اتجهت بيان الصاله...
ام سلطان : وش فيتس ضايقه
بيان : يجده والله قلبي يعورني ونا اشوفه كذا
ام سلطان : م عليتس ي بنيتي ان شاء الله فتره وتعدي
بيان : ان شاء الله
ام سلطان : روحي اجلسي مع البنات شوي غيري جو
اريام : تعالي تعالي ديم بتجي بعد شوي
ام فهد : لها وجه تجي عقب الي صار
اميره : إذا اخوها اساس البلاء هي وش ذنبها
ام سلطان : صادقه البنت ماشاء الله عاقله مهيب زي اخوها
ام فهد : اي زين
اريام بهمس : هذي هي اسكتوا بس
طلعوا البنات و جلسوا ف الحوش.
ديم : والله مدري وش اقول لكم ياخي
اميره : لا تقولين شي يعيني ندري حنا
ديم : بيان والله انا اعتذر لس بدال اخوي
بيان : لا عادي لا تشيلين هم
ديم : شلون م اشيل هم بغى يموت الولد
اميره : تكفون سكروا السالفه
اريام : وهي صادقه خلاص
جلسوا البنات يسولفون و غير كذا..
دخل ابو سلطان : السلام عليكم
ام سلطان : عليكم السلام
ام فهد : يهلا والله ي عم
ابو سلطان : هلا فيتس.. وين خلف ؟
ام سلطان : نايم نايم شتبي فيه
ابو سلطان : قولي ل بيان تصحيه مهو زين كل شوي نوم
ام سلطان : تعبان خله
ابو سلطان : ادري انه تعبان خله يقعد معنا يغير جو شوي بدال النوم و التعب
ام سلطان : طيب
-
ام سلطان : ي بيان تعالي شوي
بيان : سمي
ام سلطان : روحي صحي الخلف جدس يبيه
بيان : بس مو نايم؟
ام سلطان : شنسوي جدس يبيه يصحى و ينزل عندهم
بيان : تمام
راحت بيان و اتجهت لغرفتها ، شغلت اللمبه و راحت ل خلف
بيان بهدوءء : خلف خلف
لف عليها خلف وهو توه صاحي : لبيه لبيه
بيان : اصحى جدي يقول يبيكم تقعدون معه
تنهد خلف بتعب : يوهه
بيان : إذا مب قادر بقول له
خلف : لا لا بنزل مو ناقص هواشات بعد
ضحكت بيان : طيب تبي مساعده
خلف بـ ابتسامه قال بهدوء : لا مشكوره
اتجه خلف يبدل ملابسه و غير كذا و بيان الي منتظرته
طلع خلف : وش فيتس
بيان : ابد سلامتك امشي نطلع سوا
خلف : طيب امشي
طلعوا بيان و خلف و اتجهوا للصاله
اتجه خلف و قام يسلم على جده و جدته
ابو سلطان : بارك الله فيك - تعالو اطلعوا شموا هواء حدكم نوم نوم
سعود : شنسوي فاضيين مالنا غير النوم
ابو سلطان : اجل هالحين تجلسون كلكم هنا
جلسوا العيال مع جدهم ب الجلسه و البنات خلفهم
وليد : يبه عادي نطلع نتمشى شوي
ابو سلطان بصوته الثقيل : لا ناقصين حوادث بعد
سالم : والله محد يبي يطلع اركد ي وليد
انسدح خلف على رجول سعود بتعب : اخ والله سلوم صادق محد يبي يطلع
ضحك سعود : انت بس ارتاح لا تطلع مكان
ابو سلطان : ي الخلف انا قلت لك تقوم عشان تجي تنسدح هنا
ضحك خلف بتعب : خلني ي جدي مرتاح كذا
ابو سلطان : م ينفع معكم شي انتم
قام ابو سلطان و اتجه للمجلس
سعود : الحين ليه قام
خلف : مل من القعده معنا
وليد : والله وهو صادق انا بكبري مليت
سالم : تصدق ي وليد الحين ودي اطلع
وليد : اسكت انت اسكت قدام ابوي م تعرف تتكلم
سالم : ليتني ساكت صدق
خلف : ليتك ساكت والله
سعود : ليتكم كلكم ساكتين
و عند البنات الي كانوا مشغولين ف السوالف و بيان الي كانت مو مركزه معهم وهي مركزه على خلف الي كان منسدح وهو تعبان
اريام : بيان وش تناظرين؟
اميره : عانيها تشوف خلف
فزت بيان و لفت لهم : وشو
اريام : وش فيتس؟
بيان : هاه م فيني شي كملوا انتم
قربت انفال بهدوء من بيان : كلنا ندري انتس خايفه و شايله هم خلف لا تخافين م عليه شر ان شاء الله
تنهدت بيان بتعب : ان شاء الله
خرجت ام سلطان عندهم : وش تسوون
فزوا كلهم على صوت جدتهم :
سعود : والله نسولف
ام سلطان بصوت خفيف : بعده تعبان؟
ابتسم خلف وهو يسمعهم يسألون عنه
سعود : شوي شوي ان شاء الله بيطيب
وليد بضحك : شكل خلف وهو منسدح عليه كأنه ولدك
سعود : اقول اسكت بس
سالم : ذا محد يسولف معاه ملسون
لف عليه خلف : سلوم حدك الا سعود
سالم : انت نام بس
حط راسه خلف و سعود الي يلعب بشعره وهو يضحك معهم : خلوه ينام بس
ام سلطان : قوموا و ادخلوا داخل
اريام : ليه؟!
