يوم جديد على الابطال
عند تالين وعزام كانو متوجهيين للمطار بالسيارة
عزام : عمري تبين تفطرين اول ؟
تالين : لا احس بعدين افضل
عزام : باخذ خفايف وبعدين ناكلهم طيب ؟
تالين اشرت له براسها بمعنى طيب
وصلو المطار وخلصو امورهم دخلو قاعه الانتظار
عزام التفت لها بابتسامه وشد على يدها : متحمسه ؟
تالين : امممم متحمسه شوي وخايفه بعد
عزام : ليه الخوف ياقلبي
تالين : يعني غربه وكذا وبعدين انت اذا رحت الدوام انا شبسوي طول اليوم احسني بطفش
عزام : ومين قالك بتجلسين انتي بعد بتدرسين
تالين : احس مالي خلق دراسه
عزام : لا حبيبتي لازم تدرسين الشهاده سلاح البنت بالمستقبل
تالين : عارفه بس احس
عزام : شوفي انا مابضغط عليك بس اذا وصلنا ارتاحي كم يوم وبعدها نروح نشوف الجامعات والمعاهد حبيتي تدخلي ابشري باللي يدخلك ماحبيتي نكنسل ولا يهمك
تالين بابتسامه: انا اقول خفف علي من ذا الدلع
عزام : وليه ياحبي انتي
تالين : لان بعدها بتدلع عليك وبتندم
عزام وهو يقرب منها اكثر : تدلعي ياحبيبتي مين ماسكك خذي راحتك
تالين بخجل : عزام حنا بالمطار لا تفضحنا
عزام : احم معك حق نسيت بس الله يهديك
تالين بضحكه : الله يهديك انتز
عزام بنفس الضحكه: ترا مو سبه
تالين : اي ادري بس ان حبيت اردها لك
عزام بهمس : اوريك اردها انا بطريقه ثانيه بتعجبك ياحلوه
تالين : الله يكفينا
عزام قاطعها بضحكة : شر مين ياعسل انتي
تالين : ولا شي ولا شي انسى
.........
عند توت صحت من النوم وخلصت امورها ونزلت تحت تسوي الفطور لابوها انصدمت انه جالس ويفطر وقمر جنبه
توت بهدوء : صباح الخير يبه
ابو خالد : صباح النور هلا يبه تعالي افطري
توت : ها انا ؟
ابو خالد : اي يبه انتي مين غيرك تعالي
توت : لا بس بالعافيه انا الحين مابي
ابو خالد: مايصير يبه تعالي جنبي
جلست وهي منصدمه من تغيير ابوها عمره م قال لها تجي تفطر اصلا م كان يهمه اذا افطرو والا لا
اخذ لقمه ومدها لها : كلي حبيبتي
توت ناظرته بصدمه وفتحت فمها واكلت وهي ملاحظه نظرات الحقد بقمر
قمر : يابو خالد الله يهداك البنت مو صغيره تقدر تاكل بنفسها ، قومي ياتوت جيبي لابوك ماي
ابو خالد بحده : بنتي وكيفي وقومي انتي جيبي الماي
قمر : انا ؟ شفيك ياعبد الملك بنتك تقوم وخلاص
ابو خالد بصراخ : ماااسمعتتتيي شقلتت ؟؟
قمر : سمعت سمعت
قامت قمر تحت انظار توت اللي تناظر باستغراب
توت : اءءء يبه فيك شي ؟
ابو خالد : لا يبه مافيني شي من يوم ورايح مابسمح لاحد يأذيك واسمحي لي يابنتي على اللي مضى
توت بغبنه : صدق يبه يعني بتتغير
ابو خالد : بعون الله محد بيقرب لك طول م انا عايش
