صباح الخير حُبًا ..!
"محل ما بمشي بلقى محبة وكل بيوت الفقرا بيوتي"
بتقيس أثرك في الحياة ببصمتك البتخليها وراك .. نحن ما جينا الدنيا دي عشان نعمر فيها حيجي يوم ونمشي منها وقتها ما حتفضل لينا غير السيرة الطيبة.
حاول لما تمشي مكان اول ما تطلع منو يتقال:
"يا سلام ياخ على الزول دا"
كلمتين بس معناها عظيم.
طبعًا ما كل الناس حتفضل شايفاك كويس بس دا ما دليل على كعوبيتك .!
أهم شي إنت تكون عارف نفسك والأعمال بالنيات كونك ما نويت تأذي زول أو تقصده بشر دا كفاية جدًا.
القبول دا شعور غريب شديد يعني ممكن تدخل مكان وتطلع منه بدون ما تقول شي .. بدون ما تسأل شخص .. تلاقي واحد طالع يلحقك عشان يقول ليك كلمة حلوة .. وفي مكان أخر تلاقي شخص اول ما تطلع يقول "فلان دا ما هضمتو".
ولا يهمك إنت ما جاي الدنيا ترضي زول بس أهم شي ما تأذي زول.
مرة صحبتي بتحكي لي والدموع مالية عيونا قالت لي:
يا نود أنا أنانية؟
بدون مجاملة وما عشان عايزة أطيب خاطرا بس هي عمرها ما كانت أنانية أنا إستغربت كيف شخص قدر يشوفا كدا؟
الصباح اول ما جيت داخلة جوني الشفع سلموا علي بحب وواحدة منهم قالت لي يا أستاذة أنا بحبك شديد وجبت ليك هدية بسيطة بدون سبب حتى ما بعرف هي حبتني ليه ولا عشان شنو أنا ما قاعدة أدرسهم أصلًا كل إحتكاكي بيهم في زمن البريك.
أمس برضو وحدة جاتني في المكتب قالت لي :
يا أستاذة إنتِ ما تجي تدرسينا عليك الله كلنا بنحبك .. إعتذرت منها إني ماسكة شغل كتير وما بقدر أدرس لقيتا جايبة لي شوكلاتة وقالت لي خلاص دي ليك.
يمكن دي مواقف بسيطة بس بالنسبة لي أثرا بفضل عمر حقيقي أنا عمري ما قصدت أأذي زول أو أخليهو يمشي شايل في خاطرو مني يمكن بتعصب وبزعل وبحمق بسرعة بس جوة قلبي مافي تجاه اي زول إلا كل الحب ودا بعتبرو نصيبي من الدنيا.
#على_الهامش:
أنا أكثر من يقول أحبك لجميع من حولي خوفًا من أن أذهب وهناك من يشعر نحوي إنني في يوم لم أحبه ))
#morning_message "19"
#نُوودين_بتْ_مِنْ_حُبّ
