နဂါးမင်းသား၏ကံကြမ္မာ

၉၉

နဂါးမင်းသားရဲ့ကံကြမ္မာ
စာစဉ်(၈)

အပိုင်း(၉၉) ချီဘုရင်ကမြို့အား စစ်တပ်ဖြင့်ဝိုင်းရံခြင်း

ဝုန်း...

ထိုအခိုက်အတန့်မှာ မြေကွက်လပ်တစ်ခုလုံး တုန်ခါသွားခဲ့ရသည်။

နက်ရွှေရောင်မူလချီတစ်ခုက ဇူယွမ်ရဲ့ခန္ဓာကိုယ်ပတ်လည်မှာ လှည့်ပတ်နေလျက်ရှိပေသည်။ ထိုမူလချီထဲမှာ ကြီးမားသည့်ရွှေရောင်စပါးအုံးမြွေတစ်ကောင်ရဲ့ပုံရိပ်က ကောင်းကင်သို့ကြည့်၍မြည်တွန်နေသည်ကို မြင်နိုင်ရုံမျှသာရှိသကဲ့သို့ ဇူယွမ်ရဲ့ခန္ဓာကိုယ်ထံမှလည်း အံ့အားသင့်စရာကောင်းသည့်ဖိအားတစ်ခု ဖြန့်ကျက်ထွက်ပေါ်လာခဲ့သည်။

ခွပ်...

နက်ရွှေရောင်မူလချီထံမှ ဒီဖိအားထွက်ပေါ်လာမှုက ကျောက်တုံးအိမ်လေးပေါ်မှာ ကြီးမားတဲ့အက်ကွဲကြောင်းတွေကို ဖြစ်ပေါ်လာစေခဲ့သည်။

ထိုဖိအားက အချိန်အနည်းငယ်ကြာ ဆက်လက်တည်ရှိခဲ့ပြီးနောက်မှာမှ တဖြည်းဖြည်းလွင့်ပါးပျောက်ကွယ်သွားခဲ့သည်။ ဇူယွမ်ကသူ့ရဲ့ခေါင်းကိုဖြည်းညှင်းစွာငုံ့ချလိုက်ပြီး သူ့ရဲ့လက်ဝါးကိုမျက်တောက်မခတ်တမ်း စိုက်ကြည့်နေခဲ့မိသလို လက်ရှိအချိန်မှာ သူ့ရဲ့ခန္ဓာကိုယ်အတွင်း၌လည်း စွမ်းအားတွေတစ်ဟုန်ထိုးမြင့်တက်လာခဲ့သည်ကို ခံစားမိလိုက်သည်။

ဒီစွမ်းအားတွေက ယခင်ကထက်စာလျှင် မနှိုင်းယှဉ်သာအောင် မြင့်မားလှပေသည်။

ထို့နောက်မှာ သူရဲ့အတွေးတစ်ခုက သူ့ရဲ့ချီပင်လယ်အတွင်းရောက်ရှိသွားခဲ့ရပြီး မူလကကြည်လင်သန့်စင်လှသည့်မူလချီတွေက အခုအချိန်မှာ နက်ရွှေရောင်မူလချီအဖြစ်သို့ အလုံးစုံပြောင်းလဲသွားသည်ကို မြင်လိုက်ရသည်။ ထိုနက်ရွှေရောင်မူလချီတွေက သူ့ရဲ့ချီပင်လယ်အတွင်းမှာ စီးဆင်းနေသကဲ့သို့ ရွှေရောင်စပါးအုံးမြွေရဲ့အရိပ်ကိုလည်း မြင်တွေ့နေရပေသည်။

သူ့ရဲ့သွေးနီရောင်ချီပင်လယ်က အလင်းရောင်တွေထုတ်လွှတ်နေကာ နက်ရွှေရောင်မူလချီတွေကို အဆက်မပြတ်သန့်စင်ပေးနေလျက်ရှိသည်။