توت من حماسها بتغيير ابوها قررت تقول له عن القضيه حكت له كل شي وتوقعت رده فعله عنيفه بس صدمها برده فعله ابتسم ومسك يدها وشد عليها : سوي اللي تبينه وانا وراك وبظهرك و واثق فيك انتي وخواتك عسى الله يقدرني و اعوضكم عن كل شي
ابتسمت ودموعها صارت تطيح على خذها ضمته بقوه وهي تشهق وتبكي : عسى الله يخليك لنا ومايحرمنا منك يبه ماتتخيل كيف انك ريحتني عسى الله يريح قلبك مثل م ريحت قلبي ويخليك لنا سند وظهر
ابو خالد بابتسامه مسح على ظهرها وبعدها : اقول لا تفكري اني بنسى موضوع الفطور كذا يلا قولي بسم لله
جلسو يفطرو وجتهم قمر بالماي حطت الماي وجت بتروح
ابو خالد: ويين
قمر : ابد مو جوعانه كل انت وبنتك
ابو خالد: بكيفك بس بعدين بخليك تشيلين الفطور وبطلع انا وتوت نجيب اغراض للبيت
قمر : وليش م تشيل الفطور بنتك
ابو خالد : اسمعيني زين ياقمر انا قلت كلمتي و كلمتي م تنكسر فاهمه ؟؟ انتي اللي بتشيليه
قمر بانكسار : ابشر
راحت وظلت توت تفطر مع ابوها
توت : يبه بعد اذنك ابي اسالك
ابو خالد : اسالي ابوي انتي
توت : وش اللي غيرك على قمر كنت تموت فيها
ابو خالد بتنهيده : وش اقولك ياتوت فتحت عيني وانا ابوك بتاخد جزات ظلمها وتكبرها
توت ظلت ساكته وتناظر في ابوها وهو كل شوي ماد يده يأكلها مو مستوعبه ان هالشخص نفسه الشخص اللي كانت بين يدينه قبل كم يوم ومارحمها
............
عند يوسف صحا من النوم ونزل تحت حامل كتبه
هديل : غريبه وش اللي مصحيك
يوسف بنفسيه : يعني عندي كتبي وش اللي مصحيني رايح بارتي انتي ووجهك ؟
هديل : يعع محد يسالك شي يالنفسيه
يوسف : توني صاحي وش تبين اقوم ارقص لك
هديل : رقصت بجهنم ياسخيف
ام فواز : خلاص عاد انتي و ويا احترمو وجودي ، وانتي يلا للمدرسه السايق ينتظرك
هديل : يمه تو الناس
ام فواز : الساعه ٨ الصباح وتقولين تو الناس بدت الحصص الاولى اخلصي قووميي
هديل : زين يلا بقوم
لبست عبايتها وطلعت جلس يوسف مكانها وبدا يفطر
ام فواز : وانت يا استاذ يوسف
يوسف : سمي يمه وش بغيتي
ام فواز : صار لنا كم نقول لك بنروح لاخوك
يوسف: م اتفقنا اليوم الظهر نزوره وانا كلمته امس واليوم بنتغذا عندهم بس يمه تكفين اذا رحنا لا تجيبين طاري جامعتي قدامه تعرفينه بيجلس ينصح ومدري ايش مالي خلقه ترا
ام فواز : انا ابي اعرف ليه تكره اخوك
يوسف بصدمه : صلي على نبيك يمه لا اكره ولا شي والله ان اغلى شخص عندي بس ما احب النصايح الخايسه يحسسك الدراسه كل شي في الحياة
ام فواز : وهو صادق طيب
يوسف : ياخي مابي اكمل تراني مكمل بس كذا علشانكم والا انا مو حق دراسه
ام فواز : انت بتوجع راسي قوم روح جامعتك
يوسف بضحكة باس راسها : فديت هالراس يا ام فواز خلاص ابشري بروح بس ها انتي الصباح لا تجلسي فاضيه دوريلي بنت الحلال
ام فواز : اذلف يلا
طلع من البيت وهو يضحك متوجهه الى اقرب سوبر ماركت
........