ام سلطان : بس خلاص مهو زين بعد شوي يأذن المغرب ادخلوا
سعود : خلوف قم قم
خلف : همممم
وليد : قم خلاص بندخل للصاله
قام خلف و سعود الي يسانده عليه دخلوا للصاله
وليد : خليف اجلس ابوي لو شافك نايم بعد بيقعد يهاوش
ضحك خلف : طيب لا تخاف م بنام
سعود : ابك وش ذا الطفش
سالم : شتبي نسوي
سعود : لا سوالف ولا شي شذا
ابو سلطان : الصلاه امشوا نصلي
وقفوا كلهم وراء جدهم عشان يروحون يصلون
و عند البنات :
اريام : بنات برجع تامرون ع شي؟
اميره : وي بدري
اريام : والله راكان جاء امي تبيني اساعدها و غيره
سُميه : تمام براحتس
اريام : يلا سلام
ام خلف : اووه كلكم هنا
بيان : يهلاا والله
ام خلف : هلا فيتس ي بنتي شخباركم
اميره : الحمدالله
انفال : الحمدالله ونتي؟
ام خلف : الحمدالله على كل حال ... ماشاء الله من متى انت صاحي
لف خلف على امه ب ابتسامه : من شوي صحيت
ام خلف : يوجعك شي تعبان؟
خلف : لا ي نظر عيني م فيني شي لا تخافين
ام خلف : اي زين الحمدالله
ام سلطان : بكره عندنا عزيمه بمناسبة خروج خلف ب السلامه
ام فهد : منو بيجي؟
ام سلطان : كل اقاربنا جايين
ام فهد : ام مالك بتجي؟!
ام سلطان : اي ليه؟
ام فهد بتأفف : اف ي خالتي ذي كل م جت م تخلي كلمه ع فهد ولدي
ام سلطان بضحك : م عليتس منها
ام فهد : عشانس يخاله بس
خلف : طيب ونا بقول ل اخوياي يجون بعد
ام خلف : اكيد بيجون العزيمه لك اصلا
خلف : اجل تمم
وقف خلف بحماس ونسى ان رجله توجعه وهو تعبان قال بتعب : اهخخ
فز سعود بصوته : بسم الله وش بك
خلف : يولد بغيت اروح فيها من الحماس
ضحك وليد : الله يهديك اجلس ارتاح بس
فهد : يمه انا يمكن م اجي
تكتفت ام فهد : وليه ان شاء الله
فهد : بروح اخلص شغلي و غيره
ام فهد : بتجي غصب عنك لازم تجي يشوفونك الناس
ضحك فهد : يشوفوني وش بيسوون يعني
ام فهد بضحك : يشوفون ولدي يقولون شزينه
فهد : يمه صادقه انتي مستحيل
ام فهد : عشان امك طيب
فهد : زين عشانس بس
خلف : الوو
ليث : يهلا والله ارحبب
خلف : تبقى
ليث : ايوا شصار
خلف : ابد سلامتك بس اسمع بكره عندنا عزيمه و ابيك تجي انت و العيال
ليث : م يحتاج والله مشكورين
خلف : ليثوو خل عنك السوالف و تجي بكره القاك اول واحد
ضحك ليث : ابشر ابشر
خلف ب ابتسامه : اي زين
ليث : اي شخبارك ؟ م ناوي تجي الدوام
ضحك خلف : تبيني اجي ب الحاله ذي
ليث : تجينا ب السلامه أن شاء الله
خلف : ان شاء الله
-
و فـ الليل عند البنات :
الجوهره : يوهه برددد
ديم : امشوا ندخل طيب
اميره : لا تكفون الجو حلو
سُميه : طبيعي برد ي جوجو انتي شايفه ملابستس
الجوهره : م توقعت بيكون كذا الجو
سُميه : طيب م عليتس بروح اجيب لتس شي تتدفين فيه
الجوهره : طيب
دخلت سُميه لـ غرفة سالم الي كانت أقرب غرفه : سلووم
سالم : لبيهه
سُميه : عادي اخذ فروتك؟
سالم بتعجب : لابسه فروتك و تبين فروتي لذي الدرجه برد
سُميه : مب عشاني عشان الجوهره
رفع حاجبه بصدمه : صادقه انتي وشو جوهره ف فروتي
سُميه : سلوم اخلص البنت م عندها شي يدفيها
سالم : زين زين امسكي
سُميه بغرور وضحك : شكراا شكرا
-
سُميه : خذي تدفي
لبست الجوهره الفروه و غطت نفسها عشان تتدفى
اريام بهمس : احح فروة سلوم ذي
ضربت اميره كتفها خفيف : اسكتي بس
الجوهره : يوهه مشكوره سميوه
سُميه : العفو يعيوني
وجلسوا البنات ب الحوش يسولفون ...
