وعكة حب

الحلقة الثالثة

وعكة حب

برايسيسا

الفصل الأول : قلوب قاحلة

عاد رد البال لشنو لابسة ولكتفها و لدرعااانها العريانين.. هز حاجبو و ملامحو ضياقو.. كايشوف موراه فالدرب ياكما دايز شي حد و شافها.. و بالخف رجع دخل دافع الباب و سدو موراه متكي عليه بظهرو..

هبة : مالك مافرحانش هه.. (تعلات و جرات ليه حنيكاتو) واش لي عندو أنا فالعائلة يتقلق.. ؟ هممم!!

مد يديه و شد ليها فيديها منزلهم.. حيت ملمس يديها فحناكو دغدغو ليه مشاعرو كثر و خلاوه يحس بمشاعر كثيرة مكاتتناسبش مع مع مشاعرها و نيتها.. كمثلا أنو يقرب من وجهها كثر و يجرها لعندو يقبل شفايفها.. غمض عينيه مزير على يدو لي شادين فيديها و قال : عاد فايقة !!

هبة : هاااء !! (جرات يدها لعندها و طلعات فتلاتة الدرجات باش تبان شوية طويلة قدامو) و هادا سؤال كايتسول!؟

يزيد : كنت فلافاك اليوم و الناس بداو كايقراو..

هبة : كي شتي دابااااا إس 1 و إس 2 كاتفاليدااااا بووووووحدها من عند الله.. و اس 3 تاااااا هيااااا كاتفاليدااااا لراااااسها..

يزيد : (كايضور فراسو) كوليني بهاد الهضرة..

هبة : ففف.. وصاااافي تا نتا لي بغا يربح العام طويييل.. (غمزاتو) اااخ أولد عمي كون كنتي شكلاط اش ندير ليك معا نتا طويل يسالي العام و ماتساليش نتا ههههه (تسدو عينيها كاضحك على هضرتها و هي كاتتخايلها بصح)..

وهو بلع ريقو كايحاول يشتت أفكارو واخا صعيب.. من صغرو و هبة هي أول صديقة ليه.. أول صديقة تعجبو و فكرة أنها من العائلة يعني غاتبقا قريبة منو.. لكن و مع ذلك مكانش كتاب مفتوح ليها كيفما خلاها العكس.. هي لي تكون كتاب مفتووووح.. بحكم مكانش باغي يعادي شي حد بالكآبة لي عاشها فحياتو و بأفكارو السوداء على راسو.. و فنفس الوقت مكانش قادر يحبس دوك المشاعر لي كايقواو كثر من جهتها.. سوا كانت بعيدة قريبة مصالحين مخاصمين مضاربين.. حبو ليهاااا كايزييييد بلا ماينقص.. تا ولا حاس أن حبو ليها بوحدو قادر يقتلو كثر من هاد القنبلة الموقوتة لي فقلبو..

مد يدو و دوزها ورا عنقها.. و بسرعة خطف داك الفيليل دالشعر مخلي شعرها يتطلق مغطي ليها النص من ضهرها العريان..

هبة : ععع!! طلق ليا الفيليل آش درتي!! (مدات يدها كاتحاول تشدو)

يزيد : كانظن فداك البلاكار لي عندك ضروري تلقاي شي حاجة مستورة تلبسيها.. !؟ نو!!

هبة : ففف تا نتاااا ماتزيييدش فيييه!!!.. طلق.. !!

يزيد : (هزها الفوق بيدو معليها وعلى شفايفو ابتسامة خفيفة و طلع مخليها موراه تابعاه كاتغوت عليه) شششش..