عند توق صحت شافت نفسها بحضن فواز وهو صاحي ويلعب بشعرها وخرت عنه بسرعه
توق : خيير ؟
فواز : خير بوجهك وش اللي خير
توق : لا تستعبط وش جابك انت
فواز : وشو اللي وش جابني تراك انتي اللي بحضني
توق : ماجيت كذا انت اللي اخذتني بحضنك
فواز: ايي اخذتك بحضني عندك اعتراض ؟
توق : وخر وبعدين مين طلب منك تنام معيز
فواز : انا م انتظر احد يطلب وهذا بيتي انام وين م ابي مو شغلك
توق : نام وين ماتبي بس م تجي تنام جنبي
فواز : انتي ناسيه انك زوجتي
توق : وليه م قلت هالشي لنفسك لما زعلتني امس
ولا ياليت جيت واعتذرت جيت ونمت بكل بجاحه
فواز : ضميتك هالشي م يغفر لي ؟
توق : لا مايغفر
فواز : ياتوق عاد العناد من الصبح عاد
توق : مو عاجبك روح اذلف نام بغرفتك وبعدين العاملات هنا ماتستحي تنام جنبي لو دخلت وحده منهم
فواز : هيي انتي تراني نايم جنب زوجتي مو احد غريب
توق : زوجتك اوقات و اوقات صح ؟
فواز تنهد وقام عنها : انتي لو احاول فيك من اليوم لين السنه الجايه مابتعترفي بغلط
توق بصوت عالي علشان يسمع : ع اساس انت اللي تعترف انت الغلطان وبعد بكل بجاحه يبي يقلب الطاوله علي السخيف
كلها دقايق ورجع فواز لابس لبس الدوام
توق : خيير على وين
فواز : يعني لابس لبس الدوام على وين يعني
توق : يعني مو هامك الموضوع عادي ازعل اموت عادي مافرقت معك صح
فواز : لا فرقت و فرقت كثير بعد بس شسوي لك اذا انتي عنييده
توق : منك انت اللي امس غلطت عليي
فواز : تعالي تعالي نجلس
اخذها وجلسها وجلس جنبها وهو ماسك يدها : توقي
توق : هممم
فواز : ادري امس تسرعت معك حق بس حطي نفسك مكاني زوجتي تبي ترفع قضيه على شخص انا ما اعرفه والله ماتحملت ياتوق شي ينرفز مين ذا الشخص وليه لهدرجة خايفه منه وتبين ترفعي عليه قضيهز
توق : انت امس لو سمعتني كنت بتفهم القضيه مو لي يافواز
فواز : لمين طيب قول لي لمين
توق : اذا قلت لك بتساعدني ؟
فواز : تستهبلين انتي اغلى انسانه عندي اكييد بساعدك
توق جايت المصحف وحطته جنبه : احلف
فواز بصدمه : توق شفيك مو واثقه فيني
توق : لو الموضوع انا كان ساهلات بس الموضوع مو انا يافواز
فواز : بدون حلفان لك اللي تبيه وابشري
توق : طيب الموضوع يخص توت اختي
فواز: شفيها اختك
توق : توت صارت لها حادثه قبل سنين طويله
فواز : وش الحادثه
توق :
قبل سنوات كانت توت اسمها تالا وكانت بنت غيير عن اللي تعرفها الحين تضحك طول الوقت وطول اليوم ترقص وتلعب كان تقريبا عمرها هذاك الوقت ١٢ سنة كانت توها بالمتوسط في يوم من الايام جتنا البيت ترجف وتبكي بسبب شخص حقيير كان نايف ولد ****** هذا الشخص احقر انسان ممكن تتخيله انسان مهووس بشكل مريض يحاول يتحكم بكل شي حوله بسبب تعوده ان الكل يلبي حاجاته صار مريض ومهووس متعود على البنات الرخيصات اللي مثله حاول كثير يتحرش في بنات المدارس وكان يخدعهم بنيه الزواج ويلعب بمشاعرهم واول وحده قالت له لا تسلط عليها وصار يبيها بالغصب حاول يعتدي على توت اكثر من مره وخطفها بس كان في ضابط الله يرحمه حاول يدافع عنها
"فلاش باك"
كان نايف خاطف توت بمستودع مهجور و كانت تصرخ
توت : تكفى وخررر لاااا تكفى ساعدووونيي مافيي احد هنااا تكفووونن
