🌓تبت على يديه🌓
💎بقلم : ايمان العماري💎
✨الجزء : 100✨
نجاة : حشومة بنتي تقولي هاد الهدرة .. انا عرفاك وتايقة فيك ومازوجتك لولدي حتى عرفتك بنت الناس ونتي لي تستاهليه
نور تخشات فصدر نجاة كتنخصص : علاش تهيني فشرفي وتقلل مني
نجاة : مخلاقش هدا لي يقلل منك ويهينك خلي هاد الليلة دوز على خير مبغيتش بدر الدين يسيق لخبار حيت عرفاه لامشا حتى عرف بهدشي عمرها تحط رجليها فهاد الدار خليني مني ليها انا للي غنوقفها عند حدها
نهيلة : باركة عليك من لبكا طيبتي هاد لعينين شنوو خلتي لخويا مايشوف هاد لليلة
نجاة بعداتها عليها وتبسمات ليها بحنية : سمعتي نهيلة شنو قالت ليك ... حبسي من لبكا ونوضي طلعي لبيتك
نور سرطات ريقها وحركات راسها بنفي : منقدرش ا خالتي
نهيلة : شنو لي مغتقدريش عليه !
نطقات وحدة من عمات بدر : على العريس هههه
قلبوها كاملين ضحك حتى نور للي معندهاش الخاطر ومورالها ضاع ضحكات
نهيلة : متخافيش خويا حنين و الله كاع متخافي منو
نجاة : سمعتي لوستك شنو كتقول
نور حركات راسها بااه
نجاة : يللاه ابنتي نوضي و ها نهيلة غطلع معك
نور مسحات دموعها وناضت وقفات هي ونهيلة وخرجو من صالة غاديين جيهت دروج طلعو لبيت بدر الدين حلات نهيلة الباب ودخلات نور هي لولة مع دخلة ضرباتها ريحتو للي كانت قالبة ديك لاشومبر
نهيلة : دخلي بدلي حوايجك خودي ليك شي دوش يريحك بينما جا عندك خويا
نور شافت فيها : دخلي معيا
نهيلة : هه منيتك ! ... بغتي خويا يرميني من داك البالكون
دخلي وتوكلي على الله ومتخافي من والو ... انشاء الله كلشي غيدوز بخير ... غتلقاي عباية وشالها فوق النموسية لبسيها لصلاة
نور : الصلاة !
نهيلة : مالك جاتك عجب وراه ضروري تصليو نتي وخويا و اصلا جا الوقت فين خاصك تصلي حتى نتي حيت خويا ميمكنش يشوف مرتو مكتصليش ويبقى ساكت دخلي دغيا دبا شوية ايطلع عندك
دفعاتها نهيلة حتى دخلات وسدات الباب ونزلات لتحت اما نور بقات واقفة شحال عند الباب اول حاجة حلاات داك زيف اللي فوق راسها حيداتو هو يتطلق شعرها على كتافها وتمشات لداخل كتشوف فارجاء البيت كان كولو مصبوغ بلون واحد وهو الابيض مع دخلة كيبان ليك البالكون اونفاص مع الباب عاد مع دورة كاينة نموسية كبيرة وبلاصة اخرا خاصة بدر الدين كيصلي فيها وكيقرا فيها القرآن و قدام النموسية مباشرة كاينة مرايا وكوافوز ديالها محطوط عليه كاع لي اتحتاج من عطور ومكياج و الڤيرنيات ديالها داكشي كامل تقداتو ليها نجاة وغير داكشي الغالي تهلات فيها مزيان
أنت تقرأ
ثبت على يديه🌱مكتملة🌱
Romance💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
