حنين

بارت ٤١

واقفين كيهضروا كل مرة كيبارك ليها شي حد وهي كتجاوبوا بالصواب و السؤال على الأحوال و العائلة .. لابسة كسوة فالبيض طويلة و بنفس الطالون بعدما حيدات التكشيطة و حيدات ذهب دايرة حلقات من من النقرة مرصعين بحجيرات صغار جات قمة من الرقة .. هازة رغد فدراعها حتا هي جابوها من الأول لابسا البيض مزاحما معاها عليه و ملاهية مع حلقاتها جاوها على كانتها و مخلياها حتا هي على خاطرها .. و من بعيد منظرهم ديال ام و بنتها ..

مشا للي واقف معاها حتا جات عندها نادية متقدمة لعندها جايبة هديتها هي و بإسم منعم .. عارفة ماشي الصواب هادا و ماشي من مقامهم ..
نادية سلمات عليها راضية على اختياروا : حنين بنتي .. سمحيلنا عيسى غفلنا و هادي ماشي مجيتنا و ماشي تكبيرتنا ليك (حنات عينيها لبواطة حمرة فاتحتها جابدة من وسطها براصلي د الذهب عصري خدات اديها كتلبسو ليها) هذا مني و من عمك منعم .. الله اجعلوا فتوح الرزق عليك و اجعلك علينا باب الأفراح يا ربي ..

شافتو حنين برضا كبير ... براصلي ديال الذهب و مزال كتعتاذر .. نزلات باسها فحنكها و شافت فيها بضيحة كيبانو سنيناتها المستفين .. و رغد مبلقا عينيها فيهم كتهضر قالك تا هي
- شكرا احماتي ههههههههه

- ضحكات لكلمة "حماتي" : حسن عوانك كيعاودوا عليا صعيبة .. حماتك قاسحة ..

حنين : تصعابي حتا تعياي انا عندي كي العسل ..

جات لمياء و حنان كيهضرو معاها خلاتهم غادا حتا شافت بنتها واقفة مع راجلها .. غادا لعندهم بقا فيها الحال للي من داك النهار مقاطعة لغاها ..
شافها محسن جاية بتاسم ليها .. كيحرك فمو كيدوي .. ثواني حتا وقفات عليهم .. شافتها ثريا هي تكحاز حداه مهبطة يديها شادة فالفيست من ورا ضهروا بصباعها ..
- سلام ولدي محسن لاباس ؟

محسن : ربي اخليك و نتي ؟

نادية : حمد لله اسول فيك الخير اولدي (قلبات راسها لبنتها) و نتي ا ثريا لاباس ؟

حانية عينيها مكتشوفش فيها : حمد لله ..

- كتحرك راسها : الحمد لله الحمد لله (معرفاتش كي تبدا الهضرة هي دخل نيشان) كنصونيليك مكاتجاوبيش !

سكتات معرفات متقول ..

كملات نادية : مبقيتيش كدوي معايا ؟؟ مم !! ماماك زعما .. هادي هي ربي و كبر و قري ..

شاف محسن لا الجو مناسب لا الوقيتة مناسبة .. متدخل حابس القاضية
- كون تخرجوا على برا الجردة واسعة مافيها حد .. خودوا راحتكم ! حدانا الناس .. (كحاز حاني جيهت ثريا كيهضر بشويا) هاني غا هنا .. سيري دوي معاها را ماماك ..

شافت فيهم و خرجات نادية هي الأولى .. فالاخير عندو الحق و هادي ماشي بلاصة ديال الكلام .. ضربات الدورة فبليصة خاوية سايناتها حتا خرجات ثريا تابعاها حاضية جنابها ..
وقفات مربعة اديها كتشوف فيها بتعالي من فوق نيفها : او اش درنا أ المرضية !؟