🌓تبت على يديه🌓
💎بقلم : ايمان العماري💎
✨الجزء : 99✨
نور : فعايلك للي خلاوها تكرهك ماشي انا
ربيعة : اها وزيداها بحلان الفم وتخراج العنين
نور مسحات دموعها وقربات عندها : خالتي عندها الحق نتي ممنحقكش دخلي فحياتي شخصية وتملي عليا شنو ندير الوحيدة اللي ندير بكلامها هي خالتي نجاة و مي محجوبة و راجلي
ربيعة شافت ف مها وختها : شفتوها ياك شفتوها بحلااش ولات تهدر معيا ( وضارت كتشوف فعمات بدر الدين ) ياك نتوما شاهدين عليها
نور : انا عمرني فرقت هاد العائلة ولا وصلتهم ووصلتك بالعيب ملي جيتي ونتي حاطة عليا خاصك غير سبة فين تجبدني وتهدري فيا الى شفتني ساكتة ليك هدا مكيعنيش اني خايفة منك درت بوجه هاد العائلة مبغيتش نخرج معاك العيب
ربيعة : هااا لي قلنا .. لي كنت خايفة منو طحنا فيه ... قلتها ليكم .. قلت ليكم غادي تزوج ودير لگرون صافي دبا بقا ليك غير تهزي سمطة وضربيني ....
نور : حاشا واش نضرب مرا قد مي ... عمرني درتها وعمرني نديرها .... ( شدات سروال من عند نجاة ) هدا خبيه نهار تزوجي بنتك عطيها هي تمسح بيه وتخرجو ليك وريه لناس وقولي ليهم بنتي حمرات ليها وجهي .. وخا بهاد السم والحسد لي فيك موحال ربي واش يسهل ليك على بناتك
ربيعة من لغدايد اللي فيها هزات يدها حتى كانت غتجمع معها هي تشدها ليها نجاة
نجاة : اخر مرة تهزي يدك على بنتي
ربيعة شافت فيها ونترات يدها : كدافعي عليها قدامي ياك اختي نجاة .. يااااك
نجاة : نتي لي قلبتي عليها وهي عطاتك معندي مندير ليك
ربيعة شافت تاشافت فلخر جرات بنتها وخرجات من الصالة ومشات لبيتها تبرد الفقصة ....
نور غير شافتها خرجات وهي طيح جالسة على السداري كتبكي نجاة جلسات حداها من جهة ومن جهة لوخرا جلسات نهيلة ....
نجاة : متديش على هدرتها ا بنتي
نور كتشهق بالبكا : والله ا خالتي انا ماخايبة .. عمرني درت شي حاجة خايبة فحياتي ... 25 عام وانا محافظة على راسي وشرفي .. ( كتشوف فنجاة ودموع كيسيلووو من عينيها ) و الله تا انا بنت والى متقتوش بيا ديوني عند طبيبة
نجاة : اعود بالله .. آش هاد الهدرة كتقولي ... نور سمعني ابنتي انا دايراك بحال بنتي وربي شاهد عليا وتايقة فيك وعارفك نقية من برا ومن لداخل ...
نور بححرقة : علاش تهيني فشرفي الى كنتو شاكين فيا قولوها ليا ندير لاڤيزيت عند طبيبة
نجاة : نور ستغفري الله ابنتي ... حنا راه تايقيين فيك وولدي بدر ... تاهو تايق فيك وباغيك كيف ما نتي ومكينش شي يقدر يفرقكم على بعضياتهم .. وختي راه هكاك دايرا متديش عليها .. بقا ليها غير هاد لليلة وتمشي فحالها ( عنقتها ) صبري ابنتي صبري الله يرضي عليك
نور : انا والله ماخايبة اخالتي ... وخا ندير لي درت عمرها توصل بيا ... لدرجة نضيع راسي فالحرام ...
أنت تقرأ
ثبت على يديه🌱مكتملة🌱
Romans💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
