🌓تبت على يديه🌓
💎بقلم : ايمان العماري💎
✨الجزء : 35✨
بدر الدين : تا انا مكنعرفهاش غير لقيتها صدفة وجبتها معيا
نجاة كتشوف فيه باستغراااب : انا كنعرفك اولدي ماشي اي وحدة غاتلقاها غاتجيبها معك لدار قوليا شكون هادي وفين كتعرفها
بدر الدين : مكنعرفهاش مزيان .. كنعرفها غير من بعيد وقع ليها شي مشكيل مع مولات دار لي كارية عندها وجرات عليها فنص الليل ومقديتش نخليها هكاك فديك الحالة وبوحدها فزنقة والليل هدا
نجاة كتهز راسها باه : مزيان اولدي ... درتي فيها خير مسكينة ربي هو يجازيك تاهي باينة فيها غشيمة وماعارفة والو وجها ماشي دشي وحدة خايبة كتبان بنت الناس
بدر الدين مسح على وجهو : لعشا واجد
نجاة : واجد اولدي ، طلع بدل عليك ونزل معاك جداتك تعشا
بدر الدين ناض وقف : كيف بقات ؟
نجاة : وشوووية وصافي هاهي مسكينة كتسلك تاهي راه كبرات وصحتها قلالت
بدر الدين : الله يشافيها .. انطلع نشوفها
عند لبنات .......
خرجات من دوش بينوار جلسات كتنشف شعرها بالفوطة ونهيلة جبدات من ماريو ديالها بيجامة دار مشات حطاتها حداها
نهيلة : نشفي ولبسي هادي
نور : راه جبت معيا حوايجي انلبس منهم
نهيلة : وخا لي بغيتي ... يكما خصاك شي حاجة خرى ؟
نور : لا ختي شكرا
نهيلة : انا مشيت ملي تسالي نزلي تعشاي
وخرجات سادة لباب موراها ... اما نور كملات تنشاف شعرها وناضت لبسات حوايجها دوبياس وبيحامة خفيفة توبها ستان بسروال ونص كوم ديالها قصير جاتها مزيرة على طاي ديالها .... جمعات شعرها لفوق وخرجات يالاه اتسد لباب هو يخرج بدر الدين من بيتو عينو جات نيشان عليها هو يوسع عينيه فيها بصدمة شوية دارك الموقف ودار دغية زعما باش اغض لبصر مع دورة مع خشا وجهو فقنت تاع لباب حتا تسمع صوت دقة فجبهتو شدها بيدو
نور وسعات عينيها بلا متفكر مشات كتجري لعندو
نور : اويلي مالك وريني ننشوف
بدر الدين وقفها بيدو : لا متقربيش خليك بعيدة
نور حدرات رسها بقا فيها لحال حيت حبسها بديك طريقة دارت عطاتو بضهر باغية تنزل حتا وقفها بصوتو
بدر الدين : فين غادية
نور بقلق : نزل نتعشا ختك قالتها ليا وانا فيا جوع
بدر الدين : و بهاد الحالة !!!!
كيهدر وهو كيحك فجبهتو وحادر عنيه مكيشوفش فيها
نور غوبشات : و مالها حالتي كيف جاتك راني لابسة حوايجي منزلاش عريانة
بدر الدين تنهد واستغفر الله فخاطرو وعاد نطق : مقصدش هكاك غير هو ...
نور قطعاتو : غير هو انا فدارك وخاصني لبس كيف بغتي انت ياك ... انا هكا موالفة نلبس واصلا اندوز فدارك غير هاد ليلة ونخرج فحالي دكشي علاش غير صبر عليا هكا حيت مغديش نغير راسي باش تبقا نت على خاطرك
خلاتو واقف ونزلات لتحت
بدر الدين : لا حولا ولا قوة الا بالله العلي العظيم
دار بناقص من شي عشا ورجع لبيتو
نزلات لتحت متسوقاتش ليه ولا وقفات تسمع منو باش ايجوبها هي كاع الهدرة لي كانت باغية توصلها ل زكرياء وصحابو وموصلتهاش هاهي لقات لمن تقولها وتفرض عليه اشوفها لابسة كيف بغات هي ماشي كيف بغا هو
نزلات كتعوج بداك طرف عندها وصلات صالون ولقات تما الجدة جالسة شدة تسبيح بين يديها اما نهيلة ونجاة كانو فالكوزينة كيوجدو باش احطو لعشا
نور : هاي ( قالتها لجدة)
الجدة : بسم الله الرحمن الرحيم منين خرجتي واش نتي انس ولا جن ( بدات كتغوت ) بدر الدين ونهيلة ونجاة وتوما عتقوني واقيلة قربات ساعتي وغنودع ولاو يبانو ليا المسلمين بسم الله الرحمن الرحيم
جات نهيلة كتجري عندها فاش سمعتها وهي تلقا نور واققة وجداتها كتعيط وتسمي الله
نهيلة: جدة لا راه ماشي جنية هادي نور اجدة
الجدة : نور !! .. وشكون نور ومنين جات
نهيلة : جابها خويا معه
أنت تقرأ
ثبت على يديه🌱مكتملة🌱
Romance💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
