الدينيرو

24

الدينيرو الجزء 17

رواية الدينيرو dinero
حب الأخ حب مختلف ، حب يفوق التصورات ، حب يفوق اتساع المدى ، حب الأخ هو حب همام للخوتو ، كان دائما سندهم و قوتهم في الحياة كان داك الجبل لي مسندين عليه في الشدائد كان و لازال هو الأغلى و الأبقى و الأفضل ..

همام استدرك حاله و بسرعة نفض أفكاره و حنحن صوته و نطق بهدوء

_ ريم لباس عليك؟

ريم (بدهشة ، صدمة تلاتية الأبعاد ، آخر شخص تتوقع مجيئه ، نطقت بتلبك ) : لباس وانت ؟

همام (بتساؤل ) : غاتخليني واقف في الباب ؟؟

ريم (حشمات) : سمح ليا تلفت دخل مرحبا بك..

بخطى انسان واثق من نفسه دخل للدار وهضر مع ريم كايسول

_فين ماماك؟

ريم (تتغوت وهي متوترة من وجده ) : ماما ماما

سميرة (كاتسول من داخل المطبخ) : شكون آ ريم ؟

ريم(تتهبط صوتها ) : اجي اماما هذا خويا همام ..

سميرة (عقدات حجبانها بشدة ماحاملاش تشوف حتى واحد منهم خصوصا وأنها طيلة الأشهر الماضية تتفادا أمجد ) : واخة هاني جاية ..

خرجات من المطبخ كاتمسح ايديها في فوطة صغيرة وكاتفكر هذا اشنو جابو لعندهم في هاد الوقت وعوالة تجري عليه ..

همام (مشى في اتجاه الصالون و جلس بأريحية، كأن الدار داره و نطق بهدوء ) : ريم سيري لبيتك بغيت نهضر مع ماماك شوية ؟؟

مازادتش معاه الهضرة دازت من حدا ماماها ودخلات لبيتها خلات الباب محلول شوية بغات تعرف اش جاا يقول...

همام(بملامح هادئة و تقة في نفس ) : لالة سميرة هادي دارك ماتحتاجيش تبقاي واقفة في الباب انا جاي نهضر معاك ونوض نمشي، ما باغيش نكون تقيل عليك

سميرة (تلفات ما عرفات ماتقول خصوصا ان هاد الشخص يتلفك غير بكلمة ربي عاطيه كاريزما وهبة، نطقت بصرامة ): مابقى فاش نهضرو لي بيناتنا قرب ايسالي وكل واحد اشد طريقه

همام (جوبها بتبات تيحاول يضبظ الوضع ) : لي بيناتنا عاد زاد قوى وعمرو يسالي لي بيناتنا لحم ودم وليد ولا بنيتة جايين في الطريق وكيف ما هو محتاج ماماه راه محتاج حتى للباباه

سميرة (تتحاول تقسح وتبان قوية) : شكون قالها لك !! لي بيناتنا المحكمة تحكم فيه وتعطيه ايشوف ولدو ومرحبا من غير هادشي عطيونا التيساع...

همام (عقد حجبانه بشدة و نطق بجدية ) : هادي هي مشكلتكم العيالات العاطفة خارجة عليكم وماكاتفكروش بالعقل نهائيا واش في نظرك ديك السويعة لي انت تتهضري عليها ايلا كفات أمجد غاتكفي الولد نقولو ماحدو لحيمة حمرااا راه ما غيحس بوالو ، زيدي منين اكبر باش غاتشرحو ليه علاش هو من دون الوليدات عايش غير مع ماماه وجداه وبعيد على باباه!!