حنين

بارت ٤٣

داز نهار زوين عند الكل و جاو وراها ايام اخرى مرة اتلاقاو برا الخدمة و مرة اتلاقاو فالخدمة .. زواجهم عرف بيه الكل .. للي تلاقا بيه راشد اقولهالو و شي اقولها لشي حتا صيتهم و لا معروف عند الكل .. نهار اللول تجمعوا فالباب دخل فرحان كيصفروا ليه فرحان ضارب دورة و ناشطين معاه .. داير ليهم لومبيونص .. مفروحين بيناتهم السيد لقاوه طاير بالفرحة مفروح ..

لا هو لا حنين و لو ليام كيديوزو .. كل مرة خارج ليهم واحد كيبارك لا من الأطقم الطبية لا من المساعدين فالمجالات الأخرى بعد المرات حتا من المرضى و عاءلاتهم ..

كتمشى فالكولوار كتهضر مع نادية للي بالفرحات عليها تجي تختار و تعاون .. تواعدو فالويكاند تجي نيت بعدما تكمل الصباغة .. كلها فرحة بإختيار ولدها و بيها عن نفسها للي خلاتو ادير ما بغا ..
اما عن ثريا للي فدارها بعدما كملات الفورماصيون من شحال معرفات لاباش تبدا و لا باش تسالي .. الدار طلعاتليها فراسها و راجلها خلصتو كافياهم .. الرزيق للي كيشيط كيجمعوه لدواير الزمان .. زيد كريدي ديال الدار معندها متقول هاد الساعة و لا تزاحموا بطلباتها .. عقل ادي و عقل اجيب حتا صونات عليها حنين طالباها تعاونها فالفراش و مكان ليها الا تعتاذر هاد الساعة راجلها مزير بالخدمة .. تفهماتها و واعداتها لا كانت عندها شي وقيتة و تجي ..

قاطعات منها غادا لبيروها حتا شافتو جاي بطابليتو لعندها .. حنات عينيها و بخدود خجولين .. المعقول و الصح بدا كيدخل معاها و لكن ديما كاين داك الحاجز ديال الخجل و الغربة حاضرين .. تلقاو عند الباب فتح ليها الباب متقدماه داخل من موراها ..
- كيشوف فالبيرو : تغذيتي ؟

حطات للي فيديها : لا باقي !

انا نسبقك لتحت نمشيو ناكلوا فيا الجوع ..

شافتو مشا ضاير هي تعيطلوا ..
- عيسى .. اجي تغذا جبت معايا من الدار .. (شيراتلو للبلاصة) كلس را جبت ليك حتا نتا (نزلات كتجبد من للتحت جوج صيكان ديال الغدا للي كيقبطوا الحرارة مخبياهم) كنت كنقول نسالي ندوز عندك ساعة سبقتيني (هزات راسها فيه كتفرنس من تحت البيرو شعرها رجع كلوا القدام حيت كانت محنية) ياكما ضربت ليك بروكرامك فالزيرو ؟

كلس كيف قالت ليه حاضي حركاتها "كيبغيها ؟" .. لا موحال .. امكن كثر من "كيعشقها" .. زواجو من كوثر و لو حدو العام عمروا مذاق طيابها و لا وجداتليه شي حاجة للخدمة و لو هي كالسة و هو خدام .. امكن عاد عرف شنو هو الزواج و شنو هو الشخص المناسب للي راد ليك البال ..
حرك راسو بنفي مبشوووور خاطرو مفاجي منظرها كيضحك : لا لا .. هههه بالعكس كنت بغيت ندوز معاك وقيت ..

وقفات كتقاد حالتها بخجل من كلامو واخا معندها كسار فحالتها .. باراكا غا اول مرة اعرفو بعضياتهم شافها مجرتلة : ربي اخليك ..

جابت دوك جوج صيكان فتحاتهم بدات كتحط قدامو لي بواط .. جابت بواط ديال كلينيكس برشاقة قدامو كي الحمامة كتحرك .. خدات جوج فرشاتهم حاطة عليهم معلقة و فرشيطة .. فرشات قداموا كلشي و جات نوبتها كتخرج نفس الحاجة .. ساينها حتا سالات هي تشوف فيه ..
- طانزة عليه : فتح البواطات كول هههه خفتي نقت*لك ! .. متخافش خللي دوز نهار د الحنة و ديك الساعة نشوف شنو ندير ..