رمضان جانا 🌛(مكتملة)

الفصل الاول: (رمضان كريم)

كل سنة و انتم طيبين يا حبايبي بحلول شهر رمضان المبارك، اعاده الله عليناو عليكم بالخير❤️

هَلّت أيام رمضان فـ يارب طهر قلوبنا و نقِّ سرائرنا، و بلغنا جمال لحظاته❤️🌛

~~~~~~~~~~~~~~

قال تعالى {شَهْرُ رَمَضَانَ الَّذِى أُنزِلَ فِيهِ القُرْءَانُ هُدًى لِّلنَّاسِ وَ بَيِّنَـٰتٍ مِنَ الْهُدَىٰ وَ الْفُرقَانِ فَمَن شَهِدَ مِنكُمُ الشَّهْرَ فَلْيَصُمْهُ وَ مَن كَانَ مَرِيضًا أَو عَلَىٰ سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللَّهُ بِكُمُ الْيُسْرَ وَ لَا يُرِيدُ بِكُمُ الْعُسْرَ وَ لِتُكمِلُوا الْعِدَّةَ وَ لِتُكَبِّرُوا اللَّهَ عَلَىٰ مَا هَدَىـكُمْ وَ لَعَلَّكُم تَشْكُرُونَ}
[سورة البقرة:١٨٥]

~~~~~~~~~~~~~~

كان يجلس وسط عائلته يتناول سحور ليلة أول يوم في الشهر الكريم فتحدث "مروان" و هو يتناول لقمة عيش بالجبنة :
_يارب بس باقي الشهر منفضلش نتسحر فول و جبنة، جددوا شوية مش كل سنة كدة.

تدخلت والدته "مرفت" في الحديث تقول بسخرية :
_حوش الواد اللي جاي من التجمع و مش عاجبه عيشيتنا، هو ده سحور أمة لا إله إلا الله، و بعدين ما هو في جبن و بيض و بطاطس كل ده مش عاجبك؟!

كاد يتحدث لكن قاطعه والده "محمد" بقوله :
_انا اللي اعرفه الشخص المعترض على حاجة ده مبياكلش منها، إلا الشحط ده بيعترض و هو بياكل عادي و مش لاحق ياخد نفسه حتى!

ضحك عليه باقي أفراد أسرته بعد حديث والده حتى شاركهم في الضحك هو أيضًا.

~~~~~~~~~~~~~~

بعد نصف ساعة تناولت فيها الأسرة السحور و أعدت والدتهم الشاي، تحدثت الابنة الصغيرة لهذه العائلة و هي "مروة" :
_كل سنة و انتوا طيبين يا جماعة.

أجابها الجميع بحب فتحدثت شقيقتها الكُبرى و هي "منة" تقول :
_طبعًا كلنا عارفين إن شهر رمضان للعبادة، مش للدراسة صح؟.

وافقها جميع إخوتها عدا والديها، فتحدث والدها "محمد" و هو يقول بتهكم :
_و أنتِ من امتى بتذاكري في رمضان يا ست منة؟

ابتسمت له ابتسامة بلهاء و نظرت لشقيقها الكبير "مروان" حتى ينقذها من هذا الموقف، فنظر لها يطمئنا :
_منة مش قصدها يا بابا انت عارف انها مبتذاكرش اصلا يعني مجتش على الشهر ده.

نظرت له بشر فضحك عليها هو و شقيقتهما الصغرى فقالت "مروة" :
_انا المفروض اللي مذاكرش في الشهر ده عادي انا كفاية عليا الدروس اللي مضيعة وقتي دي.

تدخلت والدتهم "مرفت" تقول باستنكار :
_و وقتك ضايع في ايه بقى يا حلوة طالما مش بتذاكري، تكونيش بتشتغلي و انا مش واخدة بالي!.