نايف : ميين اللي هنا حبيبتي مافي غيرنا والحين بيجي الشيخ علشان نملك
توت ببكي : يامرييض انا لسى صغيير اي ملكة ذي توني بالمتوسط
نايف : تالا حبيبي اششش شوفي جايب لك فستان
ناظرت توت بصدمه وكان بالفعل في فستان ابيض معلق صارت ترجف بخوف ونطقت: و ش ت بي مابي اتزوجك تكفى
نايف: انا ماعمره احد قال ليي لاا كل شي اقوله يقولون لبيه وتم الا انتي جبتي راسي بعنادك وطفولتك من اول ماشفتك عند المدرسه وانتي ماخده تفكيري ابي اخذك ليي ابي نعيش حياه حلوه بتحبيني كثيير ادريي انك جالسه تنظلمين عند ابوك تبيني اذبحه علشان زعلك ؟ عادي قولي
توت برجفه وبكى : مرييض انت تكفى لا تسوي شي لابوي
نايف : قومي يلا البسي الفستان والا بتزعليني منك وانا اذا زعلت منك باخد اغلى شي عندك بالغصب فهمتي علي صح
توت برجفه فهمت قصده قامت وهي تشهق وتبكي: ط ي ب اطلع ابي البس
نايف بضحكة : حبيبي انا بصير زوجك عادي لو لبستي
قاطعته : لاا تبيني البسه بتطلع غير كذا لاا
طلع نايف وصارت توت تدور اي مكان تطلع منه بس مالقت استسلمت وصارت تلبس الفستان وهي تبكي وتتوسل وتدعي لربها : يارب انت اللي اخرجت نبينا يونس من بطن الحوت يارب اللهم يا وليَّ نعمتي ، وملاذي عند كربتي اجعل ما أحذره وأخافه برداً وسلاماً عليّ كما جعلت النار برداً وسلاماً على سيدنا ابراهيم
جلست وهي ترجف وضامه نفسها وتكرر الدعاء كلها دقايق وسمعت صوت اسلحه ضمت نفسها بقوه وهي ترجفف بقووه جتها القوه وقررت تطلع تشوف برا
ماطلعت الا شايفه ضابط مقتول على الارض و نايف ماخذينه الشرطه ثواني وجاها عسكري وساعدها
" الواقع "
توق : خطفها اكثر من ثلاث ايام ومن بعدها توت ماحبت اسمها تعقدت كثير كرهت كل شي حتى نفسها كرهت تاكل معنا وصارت تجيها نوبات اذا احد نادها باسم تالا تصارخ وتبكي بصوت عالي و ماتطيق احد يلمسها تتحسس من اي كلمه تنقال و ماتثق في احد هذا غيير الكلام اللي يضيق الصدر اللي كانت تسمعه من قمر ومن ابوي حاولنا كثير نطلعها من ذي الحاله بس ماقدرنا وديناها لشيخ بعد معاناة باقناع ابوي و من بعدها كذا اضطريت اغير حياتها كلها غيرنا اسمها ومدرستها حتى غرفتها وكل شي يخص تالا غيرناه وكننا خلقنا من تالا الضعيفه توت القويه اللي تسمع عنها وتشوفها بس طبعا نايف واسطه ابوه طلعته من اللي كان فيه وماصار فيه شي وراح حق الضابط وحق توت وكننا متوقعين اننا خلصنا منه بس للاسف هالشي ماصار لان لازال يحاول يتقرب منها ف من بعد ماتعرفت على رهف اقترحت على توت اننا نجرب مره ثانيه نرفع عليه قضيه وماقدرت اقولك لان كل شي صار بسرعه الموضوع مايخصني لو يخصني قلت لك والله
فواز ناظرها بهدوء ونطق : وين قلتي ليي مات الضابط ؟
توق : بالمستودع اللي بشارع ******
فواز شك ان ممكن يكون الضابط اللي نقتل ابوه بس حب يتاكد ماحب يضايق توق اكثر ضمها بقووه ونطق : اسف حبيبتي ماكنت ادري بهذا كله
توق : بتساعدني ؟
فواز : اكييد واذا طلع اللي في بالي صح محد بياخد روح هالنايف غيري
توق بخوف : وش اللي في بالك يافواز
فواز بابتسامه مزيفه : ولا شي حياتي يلا تبين شي
توق : استودعتك الله ياحبيبي
فواز باس راسها ومشا طلع متوجهه عند حسين يبي يعرف كل شي يخص نايف واللي صار كله
...........
