العُــــقَــــابُ الأســــطــــوري🌼🦅|🇲🇦

🦅الحاكم الغامض و عروسه المغرورة🦅|24

°°°الخوف من الموت ينبع من الخوف من الحياة..فالرجل الذي يعيش حياة كاملة مستعد للموت في أي وقت.°°°

كان جالس فالمكتب و قدامو جالس المحامي ديالو...

آزاد: كيفما قلت ليك فاش غنموت كاع الأملاك ديالي غيوليو فسمية جوهر..جوهر هي الوريثة ديالي الوحيدة!

غوثري حرك راسو: أمرك ا مولاي الى سمحتي واش غنكتبو الوصية دابا ولا...

قاطعو بتأكيد: دابا!

بدا المحامي خدمتو و آزاد تيملي عليه شنو غيكتب حتى سالا و مشا...

صوت الباب لي تسد كان بحال شي جرس تدق و خلاه يغوص فأفكارو..كان ساهي تيخمم دابا فاش عطاها الخنجر و ولا بين يديها كأنه عطا حبل المشنقة لجلادو يحطو ليه فرقبتو بيدو!..دابا فأي لحظة تقدر تنشط غريزة القتل عندها كقاتلة الغريفين!..داكشي علاش دار هاد الخطوة الكبيرة باش حتى الى مات يكون ديجا قاد أمورو و لي أهمها الجزيرة تبقا فأيادي أمينة و الشخص الوحيد لي تيثيق فيه فهاد العالم كاملو هي جوهر طبعا...

تنهد حاط يدو على وجهو بتعب ماشي من الماكلة لي مابقاش تياكلها حتى تتاكل هي و الى ماكلاتش مستحيل ياكل ولا النعاس لي متينعسوش و هي غير جالسة ساهية حيت متيديهاش بل من الجفاف لي ولا تيحس بيه من جيهتها ولا متعطش لداك الحب و الشغف اكثر من الاول!...

شنو غيدير؟! اشنو غيدير باش يقنعها بلي نيتو صافية من جيهتها و عمرو غيآذيها و طول هاد 13عام مقابلها غير هي و سهران غير على راحتها و يكون قدها و قد زواجو بيها!..هاد الساعة ماعندو غير يخلي الوقت يداوي...

اما هي كانت جالسة قدام مرايتها يديها تيمشطو فشعرها بشكل غريزي كحركة مولفها الجسد اما عقلها مرفوع..ساهية فهاد الحالة لي ولات فيها..كتر من شهر و هي هاكا و حتى حاجة ماتبدلات!..حتال امتى غتبقا هكا؟!! و علاش غتبقا هاكا؟!! علاش حزنها يكون على حساب سعادتها و حيويتها؟! ضروري تكون شي طريقة لي تعذبو بيها من غير ماتزيد تضرر نفسيتها هي...

كانت مطبقة طول الوقت مقولة "الصمت هو أفضل جواب لشخص لا يقدر كلماتك!"..ولكن هو ماعياش من هاد الصمت!...

حطات داك المشط و سهات فالخنجر لي كان محطوط حداه فوق الكوافوز حتى بدات تتسمع صدى فراسها...

ماريسول: الى بغيتي بصاح تهربي من الأمور لي تيضايقوك مامحاتاجاش تكوني فبلاصة مختلفة بل تكوني شخص مختلف!

هزات جوهر عينيها فالمرايا كان إنعكاس ماريسول واقف موراها بنفس الهيئة د قبل...