طفولة مسروقة

البارت الثاني عشر 12

حبايبي لاتنسون تابعون الحساب والتصويت على القصة والتعليق على الفقرات اريد همتكم،

#طفولة مسروقة

#بقلم روح

غير مبري الذمه من ينشر القصه بدون ذكر اسم الكاتبة

يولاند:-بوقتهه دخلت للبيت ميته برد وملابسي كلهه مي من المطر دخلت تلكتني ماما

ام يولاند:- سوده عليه يمه، عمت عيني راح تموتين طبي ولج بسرعه ادفي على الهيتر، ولج مياسه جيبي لأخيتج ملابس خل تبدل البنيه راح تموت من البرد
صدك ركضت مياسه جابتلي ملابس دخلت للحمام بدلت وطلعت ارجف واسناني طك من البرد كعدت يم الهيتر وتغطيت بطانيه وماما فوك راسي تفتر، وبعدهه راحت تسويلي نومي حار، ضليت متلفلفه بالبطانيه، شويه وكلتلهه ماما راح اروح انام بلكي تدفه شويه

ام يولاند:- يايمه عمت عيني روحي يمه روحي، كمت وانه متلفلفه بالبطانيه رحت للغرفه، نمت وبعد مادريت بالدنيه فزيت الساعه 2ونص كعدت ميته جوع و كلهه نايمه، طلعت للمطبخ لكيت عازليلي عشه تعشيت وطلعت للصاله اخذت قرآني وكعدت اقره اتذكر هذا القرآن من جاباه الي بابا (للكاتبة روح)

بوقته جان عمري 16 وضليت ابجي وتوسل بابا اله تجيبلي قرآن، كالي بابا بس انتظريني يومين تلاثه لحد ماجمع واجيبه الج جان قرآن صغير شويه اكبر من كف الايد كعدت اقره بي لحد ماصار وقت الصلاة صليت ورجعت نمت لان ماعندي دوام، رجعت لفراشي اباوع على وجه ماما مبين بي تعب السنين رغم بعدهه صغيره بس الي يشوفهه يكول دخلت بالعمرين، ماما عمرهه 41 سنه وانه اتامل بوجه ماما رجعت غفيت مادريت بعد..

فجأة فزيت على صوت مواعين بالمطبخ،شفت الساعه 12 الاربع انصدمت شكد نايمه الي يشوفني يكول معوزه نوم، طلعت شفت ماما ومياسه بالمطبخ وذكوري يمهن يلعب، التفتت ماما شافتني حجت
ام يولاند:- ها ماما كعدتي، عود ماردنه نكعدج كلنه خل تشبع نوم، بس هاي الفاهيه طيحت المس من ايدهه، حجت مياسه
مياسين:- ها ها ماما غير انتي مخليته على الطباخ وحامي وانه مادري لزمته،
ام يولاند:- ديلا يلا شدعوه هو شويه بي حراره بس بنات هالوكت تتعايرن على كلشي وكلتن اييي واويي

مياسين:- على كيفج خيال خانم شكلنه،

هي كالت هيج مياسه مانحس الا ماما سحبت سلاحه الفتاك وهفت مياسه بي وهي تحجي ادب سزز اصغر بزرج تصيحيلي خيال شو ماتستحين صايره ، متت ضحك على مياسه من كضت راسه وتفرك بي وتحجي

مياسين:- ماما هس انه شحجيت قابل مكذبه هوه غير اسمج خيال
ام يولاند:- ولي عني مو بت فلك
سكتت مياسه وماما كملت صب الاكل وكعدنه ناكل كملنه الاكل وكمت انه شلت المواعين وغسلتهن وسويت جاي وكعدنه نحجي

للعصر اندك الباب طلعت ماما تفتحه شويه وسمعنه صوت خاله سعاد، خاله سعاد مو اخت ماما صديقتهه، بس هيه اخت دنيه مثل مايكولون جانت وكفاتهه هواي وي ماما لو اختهه من امهه وابوهه متوكفلهه هلكد