عند توت وابو خالد وصلو السوبر ماركت
ابو خالد : يبه توت روحي خذي اللي تبيه وانا باخد احتياجات البيت
توت : صدق اخذ اللي ابيه
ابو خالد بابتسامه حنونه مد لها البطاقه: بس ها م تفلسيني ها
توت : ابشر
راحت متوجهة قسم المشروبات انصدمت من شافت يوسف هناك
يوسف : انتي ؟
توت : يليل على حظي
يوسف : شفيك كذا
توت : وش تبي الحين
يوسف : شنو وش ابي
توت : مطول ؟
يوسف : كنت بتطمن عليك من اخر مره وبرسل لك بس خفت تفهميني غلط
توت: انا اللي كنت بعتذر على اسلوبي معك المفروض اشكرك بس اذا تبي تتطمن علي بخير بس تضايقت من اسلوبك
يوسف : وشلون اراضيك
توت : اشتري لي بيضه كندر
يوسف : الظاهر اللي بيدك بطاقه بنك تقدري تشتري لنفسك
توت : في شي اسمه انك تراضي بشي بسيط
يوسف بحسن نيه : اذا تبين اراضيك بشي ثاني
توت بحده : شقصدك ؟؟
يوسف : لحظه يابنت الحلال لا تفهميني غلط قصدي اجيب لك القطوه
توت بهدوء: اها طيب جيبها نتفق بعدين باي
مشت وهي منصدمه من نفسها من بعد سنين طويله اول مره تتكلم طبيعي مع رجال وحاسه بشعور غريب بس تجاهلته وراحت تكمل تسوق مع ابوها ويوسف طلع متوجهة الى جامعته
.........
عند تالين وعزام ركبو الطائره تالين كانت خايفه اول مره تركب طائره اغلب سفراتهم كانت بالسياره وكانت قريبه عزام كان ملاحظ هالشي ومراعيه اول مابدت الطائره تتحرك مسكت يد عزام بقوه ابتسم وشد على يدها ونطق : بسم لله عليك حبيبي مافيه شي شوي بس وبتستقر الطائره مابتحسي فيها
ثواني بس وهدأت تالين التفت لها عزام : ها ياقلبي كيف
تالين ابتسمت وحطت راسها على كتفه: احسن
التفت انتباهمم طفله صغيره تطل عليهم من الكراسي اللي قبالهم ابتسم ونطق : النتفه اتوقع اعجبت فينا
رفع راسها تالين وشافت الطفله تناظرهم بابتسامه
عزام : ودك يكون عندنا بنوته مثلها
تالين وهي تناظره: تحب تكون ابو لبنت؟
عزام : ايي وليش لا
تالين : مدري يعني اسال بس
عزام باس راسها ونطق : الله يرزقنا ياحبيبتي مو مستعجلين اول شي تكملين دراسه وبعدها لعيال لاحقين عليهم
ابتسمت ورفعت راسها اشرت له ان يحط راسه بحضنها ابتسم وحط راسه وصارت تلعب بشعره وتسولف معاه
.........
