အဓိကဇာတ်ကောင်Shouအဖြစ်မှ ကြမ်းရမ်းတဲ့Gongဘဝသို့ : Myanmar Translation (Unicode)

Part - {72}

ပြီးတဲ့နောက် ကျွန်တော့်ဘေးကနေ အသက်ရှူသံတစ်ခု ထွက်လာတယ်။

“ကိုယ်က ဘာလဲ၊ ဘာကို ပြောချင်တာလဲ?”

“...!”

ကျွန်တော့်နားထဲ တိုးဝင်လာတဲ့ ယားကျိကျိ ခံစားချက်ကြောင့် ကျွန်တော့်ခြေလက်တွေက ကျုံ့သွားတယ်။ ရူဒယ်ရဲ့ လက်တွေက မြွေတစ်ကောင်က သူ့သားကောင်ကို ရစ်ပတ်သလိုမျိုး ကျွန်တော့်ခါးကို ရစ်ပတ်လာခဲ့ပြီး ကျွန်တော့်ကို အနောက်ကနေ တိုက်ခိုက်ခဲ့တယ်။ သူ့လက်ချောင်းတွေက ကျွန်တော့်နံရိုးတွေတစ်လျှောက် ပွတ်သပ်ကာ အပေါ်တက်လာခဲ့ပြီး တူရိယာတစ်ခုကို တီးခတ်နေတဲ့ ပုံစံဖြစ်လာတယ်။

“ဒါပေမဲ့ တစ်ခုခုကတော့ ရင်းနှီးနေတယ်။ ကိုယ်က အမြဲ အဲဒါကို အိပ်မက်လို့ တွေးနေမိပေမဲ့ အိပ်မက်လို့ ခေါ်ဖို့ရာ ထူးဆန်းတာတွေ အများကြီး ရှိနေတယ်။ နောက်ပြီး ကိုယ် မင်းကို ပထမဆုံး စမြင်လိုက်ကတည်းက ကိုယ်နဲ့မင်းက အချိန်အကြာကြီး သိလာခဲ့တဲ့လူတွေလိုမျိုး ရင်းနှီးတယ်လို့ ခံစားရတယ်။ အစတုန်းကတော့ မင်းက ကိုယ့်အကြိုက်ပုံစံမလို့ ဒီလိုဖြစ်တယ် ထင်ခဲ့တာ။”

မေးရိုးချွန်ချွန်က ကျွန်တော့်ပုခုံးပေါ် ရောက်လာတယ်။ ရွှေရောင်ဆံပင်က ကျွန်တော့်ရဲ့ ညာဖက်ပါးနဲ့ ပွတ်တိုက်လှုပ်ခတ်သွားတယ်။

“ကိုယ်တစ်လလောက် တွေးကြည့်လိုက်တော့ ကိုယ့်ကို စိတ်အနှောင့်အယှက် ပေးတဲ့ အရာတစ်ခုကို တွေ့လိုက်ရတယ်။ အဲဒါကြောင့် ကိုယ် ဟိုဟိုဒီဒီ ရှာဖွေကြည့်တော့ စိတ်ဝင်စားစရာကောင်းတဲ့ အရာတစ်ခုကို တွေ့လိုက်ရတယ်။”

“… ခင်ဗျားပြောချင်တာ ဘာလဲ?”

“မင်း သိချင်တယ်လား?”

ရူဒယ် ထိန်းချုပ်တာ ခံထားရတော့ ကျွန်တော် အတော်လေး ရင်တုန်နေတယ်။ လက်ညှိုးခပ်သွယ်သွယ် တစ်ချောင်းက ကျွန်တော့်ရင်ဘတ်ကနေ တက်လာပြီး လည်ပင်းအထိ တက်လာတယ်။ ပြီးတဲ့နောက် ရူဒယ့်ရဲ့ လက်ကြီးက ကျွန်တော့်မေးစေ့ကို ဆုပ်ကိုင်လိုက်တယ်။

“ကိုယ် မင်းကို ပြောပြရမယ်ဆိုရင် မင်း ဘာပြန်လုပ်ပေးမလဲ?”