و عند العيال الي ب الصاله :
خلف : يالله عاد انا رايح انام تامرون ع شي
سعود ب ابتسامه : ابد سلامتك
دخل خلف لـ غرفته و استغرب ان بيان مو موجوده و قال في نفسه : يمكن مع البنات سهرانه
طلع عشان يشوف وينها ) سعود : وش تدور؟
خلف : وينهم البنات
سعود : برا ليه؟
خلف : لا بس اسأل بيان وينهي م شفتها
ضحك سعود : لا تخاف موجوده معهم
خلف : اي زين
دخل خلف للغرفه و حط راسه لين غفت عيونه بتعب
اريام : يمه حمود يدق
ديم : ردي طيب
اريام : الو
محمد : متى ناويه ترجعين؟
اريام : شوي بسس
محمد : وشو شوي طولتي ترا
اريام : حموود تكفى
م تحمل محمد وهو يسمعها تقول حمود و يرفض طلبها ابتسم بهدوء : طيب شوي و ارجعي
اريام : على خشمي
طفت اريام المكالمه
الجوهره : شصار ؟
اريام : ابد يبيني ارجع
ديم : الحين؟؟
اريام : لاا قال شويات و ارجعي
بيان : اي زين اساسا انا رايحه انام وراءنا عزيمه بكره
الجوهره : طيب ي انفال ملابسي ب غرفتس تعالي معي شوي
انفال : تمام
سُميه : رجعوا الفروه مره وحده ف طريقكم
دخلوا البنات الصاله
الجوهره : من جدس انتي تبيني ادخل؟
دفت انفال الجوهره ل غرفة سالم الي كان مصدوم من الي يشوفه قدامه : شفيكم؟؟؟
وقفت الجوهره بخجل : لا بس هذي فروتك مشكور
سالم : العفو
اخذ سالم فروته من الجوهره الي كانت داخله بكامل زينها و فستانها الخفيف الابيض و شعرها الاسود
خرجوا البنات
الجوهره : ي حيوانه وش سويتي انتي بغيت اموت
انفال بضحك : عادي عادي
خرجوا البنات للحوش بعد م خلصوا
اميره : جوجو عاني ذا اخوتس؟
الجوهره : اي ذا فراس يلا سلام
سُميه : يلا مع السلامه تصبحين على خير
الجوهره : ونتي من أهل الخير يعيني
دخلوا البنات كل وحده ل غرفتها و الباقي رجعوا بيوتهم... دخلت بيان للغرفه و هي تحس ب البروده : يوهه والله بنمرض وش ذا البرد
فز خلف على صوتها : وش فيتس
بيان : برررد بنقص المكيف
هز راسه ب معنى طيب
راحت بيان تبدل ملابس النوم و حطت رأسها على السرير.. وكانت كل شوي تفز وهي تتحلم ب كوابيس و تسترجع كلشي صار ل خلف ب الأمس
فزت بيان بخرشه : يمه يمه
خلف : بسم الله وش فيتس
قامت بيان و الدموع ف عيونها : مو قادره انام قاعده اشوف كلشي صار فيك أمس إذا غمضت عيني
أخذها خلف عليه و ضمها بقوه : لا تخافين ي بياني انا هنا ومعتس اقري اذكارك و نامي
مسحت بيان دموعها و نامت ...
