حنين

بارت ٥٩

- حنين : و حتا انا .. عارف شنو فخاطري و مكنعرفش نعبر .. سمحلي على للي فات .. غلطت و غلطي كبير .. شكرا بزاف بسبابك انا هنا و بفضلك بعد ربي اولا للي زرع فيا صخر ثبت روحي و كتب عليا مكاتب الخير .. (حطات راسها على صدرو كيف كدير) سمحلي اعيسى .. ثيق فيا من جديد عقاك مبغيتش يكون الفراغ بيناتنا و لو رجعنا مجموعين ..

حط يديو على راسها باسو : مسامحك .. المهم رجعتيلي و الثقة ثايق فيك متخمميش عافاك .. حنين ! نساي قصدك فاهموا و واصلني معلش ..

هزات راسها فيه و دموعها باقي كيقطرو من عينيها من الجناب .. حتا خدا صباعو كيمسح و كيحدّهم .. حتا تحنا عندها بايس ليها شفرانها المميهين ..
- الله اجعلهم آخر الأحزان

- بضحيكة خفيفة : آمين (دخلات معنقاه) سبوع صخر اش غنديرو فيه ؟

- طانز : ههههههه تخرجي تقضاي ؟ .. (شاف فيها حركات راسها بلا) الواليد و عمي مصطفى خليتهم بداو فتوجاد على الدبيحة و الفقهى للي غيجيو .. هاد الساعة غنديرو نهار د ابيحة و الغدا ديالكم نتوما العيالات و الليل الرجال .. واخا غنتعذبو و لكن معلش نخرجو تمارة دقة وحدة ..

- واخا حتا هذاك كلام .. متنساش تفكرني نعيط لخولة كتقيل تسول فيا ..

- واخا اعمري طلباتك أوامر ..
..........

‏"الرزق أنواع ، أعظمها شريكاً حنوناً طيباً ، إذا مالت الدُنيا لا يميل ."

.........

الليلة بعدما نطوايا ليها الجرحة مخرج منها لاكريس للي ولا قليل و هذا دليل على شفائها كيلصق ليها السباردرة من جديد حتا تحنى من جديد بايس ليها حداها .. امكن هدا دليل على كونو ممنون للي جابت طرف منهم و العذاب للي تعدبات و لحمها للي تقطع .. طلعات معاها الرعدة هي للي متكية دايرة يديها على عينيها حتا حيداتهم شافتو كيتصرف عادي مهبط ليها بوديها .. كان تصرف عفوي مموراه حتا شي دلالة .. من غير الإمتنان ..
طبيعة الحال ..

تهز من عليها هاز اللصقات و للي حيد ليها راميه فبوبيل صغيرة حدا الباب و رجع تكى حداها .. ضارت عندو على جنبها كتشوف فيه كيطل على تيليفونو .. حتا خطو داخل رامي عليها الغطا مفششها كيفما كان دايما .. و هاد المرة بلاصة ميباذر اجبدها لعندو .. كانت هي للي جابداه لعندها مدخلاه فصدرها بلا كلمة بلا جوج .. و حدما الامور مهدنة عايشين اللحظة بلحضتها .. صدر حنون فيه مشاعر الأمومة فياضة و ريحتها الطبيعية فايحة .. معنقاه عندها مدوزة صباعها الطوال ففروة راسو و بخفة و حنان على بشرتو القمحية .. بدوروا هو لايح يدو على ظهرها مغمض عينيه ..
دقيقة و جوج حتا مشات بيه عينيه هو الأول .. كان عيان و عرفاتو عيان غا مكابر ..
خليه هاد المرة اسبق هو .. معلش .. خليها هاد المرة هي للي تعطيه بلاصة مريحة لهاد ليلة انعس فيها ..

البيبي الجديد ما شاء الله ممحنهمش رغم انه كيفيق حتا لجوج د المرات فالليل و فالصباح انعس و افيق .. فيوماين رصاو راسهم و مولفين بلانو مرة هي و مرة هو متفاهمين واخدين خبرة من رغد .. و حياتهم كي العسل باديين من جديد .. كيولفوا بعضياتهم تاني واخا مكانش فرق كبير .. و لو المدة للي غابت فيها عليهم داز طويلة ..