#عرس_الذيب
🖊 خولة الغريب 🖊
الفصل الثاني - رهان القبل - 🍾💋بارت70💋🍾
بتنهيدة ضارت و فتحات الماريوو كتقلب بين حوايج كريمة ..! جبدات كنضورة طويلة فالأبيض .. مطرزة بالعقيق فصدرها .. مع شورط قصير .. و فوطة فقط ..!
دخلات للدوش كتسرح عينيها .. طرقات عليها الباب و بدات كتحيد فحوايجها و تقاد الما فالسخون .. و فنفس الوقت كتشوف الشبكة لي عندهم تما و المستحضرات لي فيها .. واش تعجبها ريحتهم ..!
بعد مدة من الوقت خرجات ملوية فوطة على شعرها .. حناكها مزنكيين بالفوار .. ريحة زوينة كتتشم فيها .. خليط بين الكوك و الشوكولا ..!
عينيها تقالوو ما بقى كيبانلها واالوو من غير الفراش و النعاس .. طفات الضواو و تخشات فالناموسية براحة و تعب شديييد خلاها تمشي فسابع نومة بلا ما تحس .. العيى هلكها بالمعقوول ..!
🌞 يوم جديد 🌞
فتحات عينيها لي ولاو لها منفوخين قد الطبل بالنعاس و البكى .. كتكسل و تجبد فالفراش .. صابحة فاشلة و غير الشعى د الشمش لي فيقها ..!
تكات كترمش بعينيها فالبيت و فالمرايا لي معلق فالسقف .. غالباتها الضحكة و هي كتتخيلوو مع كريمة .. واخا زوينة و طايتها عامرة كيف كيبغيو بزاف د المغاربة ..! و لكن هضرتها و عقليتها دايرينها ضحكة قدام العادي و البادي ..!
للحظة خرجات عينيها بصدمة و بالزربة حطات يديها على الشورط كتقلب فيه هو و الفراش .. و براحة تنهدات فاش ما لقاتش الفزاك ..! غمضات عينيها و مرة مرة كتنهد تا كيتهز صدرها .. لقات السكات و سهات لي خلاها تفكر فشحال من حاجة .. بحال يلا كترتب وراقها من أول و جديد حتى عيات و
بهدوء وقفات للدوش كتشوف فوجهها لي صبح عادي مزنك شوية و صافي ! بلا شفايفها لي تفلحولها شوية ..! كانت هازة الهم يزراقلها من داك التسرفيق لي خدات ..!
شريفة: ولاو عندي جووج بزولات ماشي جوج عينين ..!
باستهزاء حنات راسها كتغسل فوجهها و سنانها غير بصبعها كتحكهم بالدوا تا شمات ففمها ريحة زوينة دالنعناع عاد خرجات لعندهم لوسط الدار .. لقات أسية و ملاك حاطين الفطور كيفطرو .. جلسات قدامهم و قالت بضحيكة ..!
شريفة: صباح الخير و الرباح و رزق ربي يجيكم مفتاح و لي ما صبح عليكم ما يجيه خير ..!
ملاك: واااعرة عندك هاذي ههههه صباح النوور كي بقيتي ؟
شريفة: صافا ( شافت فأسية و باستها فحنكها بحب ) ارتاحيتي أ تاسانوو ( دوزات على شعرها ) الزعيعرة ديالي
أسية:( بابتسامة عاوداتلها البوسة ) الحمد لله .. صبحتي فرحانة هاذ النهار ..!
شريفة:( ضحكات و قالت كتشوف فالطبلة ) أنا ديييما فرحانة .. ما كايناش قهوة ؟
أنت تقرأ
عرس الذيب 🐺مكتملة🐺
Romance💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