و عند العيال الي كانو ب الصاله و فجأه دخل عليهم مشاري ( ابو فهد ) و يعم الصمت عليهم
وليد بهمس : يويلناا
سالم : كله منكم لو إني ف غرفتي ابرك ليي
سعود : مالت عليكم الحين ابوي يجي و يهاوشنا
وليد : اسكتوا طيب يصير خير إذا صادنا
سعود : امشوا نطلع الحوش
وليد : طيب سعيدان انا و سلوم بنطلع انت رح جب ال فروات
سعود : تم
خرجوا العيال و طلع سعود يجيب فروات العيال..
دخل غرفة وليد و بعدها سالم و مسكها وهو يحس ب ريحة عطر بنت قال : مستحيل ذي فروته
طلع سعود للحوش و كانوا ينتظرونه هناك
وليد : وش بك
سعود و هو يناظر سالم : ذي فروتك؟
سالم : ايه!
سعود : احد من خواتي لبسها؟
سالم : لا ليه
فتح سعود عيونه بصدمه : اجل ليه ريحتها كذا ذا مهوب عطرك
تذكر سالم انه عطى جوجو فروته : اييي صح سُميه اخذتها عشان الجوهره مدري وشو
سعود : اي زين امسك
مسك سالم فروته و لبسها وهو يحس ب ريحة عطرها الهاديه الي اخذت مخه وهو معتبرها كـ بنت خاله فقط !
و بعد سوالف و ضحك و جلسه للفجر :
وليد : امشوا والله لو احد شافنا نروح فيها
سعود : جاني النوم
سالم : اجل كل واحد يذلف غرفته
دخل كل واحد لغرفته و عند سالم الي كان منسدح وكل تفكيره ف الجوهره الي للحين م تخطى شكلها و حلاتها
-
اليوم الثاني ... ابو فهد : معقوله امي م صحت للحين
وليد : خلها تنام شوي م بيصير شي
ابو فهد : ونا شقلت بس استغربت مو من عوايدها
وليد : م عليك انت م فيها الا العافيه بس امس طولنا ف السهر و شكلها دخلت ف نومه
ابو فهد : زين وين الباقي نايمين للحين؟؟
وليد : العيال ب المجلس و البنات مدري عنهم
ابو فهد بصوته الثقيل : ققوموواا قامت عليكم القيامه
ابو سلطان : وش فيك انت من صبح الله تصارخ
ابو فهد : يبه شف نايمين للحين و عندنا اليوم عزيمه نسيتو ولا وش
ابو سلطان : مشاري رح صحي خواتك و انا بصحي امك و بجي
ابو فهد : ابشر
دخل ابو سلطان لـ الغرفه يصحي ام سلطان : منيره ي منيره
ام سلطان : هااه وش فيكم
ابو سلطان : البيت ضايع بدونتس اصحي تصرفي معهم
ام سلطان بضحك : زين زين
-
ابو فهد : امييرووهه قومميي انتي وياهاا
سُميه : يبه شوي تكفى
ابو فهد : لا شوي ولا غيره اصحوواا وراءنا شغل
اميره : طيب طيب اذلفف
ابو فهد : بسرعه ابوي يبينا كلنا يبي يقول لنا موضوع
لفت انفال عليهم ب تعجب : وش موضوعه
ابو فهد : مهوب موضوع يعني بيقول لنا شي انزلي بس
-
بعد م تجمع الكل ف الصاله :
خلف : شصاير؟؟
ابو سلطان : لا ابد بس بقولكم عن الهنوف بنتي
فزت ام سلطان : وش فيها بسم الله
ابو سلطان : م فيها الا العافيه و اليوم بتجي هي و عيالها
وليد بحماس : صددقققق
اميره : امااا
ضحك ابو سلطان : وش فيكم مصدومين كذا؟ اي والله جايه
انفال : اخيرا م بغيناا
خلف : تنورنا والله مرحب فيها
ابو سلطان : مع عزيمة الخلف رجوع ام عبدالرحمن عزيمتيين
ام سلطان : طيب اللبسوا و خلصوا نفسكم المغرب الضيوف جايين
-
و بعد أذان المغرب و كان الكل مستعجل و متحمس و متوتر و غيره
دخلت عليهم الهنوف وكان الكل عند الباب متحمس
فتحت ام سلطان الباب و ضمتها بقوه و دموع ف عينها
الهنوف : يمهه اشتقت لكممم اخخ
سعود : ارحببوواا والله منوريين
الهنوف : ماشاء الله كبرتوااا
ام سلطان : اييهه و خليف تزوج بعدد
الهنوف : ماشاء الله تبارك الله وينه فيه
وليد : بتشوفينه اصبري وين عبدالرحمن؟
