ثبت على يديه🌱مكتملة🌱

🌱الجزء 4🌱

🌓تبت على يديه🌓
💎بقلم : ايمان العماري💎
✨الجزء : 4✨
وقفات مرسيديس بيضة وسط الدرب ، كاع لي تما ضارو يشوفو شكون غاينزل منها وكاين لي كيطل من سطوحا وشراجم لفووق ....

فؤاد : هاد الناس عندكم ماعندهم مايداير

نور : هاااعلاش كنقوليك متحطنيش فالدرب هادو راه تبرگيك كيجري عندهم فالدم

فؤاد : وشنو فيها لاوصلتك عادي راه ماماك عارفة هادشي

نور : هاديك ماما وهادو الجيران كيفهموها عوجة مهم  نخليك دابا خاصني نمشي

فؤاد : سلمي على ماماك

نور : مبلغ ( جات غاتنزل وهي دور عندو ) سمحليا ديما كنعدبك معيا

فؤاد : مزال نسمع هاد الهدرة والله ماباقي تشوفي وجهي

نور : لهلا يخطيك اخويا غير دعي مع ختك دير تاهي شي حديدة

فؤاد : ديريها ان شاء الله غير زيري شوية متبقايش مقابلة غا اللباس جمعي وخلي لابغيتي ديريها

نور ضحكات : ختك مبلية بالحوايج شغندير

فؤاد كيدور راسو بلا حول ولا قوة : نزلي اختي نزلي خليني نمشي نكمل خدمتي لايصدق جاري عليا الواليد من الكلينيك

نزلات كضحك سدات الباب ووقفات كدير ليه باي باي تاديمارا عاد مشات ....

محسين كان جامع يدو على شكل قبضة وجهو حمررر عينيه محيدوش عليها ملي نزلات من طوموبيل .. طلعها ونزلها مكره من داك اللباس لي لابسة .... ميني جيب كحلة وشوميز بوغدو وطالون كيتسمع صوتو من بعيد غادة وكتمايل فمشيتها وهو حدر راسو مقدرش مزال يشوفيها

زكرياء : اللهم ان هذا منكر ... آش هادشي كنشوفو ا محسين

- :  مخلي ختك تخرج هاكا كاع الرجال يشوفو فيها  .. حتا ختك مقادش تحكمها ....

محسين سرط ريقو وهو منزل راسو الارض ختو ديما مطيحة بوجهو قدام الناس

زكرياء : الى كانت هاد الخدمة تخليها تبين  عورتها قدام الناس حسن تكلس فدار

- : المرا مصلحاش ليها الخدمة  فبلايص مختلطة الوقت كولو كتحتك بالرجال  وتجمعها معهم الهدرة ...

زكرياء : خويا محسين هدر مع ختك ودير حد لهاد شي مانقصاك شوهة باركة غير هاد الفضيحة كاع رجال لي خدامين معها كيوصلوها .... كل مرة طوموبيل فشكل داخلة عندنا للدرب

محسين عيا صابر فلخر ناض صاااعر غادي لدارهم معول اليوم يطيح الروح ...