صباح الخير حُبًا ..!
وإنتِ بتختاري علاقاتك ركزي على إنك قادرة تفهمي الشخص القدامك اول بعدين شوفي بقية الـDaitels .. كل العلاقات الناجحة نجحت علشان هما بعرفوا بعض ومتفاهمين.
وبالمقابل العلاقات بتفشل عشان نحن وصلنا نقطة صعب نتفاهم فيها .. يا إما سوء تفاهم.
العلاقات المبنية على العِرفة دي حلوة وخفيفة ولطيفة ومريحة .. تخيل شخص يعرفك؟
*بهذه البساطة بس يعرفك ..!*
يعني لو مهما حصل هو اول كلمة حيقولا ليك أنا عارف إنك ما كدا.
بتذكر مرة صحبتي إتصلت ليها وحدة قالت ليها أخوك مسكتو الشرطة وهو حاليًا في السجن .. طبعًا اللي وصلت ليها الكلام كان عندها مقصد تاني فكان رد فعلها هادي جدًا ببساطة قالت ليها :
سوء تفاهم وحيتحل ما تنبسطي كدا أخوي وأنا بعرفو هو مهما كان سيء في نظرك أنا بعرفو ما ممكن يصل المرحلة البتفكري فيها دي .. وفعلًا في الأخر طلع معتقلينو ساي فاكرينو مع المتظاهرين.
رغم إنها ما كانت بتعرف السبب وقالت لي أنا عارفة أخوي مشكلجي وبتاع شغب بس عارفة أكتر ما حيعمل حاجة سيئة زي الهي فاكراها.
موقف تاني:
صحبتين إتشاكلو وصلت المشكلة حد بعيد ما قدرو يصلو لحل قالت لي خليها حنرجع لبعض أنا بعرفنا كويس حتى لو المشكلة إطورت بينا أكتر من كدا حنرجع لأنو ما لينا غير بعض وفعلًا عدو فترة حكاية إسبوع زعلانات من بعض لما مرة تعبت في الجامعة قالت لينا إتصلوا ليها تجيني .. كانت عارفاها حترد حتى وهما متشاكلات .. عارفاها الوحيدة الحتقيف معاها من دون الناس .. لما كلمنا صحبتا نص ساعة كانت عندها وهي بتسلم عليها قالت ليها: يعني عشان إتناقشنا تقومي تعيي أهو خلاص حسامحك يلا أبقي كويسة وبعدها لقيتهم حاضنين بعض وببعتذرو.
متخيلين معاي قدر شنو حلوة العلاقات دي؟
قادرين تتصوروا كيف بكون حاسي الشخص اللي متأكد من شريكو وعارفو إنو مهما حصل هو بيعرف إنو ما حيفهمو غلط ..!
ماحيقدر أي شخص يخرب بينهم ..!
ما حيسيبو في عز إحتياجو عشان عارف المحبة البينهم أكبر من المشاكل.
فيارب تلمنا بالناس اللي تعرفنا وتفهمنا.
#على_الهامش:
"بمُجرد أن يقول لي:
أفهمكِ.
يختفي خوفي والتوتُّر
وأهدأ من داخلي
هو شيءٌ ساحر وجميل أن تجد مَن يفهمك جيدًا قبل أن تعصر قلبك مرتين.❤️"
#Morning_Message "7"
#نُودين_بِت_مِن_حُب