الهنوف : يدخل الأغراض
اميره : وين عووااش اشتقت لهاا
ضحكت الهنوف و قالت : بتجي بتجي اصبروا
ام سلطان : حياتس ي بنتي حياتس
الهنوف : البقى يمه وين ابوي؟
ام سلطان : ابوتس بيجي روحي انتي بدلي ملابسس عندنا عزيمه
الهنوف : تمام
دخلت الهنوف ل غرفتها تبدل هي و عيالها و عند الضيوف
ام مالك : اا.. م كملت كلامها الا و تقاطعها ام فهد : تنطقين ب اسم ولدي اقص لسانس
ام مالك بتكبر : ويع عاد من زينه
ام فهد : اي من زينه ونتي كل شوي تتكلمين عليه تبيه ل بنتك احلمي فيه عاد
ام مالك : اذلفي بس
ام فراس : الحمدالله على سلامة خلف
ام خلف : الله يسلمتس
ام فراس : اي شخباره؟
ام خلف : والله بعده يتألم من رجله و مكان الرصاصه لسى شوي
ام فراس : الله يبعد عنه الشر و يحفظه لكم
ام خلف : امين يارب
و عند البنات الي كانوا ب الحوش متجمعين يسولفون
ندى : الحمدالله على سلامتهه
بيان ب ابتسامه : الله يسلمتس يعيوني
الجوهره : ماشاء الله متى رجعتوا؟
عائشه : اليومم
اميره : كيف كانت رحلتكممم
عائشه بضحك : والله تجننن ناقص انتم
اميره : ان شاء الله رايحين حنا بعد ف احلامنا
عائشه : ايوا بيون وين بتسافرون؟
بيان : والله كنا ناويين نسافر بس قدر الله و صار الي صار رح نأجل كلشي
اميره : يحياتي انتي لعلها خيره ويكفيتس شرها
وفجأه سمعوا صوت سالم الي جاي و كلهم يسكتون : اموره نبي القهوه
اميره : ونا خدامه عندك؟
سالم : العيال موجودين روحي جيبي بسرعه
اميره بضحكة استفزاز : م بجيببب
لف سالم يكلم انفال او سُميه و يطيح نظره على الجوهره و نسى نفسه و وش كان يبي
اميره : هيهه انت وين وصلت
فز سالم : هاه ابد سلامتس بس شسمه جيبوا القهوه بسرعه
اميره : طيب طيب
انفال : عجزان يجيب ل نفسه
ضربت بيان كتف الجوهره وقالت بهمس : الظاهر سلوم حبتس
الجوهره : ي بنت اسكتي وش ذا الكلام
ضحكت بيان : ايه ايه اعترفي بس
اميره : وش وراكم انتم
بيان : ابد سلامتس
جاء وقت العشاء و تعشوا كلهم
ليث : تسلمون والله
خلف : الله يسلمك
محسن : م تشوف شر ي الخلف
خلف : الشر م يجيك ونا اخوك
خلصوا بعد سوالف و تعب و جلسة حلوه اتجه الكل لبيته
عند العيال الي كانوا يسولفون و سالم الي كان يغني :
يااماخذهه قلبيي
خذي ضيي عينيي
القلب لك فدووه
و يفداك النظظرر
كمل معاه خلف :
ي سااكنه م بين روحي و بينيي
اتنفسككك و الشوق في صدري كببرر
وليد : الله الله
سعود بضحك : طيب قلنا خلف متزوج م نلومه مغرم ف زوجته و يغني بس سلوم علمني من حبيت
سالم : انشهد انها ماخذه قلبي
وليد : ي ساتر ي ساتر
فجأه يدرعم عليهم ابو فهد : قلبك اجل قلبك اذللففوااا بسرعه
وليد : يليل ي مشاري خلاص مو بزران حنا
ابو فهد : ي سلااااامم اقووول
وليد : سم
خرجوا العيال و اتجهوا كل واحد ل غرفته و البنات نفس الشي
بيان : خلفف
خلف : عيونه
بيان : تعال خذ العلاج حقك
ابتسم خلف و قرب منها و قال : ابشري وش تبين اخذ بعد
ابتسمت بيان و رأسها ف الاسفل : م ابي الا سلامتك
وحطت بيان رأسها و كذلك خلف و ناموا ...
-
يُتبع 🤍.
حاولت بقدر الإمكان اخلي البارت طويل
لاني بسحب عشان الدراسه و كذا انتظروا البارت 8 إذا فضيت ان شاء الله 🙏🤍.
أنت تقرأ
كل الامان في حُبك وكل الاماني قربك
Randomرواية كل الامان في حُبك وكل الاماني قربك للكاتبة : رهف القحطاني ✍🏻 - ثاني إنطلاقه لي 🤎. - ترقبوا معنا الروايه ✨.
