حنين

بارت ١٧

تجمعوا على الطبلة كياكلو مرة مرة كيدويو حتا جبدات حادة الموضوع للي جابد الصداع ..
حطات كاس ديال اتاي : اوا يا وليدي طالبين ضيف الله مرتك بالعذر الله افك وحايلها على خير جيت نبقا معاكم انا و خوك الصغير و نيت نعاونها حتا يطلق ربي سراحها و سراحنا .. هاد التيلاد حلمنا بيه ايام و ليالي و شهور .. متكمل فرحتي و فرحتك حتا نهزوه فيدينا ..

شاف فيها محسن و بجدية قال : لواه امي الدار دارك و نتي حق ليا فيها قبل مني و مراتي بنتك حق ليك فيها قبل مني .. كلسي شحال ما بغيتي و ديري للي جاك على بالك بصحتك .. (باس اديها) الله اطول فعمرك ..

حادة بإفتخار : آمين يا ولدي العزيز (بنص عين كتشوف فعروستها للي ساكتة) اوا يا ثريا شحال عندك غا باش نشد حساب كلستي معاكم ..

قاطعها محسن مقروص : اش هاد الهضرة الى غا غير تولد سيري من دابا .. نتي هي البركة نعلي الشيطان

حادة بخجل مصطنع : اوا سمحولي جيت بلا منعلم

ثريا هزات عينيها متلاقات غا بالقرطاس ديال محسن و كيحرك فمو زعما دوي ملقات مدير من غير الواجب : مرحبا بيك اخالتي الدار دارك

حادة بعينين لعوبين : مقلتيش الكذوب الدار داري هههههههه اوا مكلتيش ليا شحال عندك !

ثريا بغير نفس : شهراين و شويا تقربا و نص

شافت حادة بنص عين فولدها و ضربات على كتفو : معليكش ضربتي دقة صحيحة

محسن بحرج : الواليدة ..

حادة على نفس الوضعية : راجل راجل .. واخا تعطلتو علينا شويا بالحق معلش الغلط ماشي ديالك (شافت فولدها الثاني) اجي تاكل اولدي مالك كالس بعيد
معاد قاد كلستو كيحك نيفو بالخف : انا كناكل ..

محسن : اوا اصاط فين وصلتي

حادة مجاوبة بلاصتو : هاد الساعة جا حتا هو اكلس معانا اضبر على خدمة اعاون بيها راسو و ها دار خوه ارتاح فيها

محسن ممرحبش للفكرة بالحق مجاتش ارفض : اييه اكون غا راجل ميخصو خير

.. فوسط هاد المعمعة كاملة ثريا للي من صباح بيناتهم فحال شي كرة ديال التنس و هوما راكيطات واحد كيلوحها عند لاخر .. كيخططو و اقادو و هي ولا كسر ..
محسن غا كياخد قرارات من راسو بلا ميدير ليها اعتبار كشريكة حياتو و نصفو الثاني .. بالأعصاب حتا داك اتاي للي شربات حساتو كيف السم ناض عليها خاطرها و ناضت من حداهم ترد ..

حادة بنص عين : واييلي على البهلان ..

محسن بجدية : مي ديري بوجهي و حاولي عليها .. ماقلت اتزادو عندي وليدات حتا كنت انتصطى .. الولادة الأولى صعيبة على كلشي .. انا و رجليا فاشلين حاساك هي للي حاملة

- حانية عينيها فحال للي مقلقة : لاش كتوصيني ؟ انا خايبة تا لديك الدرجة ! مكثيقش فميمتك للي رباتك و طلعاتك راجل ها ؟ (بدات كتقطر دميعات) هادا خيري هاااادااا خيري ربي و قري و وكل و شرب ..