🌓تبت على يديه🌓
💎بقلم : ايمان العماري💎
✨الجزء : 80✨
نور : انا م ....
خلا كلامها فنص وداز من حداها بزززربة دخل لبيتو وسد عليه ....
نور تنهدات ودارت مناقص من شي عشا ودخلات حتى هي لبيتها
بدر الدين خرج من دوش كان توضاا باش يطفي اعصابو وصلا جوج ركعات ومشا فوق الفوطوي وكلس شاد المصحف فيديه فتحو ودبا كيقرا ما تيسر ....
معندو حتى طريقة باش يطفي الغضب ديالو ويبرد اعصابو من غير الوضوء والصلاة وقرائة القرآن كيريحو القلب ويهدنو الانسان ..
تعصب بزاف من لوجيست لي دارت نور وزاد تأكد انه غيلقا صعوبات معها صعيب عليه يخليها تدبل من تصرفاتها كيشوفها متحررة بزاف ... لا فشخصيتها ... لباسها عقليتها ... كولشي فيها .. غافلة ومستهترة
لدرجة عارفة راسها مابقات ليها غير يوماين على زواجها وكتهدر مع راجل اخر بديك لافاصون ... !!!!
كمل ترتيل القران وناض منبعد ماحس براسو برد شوويية خرج البالكون ووقف كيفكر فحياتو من دابا لقدام كيفاش غتولي عندو مهمة صعيبة وخاصو يقوم بيها كيشوف نور ماشي وحدة ساهلة غيبدلها مابين لليلة ونهار خاصها وقت طويل باش تعلم وتوب وتولي ليه زوجة صالحة كيف ما كان كيتمناا من شحال تكون عندو امرأة صالحة وكتعرف بينها وبين الله وشادة دينها ومتمسكة بيه
وخا نور ماشي وحدة صغيرة ولكن غافلة فهاد الامور ولاجا يبدلها لا هي ولا هو غتجيهم صعيبة لكن كولشي بالقناعة والتفاهم ...
ماشي اول مرة غيقوم بهمة بحال هادي ياما شباب كانو منحرفين وردهم لطريق الله وبقناعتهم وحتى نور غيرد بيها لطريق الصحيح وغيخليها توب حتى هي بقناعتها كل مرة غيقربها ويوريها حاجة حتى تعلم وتوب الله
#عند نور
كانت واقفة حدا محجوبة كتعطيها فدوا ديالها تاشرباتو وجلسات تعبر ليها لاطونسيون ....
نور : مزيان الضغط هو هداك غير دقات شوية طالعين
محجوبة : الله يرضي عليك ا بنتي
نور : خصاك شي حاجة نجيبها ليك قبل مانعس ؟
محجوبة : لا غير سيري ترتاحي
نور : تصبحي على خير
محجوبة : تصبحي على خير ابنتي
خرجات من بيت محجوبة ودخلات لبيتها لي كان اونفاص مع بيت بدر الدين ....
تسطحات فوق النموسية كتشوف فالسقف وفارجاءها بقات ليها جوج لليلات غدوزهم فهاد البيت و منبعد مغتبقااش تنعس فيها مجرد ماكتفكر انها غتولي مراتو ومعاه فبيتو كتحس بصهدة طالعة معاها ....
عمرها ما كانت كتفكر لهاد النهار يا ما جاوها عروض زواج ولكن كانت كترفض خافت هدا لي غيديها يجلسها فدار وميخليهاش تخدم وهي حالة ماماها المادية مكنتش كتسمح ليها تجلس فدار وتحبس من الخدمة هي للي كتصرف عليها وعلى خوها وعلى راسها وحتى هاد الراجل للي غادي يديها خافت حتى لامحبسهااش من الخدمة يولي يتحاسب معها على فلوسها جميع الاحتمالات حطاتهم فبالها وكتلقا اعذار راسها غير باش مطيحش فشي واحد وتبغيه ويتزوجها ....
وقبل ماكتخطي الخطوة كتحط صورة ماماها وخوها قدام عينيها باش مطيحش فشي غلاط لي تندم عليه حياتها كاملة
أنت تقرأ
ثبت على يديه🌱مكتملة🌱
Roman d'amour💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
