وعكة حب

الحلقة الثانية عشر

وعكة حب

برايسيسا

الفصل الثالث : فتيل طيف

هبة : أنا عرياااانة.. مادخلش..

صوت البواني و هو كايضور.. داك الأزيز رقص عليه نبضات قلبها ببطئ.. رمشات مرة و زوج و كأنها كانت كاتتسناه عاااام.. تفتح الباب.. تم داخل لعندها مخليه مدرع كالعادة.. و بلا ماتحس ميلات راسها معاه.. بخطوات بطيئة كايقرب لعندها..

هبة : صحابلي كاعما غاتجي..

يزيد : جيت..

قرب لعندها و حط يديه بزوج على جناب الكرسي لي جالسة فيه.. عينيه على انعكاسهم فالمرايا.. بالضبط فعينيها : مايمكنش مانجيش أ نص ميترو.

بلعات ريقها بصعوبة.. منظرو هاكاك.. واقف قدامها... كايشوف فعينيها.. بقوة.. بحالا ماشي خطبتها الليلة.. بحالا ماشي هو لي اعتارف ليها داك النهار كايبغيها.. مابقاتش عارفة واش بصح كايبغيها.. ولا هي بغات تشوفو كايبين ليها داك الحب للأبد.. داك الحب لي عمرها تخطاتو ولا عرفات ليه دقة مقادة من السعادة..

يزيد : (حرك راسو بلا) مافرحاناش.

هبة : (حدرات راسها شاغلة راسها بالتفكير) حيت غانتخطب؟ ولا حيت جيتي؟

يزيد وكا٦نها فتحات ليه منفذ جديد و سؤال آخر توجه ليه فضولو باغي يعرف : بزوج..

هبة : (حركات راسها بلا) مابغيتكش تشوفني بهاد الوجه.. وجه وحدة باغا لي يشد فيدها و يعنقها ماشي لي يلوحها للعافية..

يزيد : يمكن هاداك نور..

هبة : نور من بعيد.. و عافية من قريب.. (تنهدات) اقتانعتي بيه؟

دخل يديه فجيابو و قال : كايبان بنادم مقاد.. كايفكر قبل مايهضر.. كايبتاسم.. (سهى فيه كايفكر) كايراعي.

زيرات على يدها و قالت : ماتشكرش ليا فيه.. تا نتا كاتفكر قبل ماتهضر و كاتبتاسم.. و كاتراعي..

يزيد : اه.. عندك الحق (هز ليها راسو بالإيجاب و فلحظة ميل راسو) واخا هكاك مامقادش.

بلعات ريقها.. هزات الفاراجو.. و پانسو غليض.. حلات البواطة.. و دوزات عليه الفرشاة ببطئ كاتتأمل الحبيبات الزهرية لي فيه البعض كان كايلمع بالهايلايت.. : يزيد لي كان يقولي بغي راسك.. (ساست الفرشات بضربة خفيفة فالغلاقة دالبواطة.. و هزات راسها فالمرايا كاتمرر الفرشات على مهلها فوق الحنك) مابقاش كايبغي راسو..!!

يزيد : ههه..

حبسات و هزات عينيها فضحكتو متفاجئة و متوترة منها.. ضحكة جديدة ما عارفاهاش من الفرحة ولا الحزن ولا الدعاااابة.. : كلامي ضحكك؟

يزيد : هه لا.. لااا (ميل راسو بلا كايشوف فشعرها المسرح.. ماينكرش أنو كايغريه منظرو هاكاك يجرها منو و يرجع ليها راسها للور بالمقلوب.. رمش زوج مرات و هز فيها عينيه) رحمي راسك.. مكاين لاش تتظاهري معارفة والو...