شغف البدر بقلم هدى كامل

الفصل الرابع

رواية شغف البدر بقلم : هدى كامل
ــــــــــــــــــــــ
فى الغردقه
بدر : عايز اشوف الكاميرات اللى قدام الكافيه
الموظف : بس ده مش مسموح يافندم لازم اذن من مدير المكان
شاف بدر المدير وقدر يشوفو الكاميرات
عاصم :  انا راجع القاهرة دلوقتي
يارا : انا مش فاهمه حاجه من اللى بيحصل هنا
سليم بضحكة : مش فاهمه ايه شغف تبقى اختك
بدر : انا جاى معاك ياعمى حمزة، غنوة جهزو شنطكم يلا
لين : انا جايه معاك يابابا
ومشى بدر وعاصم وحمزة وغنوة ولين، ومش باقى غير سليم ويارا
يارا : ايه احنا هنفضل هنا
ــــــــــــــــــــــ
فى القاهرة الباب بيخبط
ليالى : ايوة ايوة جايه اهو
اول لما فتحت الباب لقيت شغف  حضنتها وقالت :
كنتى فين كل ده كنا هنموت من الخوف عليكى
شغف : ابويا طلع عايش
أحمد : ده اللى هو ازاى يعنى
ليالى : انا مش فاهمه حاجه انتى كنتى فين الشهر اللي فات
شغف : تعالو هحكيلكم

فلاش
بعد ما شغف اترفدت من شغلها بيومين
ليالى : بت ياشغف ما تنزلى تساعدينى فى الكوافير بدل قعدتك دى
شغف : لا روحى انتى انا هنزل ادور على شغل
ليالى : طيب حضرى فطور لاحمد قبل ما تنزلى سلاموز بقا
شغف حضرت الفطور ونزلت
فضلت تلف في الشوارع تدور علي شغل في المحلات والمطاعم والكافيهات بعدين تعبت وقعدت علي الرصيف وفى واحدة راكبه عربية قالت لشغف
: لو سمحتى
شغف : انا
الست : اه
قامت شغف : نعم
الست : هو فى كافيه قريب من هنا
قبل ما شغف ترد عليها كان فى واحد نزل على دماغها بشومه وسحبها ودخلها العربية

