عشوائي

الطلاق الصادق

- يا ساتر يارب، اصبحنا واصبح الملك لله
اخرج القاضي كتابه من الدرج ووضعه امام فتاه الجالس بجانبه، ليبدأ في كتابة شكاوي الناس.
- يلا، الي عليه الدور يتفضل

دخل رجل غاضب اليه
= يا سيدي القاضي الحقني ابوس ايدك
- خير اللهم اجعله خير
= انا عايز اطلق مراتي
- ودي ان شاء الله مريضه نفسيا ولا قضية شرف؟
= لا شرف يا سيدي القاضي...اصلي...اصل..
- اصل ايه؟
= اصل انا حاسس احساس كده انا الولد مش ابني
- حاسس؟ خلاص سجل يا بني، تحول على القضية الى رقم اربعتاشر (١٤)، وتكون بعنوان " انا حاسس ان الولد مش ابني"، الي بعده.

دخلت عليه امرأة تجهش وتبكي، وعلى عيونها اثار الكحل الذي من اثر بكاءها جعل عيونها كالباندا
= سيدي القاضي ( شهقه)
- خير يا بنتي مالك؟
= جوزي يا سيدي القاضي (شهقه) جوزي عايز يطلقني
- ودي بقا قضية شرف ولا مرض نفسي؟
= لا مرض نفسي يا سيدي القاضي (شهقة) قال ايه!! قال انا مجنونه، مع اني يا سيدي القاضي ( شهقة) بصحى من السبعة الصبح افطره واعمله شاي يا سيدي القاضي ( شهقة) وودي العيال على مدارسهم وارجع اشطب البيت وانضفه والمعه واحضر الغدا، وبعدين يا سيدي القاضي ( شهقة) ادرس العيال واتحمل قرفه عند الاكل فكل مره يقلي اكل امي احلا من اكلك، واشطف للعيال واغسل المواعين...

كان قد غفى القاضي اثناء كلامها وشهقاتها المتتاليه ولكنه استيقظ على مصرعيه وهي تصرخ
= وبالأخر يقلي انا مجنونه ومريضه نفسيا؟؟؟ ده كلام يتقال يا سيدي القاضي (شهقة) ده كلام؟؟!!
- لا ابدا، ابدا ولله ازاي ده يقول عليكي مجنونه ده انتِ... سوبر مجنو....قصدي ومن، ما علينا استهدي بلله واهدي.
نظر الى فتاه وقال:
- سجل يا بني، تحول القضية الى رقم خمستاشر ( ١٥) وبعنوان " متهمة بالجنون"، الي بعده

دخل رجل يظهر على وجهه علامات القلق والتوتر.

- ها قلي؟ مجنونه ولا الولد مش ابنك؟
= لا دي ولا دي يا سيدي القاضي
رفع القاضي بصره اليه، بينما ترك الفتى القلم ونظر اليه ايضا، بل ولفت انتباه كل الموجودين في القاعه لينظروا إليه، يبدو ان هناك سبب طلاقي جديد سيكسح الساحة.
- اومال ايه؟
= اصل يا سيدي القاضي...اصل..
- قول ما تخفش
= امي واخواتي مش عايزنها عشان هي حلوه واكلها حلو وبتعمل البيت حلو وهما بيغاروا منها.
بدأ يبكي ويبكي، والقاضي مصدوم من كلامه، لقد كسر هذا الزوج القواعد، وقال الحقيقة المرة التي تعاهد الجميع على كتمها.
= لاء لاء يا حبيبي اهدى، يا حسييين!!! جيب مية للاستاذ هنا يا حسيييين!!
حسين: حاضر سيادتك.
اتجه القاضي نحوه واجلسه على الكرسي، ثم وضع يده على جبينه ليتأكد ما إذا كان يعاني من سخونة، بينما جلب حسين كأس الماء، وقدمها له
- خلاص متعيطش يا حبيبي، احنا كلنا منحبك ومعاك، ولا ايه يا جدعان؟
° ايوا كلنا منحبك
° انت راجل ياض
° احنا معاك
° روح ربنا ينصرك
° منشكرك على صراحتك المعفنه
- شايف ازاي كلنا معاك
= بجد شكرا..انا مش عارف اشكركم ازاي
- لا يا حبيبي متتعبش نفسك، يلا روح ارتاح فبيتكم ولما يجي معاد القضه ابقه اقلك..
التفت القاضي الى فتاه وقال:
- سجل يا بني، القضية رقم ستاشر (١٦) وياريت تخلي العنوان، "الطلاق الصادق".

✓✓✓✓✓✓✓✓✓✓✓✓✓

ملاحظة مهمة: قد لا تتم رفع القضايا بهذا الشكل، ولكن كما وصفت سابقا هي مواقف ساخره، ويجسد هذا الفصل واقع الطلاق القائم في زمننا ومجتمعنا السائد، والذي انتشر بشكل كبير، وأغلبه لنفس الاسباب التي ذكرت.

والسلام عليكم ورحمة الله وبركاته