ثبت على يديه🌱مكتملة🌱

🌱الجزء 141🌱والأخير🌱

🌓تبت على يديه🌓
💎بقلم : ايمان العماري💎
✨الجزء : 141✨
بعد مرور خمس سنوات  ...

نجاة : نهيلة و يله ابنتي طلقي راسك خوك و مراتو دبا هوما وصلو

نهيلة : وخا ماما وخا

نزلات فدروج بكسيوتها الحمرة وصبيبط كحل فرجليلاتها  وشعرها البني مطلوق على ضهرها عوينات خضيضرين مايلين البني تماما بحال ماماها  ... مشات تعلقات فجداتها من لور كضحك

نجاة : مروى

مروى : جدة مزال ماجات ماما و بابا

نجاة هزاتها عندها :  شوية  وتشوفيهم داخلين ابنتي

مروى : توحستهم بزاف  

نجاة : حتى هوما توحشوك ابنتي

نهيلة : مروى حبيبة اجي عندي وخلي جداك تسالي شغلها

مروى مدات يديداتها صغار وهزاتها نهيلة عندها خرجات بيها لبرا حتى بانت ليها طاكسي وقفات عند الباب نهيلة صغرات عينيها فشمس كتشوف فشكون نزل منها تابان ليها جاي جيهت الدار ديالهم ...

- سلام عليكم

نهيلة : و عليكم السلام و رحمة  الله

- كاينة نور

نهاية : و شكون نتا لي كتسول عليها

- تنهد بحرقة  نطق : انا محسين خوها

نهيلة بقات مدة كتشوف فيه تابانت ليها طوموبيل كحلة مرسيديس وقفات حداهم مروى تنترات من يدين  نهيلة ومشات كتعيوج فمشيتها عند ماماها نور كانت لابسة لباسها الابيض مغطية شعرها هزات بنتها عندها تاخرجات نجاة بصينية د الحليب والتمر

نجاة : عُمرة مقبولة اوليداتي

وسكتات وهي كتشوف فداك الشاب لي واقف قدامها

محسين ضار براسو هي تجي عينه على ختو وبدر الدين بقا كيشوف فيها مطول كيطلعها ويهبطها تبدلات بزاف هادي ماشي نور لي كان  ديما معها فالحرب .. لا هادي نور البنت المتحجبة ...  لي تابت على يدين زوجها سندها فالحياة لي وقف فجنبها  طول هاد سنين كان ليها نعم الزوج نور سرطات ريقها كتشوف فيه تبدل بزاف مبقاش محسين لي كانت كتعرف ... اللحية لي كان داير حيدها خلاها غير خفيفة لباسو تاهو تبدل  .... عينيه دمعو و هو كيشوف  فختو ... طاح صاكادو من يديه وفتح ليها يديه للعناق

بدر الدين شد من عندها بنتو : نور سلمي على خوك

نور بقات مدة طويلة كتشوف فيه فلخر مشات عندو عنقاتو كتبكي فحضنووو وهو ماشي قل منها كاع دموووع دهاد سنين كاملة لي دوزها فالحبس و الحرقة دالفراااق و ندم هاهو نزلهم  قدام ختو صغيرة

محسين : سمحي ليا اختي سمحيليا عافاك

نور بالبكا وشهيق : سمحت ليك اخويا

محسين بقى مدة معنق ختو تاحس بيد تحطات على كتفو ضار عندو كان بدر الدين

بدر الدين : على سلامتك

محسين : الله يسلمك ( وشاف فديك لبنيتة لي بين يديه ) الله يصلحها

بدر مدها ليه : امين

شدها من عندو محسين هزها بين يديه فرحان بيها ونور قلبها  قريب يسكت بالفرحة واخيرا شملها بخوها تجمع و صفاااو قلوبهم تاواحد مبقى هاز فقلبو من جيهت لاخور دخلو لدار مجموعين واجواء الترحيب والعناق مابغاتش تسالي عندهم ونور كملات اليوم فرحتها برجوعها هي وزوجها من العُمرة ورجوع خوها منبعد خمس سنوات دالفراق

#هادي كانت نهاية قصتنا .. قصة تبت على يديه .. 
قصة هدية مني ليكم وبالاخص لبنات لي بحالي و بحال نور متحررين ... كنتمناا تكونو ستافدو وخديتو عبرة من القصة ولي متحررة  بحال نور .. تراجع نفسها الدنيا مديماش الدنيا دروس وامتحانات ....