بريق الأمل & الدنيا حكاية

بريق الأمل

المقدمة والشخصيات

روايتنا تحمل عدة قصص لعدة أشخاص الأيتام الفقد والفقر والنجاح والاستقرار والصعود نحو الأعلى لعدة شخصيات معانا مش شخصية وحدة

في إحدى مناطق البلاد كان مقام لعزاء مرأة كبيرة السن مخلفة وراها أولاد وكناين وأحفاد وبنت صغيرة لم تتجاوز السادسة عشر من العمر
انقضت أيام العزاء وبنتها ومالها من الاسماء لطيفة
قعدوا الخوت واحلين وين بيمشوا بأختهم من لبتقعد مع مني وصارت مشاورة كبيرة
الأخ 1 :نبنولها دار وفيها حمام وتقعد فيها لعند يجيها نصيب أو ربي ياخد أمانته
الأخ 2: من بيبني دار في سوره قول تبي أنت
الأخ 1: لا لكن هذا هو وين بنطيروا بيها
الأخ 3: الحوش وهي ساكنة معاي هي وأمها وأنا ساد ماريت مانبيش نتقيد بحد
مرت الأخ 1: ماتبوهاش واحني مانبوهاش وين بالطيروا بيها بتخلوها في الشارع
مرت الأخ 3: ماهو ماطاق فيك شي أنتي ماكنتي تعاندي في حد
الأخ 1: تقعد كل يوم عند واحد أحسن حل

والحديث هذا كله تحت مسامع لطيفة لسكتت سكتت ونفجرت
لطيفة: أنا احدفوني للملجأ دار الأيتام أو العجزة نلقى من يهتم بيا مانبيش جميل حد
الأخ 3: سكري فمك يافرخة وخشي الداخل مواضيع مش ليك
لطيفة: أظن ماتتكلموش على حد غيري الموضوع يخصني وأنا مسامحتك وأرفعوني للملجأ مانبيش منكم شي

فيه هلبا مايتحملوش المسؤولية سوى لأخته أو أمه إلا من رحم ربي وهلبا بنات في الملاجئ من نفس النمط وربي يلطف للقدام

مرت الأخ 1: كلامها مزبوط إذا هي تبي تمشي للملجأ أرفعوها
مرت الأخ 3: ايه أرفعوها تو تشوف الملاجئ شن شكلهن تحساب زي مانعاملوا فيها هنا زي مانعاملوا فيها غادي بتخدمي وبالديري كل شي مابتقعدي مقعمزة
لطيفة: ضحكت هو أنا خدامة خدامة مدايريني أرفعوني نخدم أيتام عالأقل نكسب فيهم أجر

ماماطلوش هلبا في الموضوع وقبلوا يرفعوها ونسوا توصيات أمهم عليهم ليخش عليها تقوله الله الله في لطيفة ردوا بالكم منها لكن هات من ضميره حي على وخياته
لطيفة: تلم في دبشها في شنطة وهي تبكي وتمسح في دموعها وألم فراق أمها وخوتها ليتعاركوا عليها زي النعجة من بياخدها وتقعد عنده خدت صوت أمها وقعمزت عالسرير تبكي وباست امها الموجودة عالصورة ربي يرحمك يأمي كنتي شادة عليه هلبا حاجات تو انفتحوا يأمي أنا بعدك وحيدة محتاجة ليك محتاجة حضنك الدافئ وينك 😭
مرت الأخ 3: هيا يستنوا فيك
لطيفة: حطت الصورة في شنطتها وسرتت السريتة وخدت شنطتها وتشوف للمكان كانت دارها هي وأمها المعبية بريحتها تستنشق في آخر ريحة متبقية منها وطلعت وهي الدموع في عيونها سلمت على خوتها أنا مانقدرش نحط في قلبي ونعبيه كره اتجاهكم ماعنديش مانقول كان ربي يسامحكم وليسألكم عليه قولوله تزوجت أو الأحسن ماتت لأنه مافيش حياة بعد أمي كأني مت وراها وركبت في السيارة مع خوها وانطلقت
مرت الأخ 1: تو بكلامها هذا تحسابه بنقولها أقعدي وبنتلقوها بالأحضان
مرت أخ 2: ربي يهدي من خلق
مرت الأخ 1: بالك مش عاجبك كان مش عاجبك خديتيها لحوشك ياحنة أنا ان شاء الله نعاند صغاري

بعد الحوسة واللوسة كل واحد روح لحوشه
لطيفة وصلت لدار الأيتام وهي شبحت للمبنى قلبها نغم وركبلها الرعب من مستقبل مجهول جاته برجليها

