#مُجرد_حوار "6"
[يوم العيد]
"لا زالت عيناك تُربِكُني ، حتى و إن كانت مجرد صورة.))
_بت يا نون .. نووون.
=بسرعة قفلت تلفوني وجدعتو في السرير.
_بتعملي في شنو ما تدسي مني كاشفاك أنا.
=هبلة إنتِ ولا حاجة أدس منك شنو؟
_لي ساعة بناديك معقولة ما سامعاني .. وبعدين نحن جينا لمنو لما إنتِ ماسكة تلفونك وقاعدة تعايني ليه.
=أعاين لمنو؟
_كلنا عارفين.
="بهمس" .. إلا هو.
_سمعيني قلتي شنو؟
=قلت ليك أرح طيب.
_يعني ما حتنكري زي كل مرة؟
=أنا تعبت منك يا هدو فما ح أتناقش معاك في الموضوع ده تاني.
_إنتوا حتستعبطوا كده لمتين؟
=اوووف يا هديل كم مرة أشرح ليك إنتِ فاهمة غلط.
_أنا برضو اللي فاهمة غلط .. طيب وأمي وناس هبة برضو فاهمين غلط؟
=كلكم ما قادرين تفهموا إنو أنا وأحمد أصحاب بس ما أكتر دا كان يوم أسود يوم تصاحب ود خالتك في أي لمة يشغلوها ليك.
_أنننننننن عمومًا أرح القهوة جهزت.
=إنتِ عارفاني ما بشرب قهوة.
_بس بتعمليها ليهو.
=لو عايزة يعملوها ليك إنتِ برضو ح أعملا ليك مافي أي إستثناء في الموضوع.
_أنا بس راجية أشوف نهايتكم شنو.
=أرجي ساي.
هديل بت خالتي وصحبتي الأنتيم .. بس مشكلتي الوحيدة معاها إنها بتحاول بكل الطرق تثبت لي إنو البينا أنا وأخوها أحمد ما مجرد صحوبية .. أحمد إنسان غامض مافي زول بيعرف شي عنه غيري .. أغلب الوقت مشغول .. يمكن عشان أنا قريبة منه شوية هم مستغربين في علاقتنا .. أو يمكن لأسباب تانية أنا كمان ما قادرة أفهم.
في نص الونسة سمعنا صوت العربية دا هو جا يسوقهم بس أنا قلبي بدق كدا ليه؟
اول ما أحسه قريب مني بتوتر وببقى عايزة أهرب من المكان .. شلت تلفوني ودخلت غرفتي قلت ليهم ح أنوم شوية ما تصحوني ..!
وهو زي عادته ما بيمشي لو ما لاقاني وسلم علي ..!
_صوت دق في الباب.
=لبست توبي وجيت أفتح.
_ح أدخل ولا تطلعي؟
=طالعة يا أحمد عايز شنو؟
_خير نايمة بدري كدا كويسة إنتِ؟
=مصدعة شوية بس.
خت يدو في راسي بدون تردد خلاني واقفة مخلوعة .. لا اكيد هو مجنون .. قال:
_ما مصدعة ولا حاجة في شنو يا نون؟
