🌓تبت على يديه🌓
💎بقلم : ايمان العماري💎
✨الجزء : 54✨
بدر الدين : وشنو انديرو ليها واش نخرج انا امي باش ناس ميهدروش !!
نجاة : مكاين لاش تخرج لا انت لا هي ( شداتو من يدو جراتو جيهت طبلة وجلساتو فوق الكورسي وبدات تمسح ليه على كتفو ) ولدي بدر الدين شحال ف عمرك دابا
بدر الدين : 27 عام امي علاش كتسوولي على عمري بحلا مكتعرفيش
نجاة : عارفة عمرك غير بغيت نفكرك فيه اولدي وبغيت نفكرك بلي راك كبرتي مشاء الله
بدرالدين : الله اكبرنا فطاعة الله
نجاة : امين ياربي ومدام كبرتي اولدي وراك تبارك الله عارف فالدين وفاهم فيه وكدير كاع لي عليك ولكن اولدي راك مزال ماكملتي دينك وباش تكملو خاصك تزوج حيت زواج هو تكملت الدين
بدر الدين : مي انا ....
نجاة قطعاتو : ولدي بلا متقطعني دبا عارفك اتقول ليا تاني نفس الهدرة بلي مزال ملقتي بنت ناس وانت مزال كتسافر على قبل تكبر مشروعك ومزال مرسيتي راسك ومن ديك لهدرة لي موالف دوخ عليا بيها دبا سمعني اولدي انت كبرتي وربي عطاك عقل وزين وعطاك حتا لمال وماعندك حتا عدر باش تقول مابغيش تزوج وتستقر وحتا انا بغيت نشوفك مزوج ونشوف ولادك نكبرهم معك محد صحة مزالة شوية
بدر الدين : الله اخلي ليك صحيحتك الواليدة
نجاة : امين دبا قوليا اشنو قررتي
بدر الدين : هاني وافقت نتزوج امي فين انلقا بنت ناس لي تكون زوجة صالحة وتكون ام صالحة تربي الولاد تربية حسنة راه امي انا كنقلب على لي تربي ولادي تربية حسنة وتزرع فيهم قيام دين والاخلاق الحسنة وصعيب تلقا شي وحدة فهاد الوقت انا كنخرج لبرا كنشوف العجب كنبقا غير حادر راسي ونستغفر
نجاة : انا معك اولدي البنات تحررو بزاف وخرجو عليهم الغرب بداكشي لي كيوصلو ليهم وبديك تحرر وحرية شخصية خلاو بزاف دالبنات انساو دين وينساو باش وصاهم الخالق جلا علاه ولكن هدا مكيعنيش بلي مبقاش بنات الناس لزواج شوف ربما ولديهم معرفو يربيوهم على الدين ولكن انت تقدر تربيها عليه اولدي وتعلمها دكشي لي تعلمتيه انت وتوريها اش قال الله خلاصة انت غير قبل اولدي ومغديش تندم
بدر الدين : دبا نتي علامن كتهدري باش غير نفهم واش نقبل ولا لا
نجاة : كتيق فميمتك اولدي
بدرالدين : من طبيعة الحال كنتيق فيك
نجاة : كندوي على نور ( بدر الدين وسع عينيه على جهدهم وهي تكمل هدرتها ) ولدي نور مقطوعة من شجرة ومعندها حد فهاد دنيا وربي جابها لطريقك وانت جبتها لدار وحنا عطينا ليها الامان ولكن باش نوفو بهدرتنا خاصك تزوجها باش متخلي لحد فين اهدر ملي تولي مراتك حلالك تقدر تعيش معنا هنا وانت غدي تشد بيدها اولدي وتعونها ترجع لطريق الله وتستر وتعلمها دكشي لي غافلة عليه فالدين وتدي اجرها اولدي وحتى نور راها بنت الناس وغدي تولي زوجة صالحة وام صالحة انت غير عطيها فرصة ا ولدي (. شافتو ساكت وكيشوف فيها باينة كيفكر ) اش قلتي ؟
بدر الدين تنهد كيمسح على راسو : خلي ليا الوقت نصلي ستخارة ونرد عليك
أنت تقرأ
ثبت على يديه🌱مكتملة🌱
Romance💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