باك

ليالى : استنى ياشغف هجيب لب
أحمد لليالى : يابنت الهبلة
احمد : طيب هو انتي اتخطفتى ليه
شغف : معرفش يا احمد بس عجنونى ضرب 😩😩
ليالى بتاكل لب : وبعدين كملى
شغف : هو انا بحكيلك حكايه ياليالى بقولك اتخطفت واضربت واتعذبت
أحمد : طيب وصلتى عن عيلة ابوكى ازاى
شغف : انا قدرت اهرب ب اعجوبة،
الراجل اللى شبة الباب اللى خطفنى ده بعد ما عدمنى العافيه سابنى مرميه فى الاوضه من غير ما يقفل عليا تقريباً كده اطمن، لانى اغمو عليا، بعدين فوقت كنا تقريباً الفجر لقيت الراجل ده نايم وبيشخر نزلت علي دماغه بنفس الشومه اللى ضربنى بيها لماخطفنى.
ليالى وهى بتف اللب : ها وبعدين كملى
شغف بغيظ منها : ضربته 4 مرات ب الشومه على دماغه
ليالى : تفتكرى لسه عايش ولا مات
شغف بخوف : ايه ده هو انا ممكن اكون قتلته
ليالى : يارب يولع انتى خايفه عليه
أحمد : بعدين ياشغف لما هربتى ما جتيش على هنا ليه
شغف : انا بعد ما ضربته اخدت مفتاح 🔑الشقة من جيبه ونزلت اجرى ،  تقريباً ماكنش في حد ساكن في العماره دى خالص، وانا بجرى جنب العمارة لقيت فاجاه  عربية نورها ضارب فى عينى ومش عارفه بعدها حصل ايه غير انى صحيت فى المستشفى والدكتور بيقول انى ليا أسبوعين هنا ووقتها مش كنت فاكره اى حاجه .
و حكت ليهم عن اللى حصل معاهم من وقت لما شافت بدر لحد مكالمه سليم وهو بيقول انه اسمها شغف عاصم مهران وانها اخته وبعدين طلعت اجرى واغمو وشوفت أحمد وطاهر لما فوقت
أحمد : طيب وابوكى ده كان فين كل السنين اللى فاتت
شغف : معرفش
ليالى : الغريب فى الموضوع ان خالتى الله يرحمها مجبتش سيرة انه عايش أبداً
شغف : معقول ماما متعرفش انه عايش
أحمد : معتقدش
ــــــــــــــــــــــ
الباب خبط وقام أحمد يفتح
أحمد : ايوة
عاصم : هى شغف ساكنه هنا
أحمد : ايوة مين حضرتكم
عاصم : انا ابوها وده ابن عمها، ممكن نتكلم معاها
أحمد : اتفضلو
عاصم اول لما شاف شغف حضنها ودمع وشغف معملتش حاجه
عاصم : ممكن نتكلم لوحدنا
ودخلو يتكلمو فى الاوضه
وبقى احمد وليالى وبدر
وليالى من وقت ما شافت بدر وهى متنحه فيه
ليالى : هو حضرتك بتمثل فى المسلسلات التركي
بدر بصلها بسخرية ومتكلمش
أحمد : قومى اعملى قهوة
ليالى : قهوتك ايه يافنان
بدر : ملهوش لازمه
أحمد : لا والله لازم
بدر : قهوة مضبوظه
ليالى لنفسها : كل حاجه فيه مضبوظه حتى قهوته
ــــــــــــــــــــــ
فى الاوضه
عاصم : انا لما اتجوزت امك وقتها اتجوزتها على مراتى وخبيت جوازى منها على اهلى ومراتى، بس اهل امك كانو عارفين
وقتها كنت واخد ليها بيت فى اسكندريه وكنت بشوفها كام يوم في الشهر اللى بكون فيهم فى اسكندرية علشان الشغل
جوزنا استمر سنتين  فى السر وبعدها اهلى ومراتى عرفتو وحاولوا يخلصو من امك، ولعو فى البيت بس ربنا ستر وقتها وامك وقتها كانت بره البيت، مش هنكر وقتها انى خوفت بس والله مع على نفسي انا خوفت على امك، امك كانت طيبة اوى وانا مشوفتش منها غير كل خير
عاصم بدموع : امك بعد اللى حصل والمشاكل اللى حصلت ليها ولاهلى طلبت انى اطلقها، عشان كده طلقتها، وامك لو كانت فضلت علي زمتى كانت هتموت مقتوله  
عاصم بصدق : بس والله  ياشغف يابنتى انا ما كنت اعرف ان امك حامل امك خبت عليا انا معرفتش غير من  فترة قريبة
شغف بدموع : لو كانت قالتلك ده كان هيغير ايه كنت هتتخلى عني زى ما تخليت عنها
عاصم : انا كنت خايف عليها وعلى اهلها انا مكنتش معاها طول الوقت كنت بسافر بره مصر كتير مكنتش هعرف احميها منهم
شغف : والمطلوب منى دلوقتي
عاصم : انا عايزك تيجى تعيشى معايا انا هعوضك عن كل اللى شوفته
شغف : وياترى هتقدر تحمينى ولا هتخاف بردو
عاصم بدموع : يابنتى انا والله عارف...
شغف بدموع : انت ايه انت عارف انا حصلى ايه السنين اللي فاتت دي كلها، انا اشتغلت كل حاجه ممكن تتخيلها اشتغلت خدمه علشان اقدر اجيب العلاج لامى، استحملت شتيمه من دى وقلة ادب من ده
شغف بدموع اكتر : طيب انت عارف يعني ايه بنت بتجرى فى نص الليل  ب امها اللى بين الحياة والموت على المستشفيات ومحدش راضى يقبلها علشان مش معاها فلوس، عارف يعني ايه افضل اتحايل علي صاحب البيت يشترى الشقه علشان اخد تامنها واعمل العمليه لامى، ويفضل يبيع ويشترى فيا، ويبقى واقف يتحرش بيا واسكت علشان ميرجعش فى كلامه، طيب عارف احساسى لما الدكتور طلع من العمليات وقالى البقاء لله وانا لوحدي، فاجاه ابقى فى الدنيا من غير اب ولا ام ولا بيت، انت مش عارف حاجه وجاى دلوقتي عايز تعوضنى، تعوضنى عن ايه بالضبط؟
حضنها وفضلو يعيطو مع بعض
عاصم بوجع : تعالى عيشى معايا يابنتى
شغف : انا مش هقدر اسيب أحمد وليالى من غيرهم معرفش كان حاصلى ايه
عاصم : ياجو معاكى
شغف : انا مش هقدر اقرر عنهم وكمان انا لسه موفقتش هفكر وارد عليك
ــــــــــــــــــــــ
فى الصاله
ليالى مش مبطله كلام
اتفتح الباب وطلعت شغف وعاصم وكان باين على اشكالهم انهم كانو بيعيطو 
بدر وهو عيونه على شغف : عمى انت كويس
عاصم بيهز راسه : انا كويس
ليالى : بت مالك هو الحاج ده قالك حاجه زعلتك
شغف : انا كويسه ياليالى مفيش حاجه
عاصم : هستنى ردك يابنتى عن اذنكم
ــــــــــــــــــــــ
بعد ما خروجو
أحمد : هو قالك ايه ياشغف
شغف : عايزنا نروح نعيش معاه
أحمد : هو يعوزنا انا وليالى ليه
شغف : أحمد انتى عايزنى اروح اعيش وسط النااس دى لوحدى، ده بيقول انهم حاولو يقتلو امى، انا هحتاجكم معايا على الاقل هكون مطمنه فى وجودكم معايا، ولا انت زهقت منى يااحمد
أحمد وهو بيحضن شغف : بطلى هبل انتى اختى يابت زى ليالى بالضبط، ده حتى بحبك اكتر من الحماره دى،
احمد بضحك : تخيلى بتقول للراجل انت بتمثل فى المسلسلات التركيه شوفتى غباء اكتر من كده
شغف من بين دموعها : ههههههههههه
ليالى : ما هو اللى قمور اوى يخرب بيت امه كان هاين عليا اقوم ابوسه من بوقه 😘
أحمد وهو بيجرى ورا ليالى :
علشان لما اقتلها محدش يلومنى.
شغف بضحك : ههههههه خلاص يااحمد انت عارف ليالى بتحب تهزر
ليالى بعد ما شافت شغف بتضحك : ربنا يخلينى ليكم وميحرمكوش منى ابدا
أحمد : ربنا ياخدك ياليالى علشان ارتاح منك من قرفك
ليالى :  ياااااارب خدنى يااااارب  على بيت حبيبى يااااااارب، النااس دى مش مقدرين قيمة ليالى صانعه البهجة والسرور 😎
ــــــــــــــــــــــ
فى فيلا عاصم
ناهد مرات عاصم : انت اتجنتت ياعاصم عايزه تجيب بنت من الشارع تعيش معانا
عاصم :  دى بنتى واللى عندى قولتله واذا مش عاجبك الباب يفوت جمل 🐪
واوعى تفتكرى انى مش عارف انك انتى اللى حاولتى تخطفيها انا ساكت بس علشان اولادك مش اكتر
ــــــــــــــــــــــ
تانى يوم فى كوافير ليالى الفرح
ليالى : هتفضلى ساكته كده ياشغف ده انا جايبكى معايا تغيرى جو
شغف : ليالى سبينى فى حالى وخليكى فى شغلك

