش ..بس ما تدعيش عليها ملناش دعوه فى ملايكه بترد عنها احنا ناقصين يا اخى
عمر / والله طب وماله معاك حق برده
على / اصلا مش ندى السبب فى اللى انا فيه
عمر / امال
على / الحج انور
عمر / ماله الحج ليكون عيان و لا حاجه
على / مش عارف خد شوف بنفسك و قولى فهمت ايه
على يفتح درج الكومدينو و يطلع ملف و يديه لعمر عمر يبص و يندهش
عمر / الكلام ده بجد و لا انا بحلم
على / دا مش حلم دا كابوس
عمر / انت خدت على الفقر و لا ايه يابنى اخيرا الدنيا ضحكتلك اخيرا لقيت اللى يعوضك عن كل اللى عشته فى حياتك اوعى ترفص النعمه لتزول يا على
على / انا ما استاهلش الحاجات دى
عمر / و ما كنتش تستاهل كل الحاجات الوحشه اللى حصلت فى حياتك يمكن ربنا بيعوضك خير يمكن ربنا عاوز يورى الناس ال.... و لا بلاش بتزعل يورى جران الهنا اللى رفضوه بقى ايه فى كام يوم
على / و افرق عن جوزها فى ايه هو ابوه ساعده و انا الحج ساعدنى
عمر / الفرق كبير يابنى هو الدنيا ما علمتوش زى ما علمتنا بقولك ايه انا عارف انت شايل الهم ليه مش عشان الفلوس و كدا انت خايف تكون الامانه تقيله عليك
على / ايوه يا عمر الحج انور بياتمنى على نفسه و بيته و مراته من بعده ... بعد عمر طويل طبعا و كمان العمال و الشغل
عمر / و دا لسبب واضح انه شافك قدها يا على و لو حاجه زى دى انت مش قدها مين قدها يعنى انا مثلا
على / ليه لا انت معيد شاطر و معاك شهاده عاليه و هتحضر ماجستير ان شاء الله و تبقى دكتور فى الجامعه ناقصك ايه
عمر / صحيح نسيت اقولك غاده يا سيدى
على / مالها
عمر / عوزانى اشتغل معاها فى شركه ابوها
على / خير و بركه اهو خبره و فلوس فى ايه احسن من كدا لو تسمعلى انا حاسس ان البت دى عينها منك اصلا هتلاقى زيك فين اساسا
عمر / هههههههه انت بتقول ايه يا راجل غاده دى زى اختى ما تقولش كدا طبعا
على / و ايه يمنع
................................