حطها خوها وروح ونسي حتى طريقه معاها
خشت لطيفة: ودقت الباب طلعتلها مرأة كبيرة في العمر كانت بعمر أمها ومايقارب وكان التجهم والوعارة واضح من وجهه اسمها فاطمة: وهي تنادي يامفيدة يامفيدة تعالي وشافت للطيفة قالتلها خشي وراي ومشت لمكتبها للباين إنها المديرة
خشت لطيفة وراها وهي حاسة بوحشة الدنيا كلها فيها
فاطمة: قعمزي وأشرت عالكرسي
لطيفة: سيبت شنطتها بحنب الباب وخشت قعمزت
فاطمة: شن اسمك ومن تكوني
لطيفة: وهي تشوف حوالينها وتطلع عالمكان اسمي لطيفة ### وأنا جيت لأنها ماعنديش حد
فاطمة: طلعت ملف وتكتب في اسمها قديش عمرك يالطيفة
لطيفة: عمري 15
فاطمة: تسجل وسيبت القلم وسكرت الملف وشبكت ايديها عالطاولة تعرفي يالطيفة إنك بعد توصلي للعمر القانوني ماعاد نتكفلوا بيك يعني ليك من هنا لتلاتة سنين القدام
لطيفة: بلعت ريقها من الخوف وباهي وأنا وين نمشي بعدها
فاطمة: مش عارفة في هلبا تزوجوا قبل مايسكروا ال18 وفيه لأجرت شقة ومجموعة من البنات لمعاها وفيه من تبنتها عائلات
لطيفة: مانقدرش نقعد يعني حتى نخدم في الملجأ
فاطمة: في الحالة هذي ولوقتها يجوز

جت مفيدة: تفضلي مدام فاطمة
فاطمة: تأشر على لطيفة مقيمة جديدة نبي ترفعيها للدار وتقوليلها على قواعد الميتم مش ضروري ينعاد الكلام مرتين
مفيدة: حاضر ومشت للطيفة سلمت عليها هيا نوضي معاي
ناضت لطيفة مع مفيدة وفي الطريق للدار لبتعيش فيها لطيفة يتجانبوا أطراف الحديث
مفيدة: شن اسمك بنتي
لطيفة: أنا اسمي لطيفة
مفيدة: عاشت الأسامي وأنا مفيدة
لطيفة: تعيشي وتشوفي سمعت المدام فاطمة تنادي عليك بالاسم هذا
مفيدة: فتحت الباب تعالوا يابنات تعرفوا على زميلتكم الجديدة
كانت غرفة فيها 6 سراير وفيها ثلاث بنات
ناضوا سلموا عليها
مفيدة: حطي حوايجك في الدولاب هذا وعندنا التزامات أنتي تقري صح
لطيفة: لا
مفيدة: تمام مش مشكلة معناها عندنا النوم متأخر ممنوع والأكل على حسب الوجبة والسهر ممنوع عندنا وطويلة أيام الأسبوع نخدموا في الأشغال اليدوية والخياطة في نهاية الأسبوع نرفعوهن نبيعوهن
لطيفة: بس أنا مانعرفش
مفيدة: عادي تتعلمي
لطيفة: حاضر
مفيدة: تو نخليك تتعرفي عالبنات وطلعت

لطيفة شافت للبنات
قدر: مرحبا أنا قدر وأنتي
لطيفة :أنا لطيفة
قدر: ابتسمت حلو اسمك وباين انك لطيفة من اسمك
لطيفة: قابلتها بابتسامة شكر
زينب: وأنا زينب وينادولي زينة
ليلى: وأنا ليلى
لطيفة: عاشت الأسامي شافت للسراير من فيهم هاذو
قدر: مافيش حد نستنى من يجي يشاركنا بيهم
لطيفة: ابتسمت
قدر: أنا ندوي هلبا فلهذا تحمليني
مع رن الجرس
لطيفة: استغربت بالصوت
زينب: توا وقت الغداء هيا نوضوا قبل مايفوتنا وتحرمنا منه فاطمة
ليلى: هيا بسرعة
نزلوا كلهم تحت وشافت قدامها كل صغار الميتم لفيهم الصغير ولفيهم الكبير مختلف الأعمار وللجنسين أولاد وبنات ولكل ولد أو بنت وراه حكاية تحكيها عيونهم ونظراتهم من ألم وكسرة تحكي شن ذنبنا نحن نعيشوا بدون الكل شن دنبنا انخلقنا أيتام 💔

.
.
.
يتبع مع قصتنا انتظروني