كى عام وانتم بألف خير وسعادة
ويارب يعود علينا وعليكم الايام بخير 🌹❤🌹❤
من احب الاعمال لقلبي وده لسببين الأول أنه حقيقي وواقعي والثاني أنه من بدايات أعمالي واللي محبتش اغير فيه علشان افتكر دائما بداياتي واعرف أقيم أدائي وتطوري واتمنى ان البدايات تعجبكم ويعكجبكم باقي أعمالي ❣️❣️❣️
اسكريبت #خريف_العمر
#لولي_سامي
اعتادت مؤخرا على التحدث مع جروب من أصدقاء الفيس فقد تعرفت عليهم من خلال كورس اون لاين بسبب جائحة كورونا ولولا هذه الجائحة ما كانت أقدمت على مثل هذه الدورة فكل معتقداتها أنها لابد أن تجلس وتستمع جيدا للمحاضر وتحضر الدورة في مواعيد منتظمة كما كانت تفعل بكل دورة تدخل بها ولكن في هذه الظروف تغيرت كل معتقداتها كما تغير كل شئ حولنا وفي العالم أجمع
وفي يوم
ومن خلال نقاشتهم حول مشروع الاسبوع تطرق الحديث الي بعض الأسئلة الشخصية للتعرف أكثر على بعضهم البعض وخلق روح جميلة تساعدهم على تخطي مرحلة الانعزال وعدم الخروج بسبب تفشي المرض
سماح/بصوا يا بنات عايزين نتعرف اكتر على بعض احنا بتدخل نناقش الموضوع وازاي ننفذه ونقفل انا عن نفسي اسمي سماح ٢٣ سنة معايا ليسانس اداب مكتبات ومعايا زيزو ابني هااا عرفوني عليكم
مروة/انا مروة عكس عمرك يا جميل ٣٢ سنة 😂ومعايا بنتين ميار ومي وليسانس حقوق يعني اي خناقة انا موجوده يا بنات ومتخفوش هفكها علشان قاعدة في البيت اصلا 😅😅😅
تقي /انا تقي بصوا مش هقول عمر علشان شكلكم كلكم صغيرين
جودي/انا جودي في ثانية ثانوي يعني ١٧ سنة ومش هقولكم على الانجاز اللي في حياتي لأن دخولي ثانوي ده لوحده إنجاز😭😭😭
لبني/وانا كمان ثالثة ثانوي وبشارك جودي إنجازها الرهيب واقولها نحن السابقون وانتم اللاحقون 😂😂😂
بس يا تقي ليه مش عايزة تقولي سنك انا شايفة أن السن عبارة عن ارقام لكن مش دليل على عمرنا
تقي / بصي يا جودي شكلك لسه صغيرة علشان كدة بتقولي كدة
هناء/انا طبعا ابلتكم هناء اداب انجليزي عارفين طبعا علشان بترجملكوا الاسئله 😂😂😂
بصي يا تقي انا معرفش انتي كام سنة بس انا ٤٥ وبشتغل وبحاول اطور نفسي ومقتنعة فعلا باللي لبني بتقوله برغم أنها صغيرة بس حقيقي أصابت.
يعني لو انا بصيت لعمري مش هدخل دورة وأحاول أطور من نفسي هقول خلاص كبرت واتعلمت واشتغلت بس مادام روحي طموحة وحابة اتعلم تاني واندمج وسط ناس جديده واتعرف عليهم يبقي قلبي لسه في شبابه.
تقي / معاكي يا هناء بس المشكلة اني وصلت لمرحلة نفسي اعمل بس مش قادرة أو مش لاحقه بالرغم اني وانا صغيره كنت برضه حاجات كتير ببقي نفسي اعملها وكنت بأجلها واقول بعدين لما أكبر شوية أو لما اخلص تعليمي
وحاليا ولا لحقت اعمل اللي كان نفسي فيه ولا قادرة دلوقتي اعمل حاجه يا اما علشان اللي نفسي فيه اصغر من سني ، يا اما علشان معنديش الصحة زي الاول ولا الوقت ولا الشغف زي زمان.
