رحلة الى اليابان (كرونيك جزائريه)

الحقيبة

اليابان :
لينا فرغلي ، جزائريه 27 سنه ، متوسطه الطول ، خمريه ، عينين كحولا شعر صابغاتو ذهبي داكن مموج  . تلبس ستيل كاجوال بودي وسروال فالبيج . فاست سبورتيف في لخضر وذراعتيها فالبيج . كونفرس كحله .

قادر تشوفها كاي بنت عاديه لاكن لا ، ماكان حتى حاجه عاديه في لينا .
جبدت بوغتابلها ، ايفون احدث موديل وربما شكلها العادي وغير المتكلف وحتى طباعها الغير مغرورة ، مايوحيش بانها تملك هذا النوع من الهواتف .
: حقيبه من الفضة  ، جيبيها واخرجي .
هذا كان الميساج . حطت البوغتابل في جيبها ودخلت للقطار ، القطار الرصاصه اسرع قطار في اليابان .
مشات داخل القطار وفي طريقها جازت على زوج رجال ،
هاذو الزوج كانو مقابلين شاب ، جاي روجي وعينيه ماغو وباين عليه سكايري ويضرب الكاشيات من خزرتو
الاول كان وسيم ، شعرو اصهب  فونسي  ومطولو شويه لرقبتو ، لابس الحطة كوستيم فلزرق : انا تانجرين . قالو واشر للي قدامو.
_ وانا ليمون ، ليمون كان كحلوش سمين وقصير شويه على تانجرين لابس سبورتيف فالاصفر شغل صح ليمونه .
الروجي حكم الضحكة : شغل فواكه.
وهوما ماضحكوش بقاو سيريو .
_ اسمع مليح ، جاتنا مهمه من عند باباك نرجعوك عايش للدار وراهي معانا حقيبة الدراهم .
_ وكون نقلكم مارانيش حاب نرجع لبابا.
_ خلصنا كثر منو ومانرجعوكش . قالو تانجرين ببساطه .
قلب الولد عينيه مستحيل يكون عندو كامل هاذوك الدراهم : هربت من بابا وفضلت نعيش فقير على امتلاك الملايير معاه.
ليمون : اسكت ، عندنا قصه افضل .
وبداو يحكيولو كيفاش نقذوه من ذيك العصابه بواحد الحماس وشحال قتلو من شخص . تانجرين قال ١١ و ليمون قال ١٠ . وهكا بقى يخزر بينهم وكاره حياتو .
اومبعد تانجرين سكت كشغل فاق : اصبر ، وين راهي الحقيبه .
: مع الحقائب ،جاوبو ليمون ولمع القرط الذهبي في وذنو .
تانجرين شد راسو : راك حاب تهبلني .
_ علاش واشبيك.
ضرب الطابله : كيفاش هاذي مع الحقائب انت في بالك حقيبه نتاع دراهم تلوحها مع الحقائب الاخرى .
_ ايه وشفيها .
_ اوكي اقعد هنا نروح نشوفها .
تانجرين ناض مديرونجي طويل والكور مخدوم الله يبارك، قاعد يعدل في حوايجو . حتى لحق لمكان الحقائب ، دخل بقى يحوس يحوس مالقاهاش .
💙💙💙💙💙💙💙💙💙💙💙
💙 بطلتنا لينا فرغلي

ستايل لينا

لينا لو كانت انمي او كرتون