الهَواجس

الحـلقة التـاسعة والثلاثـون

الكـاتبة شهـد 🖤

حين ٲرادت وصفهُ قالت عنهُ
بٲختصار : هو فد شي يرد الروح .

____________________________

رونـد

حسيت عظامي كلها ترجف والنفس بصعوبة اجره من الخوف اخاف اباوع ليورا وتجي عيني بعين مصعب واخاف اضل اباوع لغيث وعيونه الي تنذر بالشر رجليني اريد احركها واتقدم ما اگدر الرعب سيطر على كل خلية بجسمي..

حركة رجلين وراي خلتني التفت بسرعة من الخوف شفت مصعب يتقدم بأتجاهي گلبي صار يدگ الف دگة بالدقيقة واني اشوفه يتقرب بدون اهتمام او خوف لا أگدر احچي وأگله ارجع اخاف من غيث ولا اگدر اروح اله صرت مثل بلاع الموس وهم الاثنين كل واحد من طرف..

صار قريب بيناتنا تقريباً اربع خطوات وغيث گدامي هم بدأ يتقرب احس روحي راحت ..

ايدي ترجف حتى البرد گمت ما احس بيه من الخوف ابلع بريگي واقرأ ادعية وقرآن بگلبي اريد هالليلة تعدي على خير..

وصل غيث صارت عيني بعينه هز راسه متحلف ايده قابض عليه بعصبية وادري حقه والشي الي اني سويته ما ينغفر الشخص الوحيد الي وگف وياي انكشفت گدامه وخنت ثقته بيه گلبي انكسر لألف قطعة واني اشوف خيبة الامل بنظراته..

صك سنونه وهمس بنبرة متوعدة وگال..

-گدامي للبيت حسابنا بعدين..

تيبست بمكاني ماعرفت شسوي رغم كلامه كان واضح بس ما گدرت احرك رجليني من مكانهن من الرعب الي صار بيه بوقتها..

خنزر بوجهي ورجع حچه بصوت اعلى..

-گلتتت فوتيي للبيت بسرعة

هزيت راسي بسرعة من الخوف وتحركت متقدمة تعديته اريد اروح للبيت وماعندي حتى الجرأة التفت واشوف شنو راح يصير ولا نضرتهم اليه..

شوية شوية تباطأت حركتي خايفة على مصعب من جهة وعلى غيث من جهة ثانية ما اريد يتأذون و بوقتها وعدت نفسي هاي اخر مرة اشوفه هاي اذا ضليت عايشة...

-روند

فتحت عيني بصدمة من سمعت صوت مصعب صاح بأسمي خاف چان گلبي يدگ هسه وگف وراح اموت من الرعب الموقف الي خلاني بيه ابداً ما انحسد عليه اخوية واگف يمه وهو بدون اي خوف او خجل صاح بأسمي گدامه ويريدني اجاوبه...

بدون ما التفت او ارد عليه سرعت خطوتي امشي ما اريد السالفة تكبر بس هو الضاهر مُصر يكبرها لأن رجع صاح وكمل كلامه...

-روند..تغطي زين دفي نفسچ واشربي شي يدفي معدتچ لا تتمرضين ...

سكت شوية ورجع كمل كلامه بهدوء..

-وتصبحين على خير..

جريت نفس بعمق روحي راحت خفت على لحظة يهجم عليه غيث وتصير مصيبة بس مادري ليش هالهدوء من الطرفين..