عايزة اقول للبنات الصغيرين انتوا صح اعملوا اللي نفسكوا فيه في الوقت اللي يجي علي بالكم مادام صح ، مادام مش مخالف لدينا ولا عادتنا يبقى ليه لأ ؟
متأجلوش حاجه نفسكوا فيها علشان متندموش هيجي الوقت اللي تقولوا ياريتني عملت أو هتحاولي تعملي بس مش هيناسب عمرك
فاطمة /ااااايه يا ست الحاجه انا لسه داخلة وقريت اللي كتباه حسستيني انك عندك ٧٠ سنة بالرغم انك من اول الدورة وانتي بتهزري وتضحكي وتتريقي وكنت فاكراكي بنت ١٨ من كتر الهيافة اللي فيها 😂😂😂😂
اوعي تكوني زعلتي انا ٥٠ سنة احساسي بيقول اني اكبر منك بس كلامك بيقول تخلفيني 😂😂😂😂
تقي/ 😂😂😂😂😂ضحكتيني يا فاطمة 😂😂😂😂 لا مش اكبر منك
فاطمة / كماااان طب مانتي حلوة اهو
تقي / انا بس موضوع السن بيوترني شوية علشان زي ما قولت كان نفسي في حاجات اعملها وملحقتش ومش ده وقتها
لبني/طب مش انتي بتاخدي الكورس معانا وبتهزري وتتكلمي مع الكبير والصغير وبتقبلي الكلام كمان بكل حب ومن ساعة ما بدأت الدورة وانا حساكي قدنا والله انا شايفاكي بنت قدي ، ومحستش خالص انك اكبر مننا .
هناء/ بصي يا تقي انتي روحك صغيرة وقلبك صغير ولسه عندك شغف للتعليم يبقي اللي عندك ده مش عجز ولا كبر سن.
ده ممكن يكون شوية اكتئاب من الظروف بقي أو من كورونا الله اعلم المهم أنه اكتئاب مبروووك عليكي😂😂😂
تقي / خلاص يا بنات حقكوا عليا 🙈🙈🙈
انا تقي ٤٠ سنة ومعايا ٣ اولاد الكبير قدك يا جودي استريحتوا كدة
البنات كلهم صوتوا وبعتوا ايموشن يعبر عن الضيقة😬😡🤬
فاطمة / يعني كل ده وتطلعي ٤٠ سنة ومش عارفه نفسي في ايه والعمر راح يا شيخة دانا قولت البنت بتودع😂😂😂
هناء/لا بجد انتي بتستعبطي ايه اللي ملحقتيش تعمليه لحقتي تضفري شعرك طيب😡😡😡😡
تقي/ ضحكتوني والله في ايه مالكم
فاطمة / مالنا لا مفيش يا حبي بس يا بنات الليلة عند الاخت تقي كبيرتنا هتعمل مشروع الاسبوع ده وهتدخل تشرحلنا النقط الواقعة منا ها.....حد عايز يتقل عليها في حاجة تاني؟
بس قبل اي حاجة لازم تقر وتعترف كان نفسها في ايه ومعملتهوش؟
تقي / لالالالا كبيرتكوا ايه بس دانا عندي ١٠ سنين ومعرفش حاجه حقكوا عليا خلاص حرمت.
ولو علي سؤال كان نفسي في ايه ؟
فانا قررت بعد كلامكم ده هعمل كل اللي نفسي فيه حتى لو نفسي اجري في الشارع 😂😂😂😂
هناء/ 😂😂😂😂😂😂 أيوة كدة برافو عليكي يا فاطمة اديها مترحمهاش قال سني قال
جودي / والنبي خليها تحللي الهوم ورك بتاع الدرس الاسبوع ده
لبني/ وانا كماااااان
تقي/ في ايه يا بنات انتوا ما صدقتوا خلاص هناء كان عندها حق هما شوية اكتئاب وراح لحاله.
فاطمة/ أيوة كدة ناس مبتجيش غير بالعين الحمراء
تقي / طب علشان روحكم الحلوة ده انا فعلا هنفذ اللي فاطمة قالته هعمل المشروع المطلوب الاسبوع ده وهناقشكم فيه علشان انتوا احلي بنات بجد بحبكوا كلكوا❤️❤️❤️❤️
وانقضت فترة الكورس واستفادت تقي بالفعل من الكورس من حيث المادة التعليمية والتعرف على أناس جداد بمختلف أعمارهم وثقافتهم وتعليمهم ورأت وجه آخر في الحياة لم تعرفه من قبل وتعلمت تقي أن ليس هناك خريف العمر وانما الخريف خريف القلب إذا مات القلب أو استسلم لهزائم الحياة ماتت معه كل المشاعر الجميلة
فتمسك بكل ما تحبه وافعل ما تريده مادام ليس فيه معصية للخالق لا يوجد سن للتعليم أو الحب او للحياه .
...........................
الاسكريبت صغير انا عارفه وباكد تاني علشان ده من بداية كتاباتي ومش بس بداية كتاباتي ده كمان بداية تعليمي التصميم واللي عملتله الغلاف ده فانا عايزة رايكم بالاسكريبت والغلاف🙈🙈🙈 وبتمنى يكون عجبكم 🌹🌹🌹
وقولت حاجه خفيفة في رمضان منتظرة رأيكم بالاسكريبت ودعواتكم اخلص الرواية على خير