الوليه الاولى : ايه ياليالى مش هتشيلى البتاع ده من على راسى
ليالى : لسه شويه متقلقيش على ما اعمل وش وحواجب الست اللي فى ايدى هاجى اشيلو حاضر
الولية التاني : ما براحه ياليالى  وانا وشى وجعاني اوى خفى ايدي مش كده ياحبيبتي
اليالى : خالص اهو قربت اخلص
فاجاه بتدخل ست وفى ايدها ساطور ومعاها بنتها وشها محروق وبتزعق وبتقول : يا ليالى الزفت
ليالى : ايه ياام مكة، مكة عجبت العريس
أم مكة وهى ماسكه وش مكة بتقلب فيه ناحية اليمين وشمال :
ايه اللى عملته فى وش البت ده ياليالى
ليالى : مين دى اللى معاكى ياام مكة؟
أم مكة : دى مكة بعد ما استخدمت الخلطة بتاعتك اللى قولتيلها تقعد بيها يوم كامل وبعدين تغسل وشها، ووشها هيكون منور ومورد وهتعجب العريس البت وشها اتحرق

الست اللى بتعمل شعرها :  يالهوووووووووووووى الحقينى ياليالى انا بولع ااااااااااااااااااااااااع
ليالى بخوف : يامصيبتى
وجابت طفايه الحريق وطفت شعر الست، والست فضلت تعيط وتندب على شعرها اللى اتحرق
الوليه التانيه (اللى كانت بتعمل وشها) : يخرب بيتك ياليالى انتى قطعتى وشى
ليالى بزعيق : انتى هتستهبلى ياوليه انتى جايلى وشك متقطع لوحده
شغف : هههههههههههههههههههه
ام مكة مسكت شغف وطلعتها بره الكوافير وقفلت باب الكوافير من جوه عليها وعلى ليالى وعلى الست اللى شعرها محروق والست اللى وشها متقطع
ليالى : انتو  هتتكتروا عليا ولا ايه اللى هتقرب منى هشقها نصين
شغف بره المحل سامعه صوت صراخ
شغف : حد يعمل حاجه انتو هتسبوهم يموتها جوا
محدش اتحرك وكله قاعد يتفرج، شغف رنت علي أحمد
شغف بخوف : الحقنى يااحمد هيموتو ياليالى
أحمد : مين دول
شغف بدموع : فى ستات قفلين علي ليالى باب الكوافير من جوه وفى واحده فيهم معاها ساطور
أحمد قفل فى وشها وقام يجرى
ــــــــــــــــــــــ
خلص فصلنا استنونى فى حلقة جديدة ومفاجات جديدة
عايزة  توقعتكم للاحداث الجايه
ياترى ايه اللى هيحصل ل ليالى؟  واحمد هيقدر ينقذها؟
ياترى شغف هتوافق تروح تعيش مع ابوها؟
شغف البدر بقلم الكاتبة : هدى كامل