بعد مرور ساعات وتحديداا وقت الظهر
عند توق جهزت الغذا مع العاملات وركبت فوق تجهز لجيه اهل فواز تروشت وسوت شعرها لبست لبس كاجوال وحطت مكياج خفيف ابتسمت من سمعت صوت فتحت الباب وكان فواز
فواز : وااو انستي الحلوه وش ذا الجمال
توق بابتسامه قربت وضمته بقووه بحيث صارت رجلينها على خصره(ان شاء الله اني قدرت اوصف لكم )
فواز : اف اف وش ذا الحماس حبيبي
توق : مو حماس على كثر ماهو شوق لك بس
فواز : وانا اشتقت لك بس عاد توني راجعه من الدوام اكييد ريحتي خايسه
توق ضربته على ظهره بخفه : جب م اسمح لك تقول هالكلام عن نفسك
فواز : قلبي خليني اتروش وبعدها
نزلت ودخل يتروش طلع وماكانت موجوده توق بالغرفه لبس وخلص وجا عند المرايا يضبط شعره دخلت عليه بالبخور وهي مبتسمه
توق : والان حضره الاستاذ فواز جا وقت البخور
فواز : يالبيييه يلا تعالي بخرينا
حطت المبخر بالوسط بينهم وتبخرو تبسم فواز وباس راسها بقووه : الله لا يحرمني ياحلوتي
توق : تصدق احسن شي اني مو مضطره امثل قدام اهلك
فواز : شلون يعني
اخذت المبخر و وخرته وقربت منه حطت يدها على صدره وقربت منه شد على خصرها وقربها اكثر
توق : اقصد مايحتاج امثل اني احبك
فواز : لانك اصلا
قاطعته توق بسرعه وابتسامه : احبك
فواز ضحك وباسها بقووه : احييه وانا اموت فيك
توق : ننزل حبيبي
فواز : لسى ماجو
توق : الحين يجو ، صحيح شصار على موضوع رهف
فواز : بكرا الصباح تاخذين توت وتروحي لها علشان تبدا باجراءات القضيه وان شاء الله تتخلص منه وترتاح
توق : طيب مابتقول لي اللي في بالك ؟
فواز : لا تشغلي بالك كنت مفكر ان نايف هو اللي قتل ابوي بس لا طلع مو هو
توق : كيف عرفت
فواز: لان عرفت هويه الضابط اللي انقتل مو ابوي ابوي انقتل بعده بفتره بس لا تخافي بعرف مين قاتله
توق : لا تسوي شي يضيعك ويضيعني معك يافواز
فواز : لا تخافي حبيبتي مابيصير الا اللي كاتبه ربك
.......
عند قمر كانت البيت فاضي كانت جالسه ومقهوره من توت ومن ابو خالد
قمر : شسوي فيها ذي البنت ضروري ادور لها معرس وافتك منها
قاطع افكارها صوت الباب قامت وبغباء فتحت الباب كامل مفكره انه ابو خالد وتوت بس سحبها شخص متلثم كان هالشخص نايف ومسكها من رقبتها بقووه وحطها على الجدار ونطق بحده : اذا اسمع مره ثانيه انك حاولتي تأذي حبيبتي تالا ياويلك فاهمه بذبحك بيدي
تركها وصارت تكحح بقوه
نايف : سمعتي وش قلت هالمره مرت على كذا المره الجاية ذابحك فاهمه
جا بيمشي بس وقفه عند الباب صوت قمر : تبيها ؟
نايف التفت لها ونطق : اكييد
قمر : انا بعد ابيها تروح وارتاح منها عندك حليين يا تخطفها يا تتزوجها وانا اقول الخيار الثاني افضل اقدر اقنع ابوها بزواجك منها عندك ثلاث ايام تعال اخطبها فيه
سكرت الباب وهي تخطط لزواج توت من نايف بهدف انها ترتاح منها وتفضى لابو خالد وتاخذ منه كل شي
نايف اول ماسمع كلام قمر ضحك بقوه وقرر ياخذ توت من ابوها وغصب عنه اخذ جواله ودق على رقم
نايف : جهز كل شي قررت اتزوج واتوقع عارف مين العروس وباخدها برضا ابوها والا بالغصب بس انت خلك جاهز بكل الاحوال لو صار رفض تتصرف وتخلصني من عبد الملك
سكر وتوجه لسياره بخبث وهو ينطق : اخيرا بتصيري حلالي ياتالا
.........
توقعاتكم
- كيف بتكون حياة تالين وعزام في بريطانيا وهل بتواجه صعوبات هناك
-رايكم بعلاقه يوسف وتوت
- وش علاقه الضابط اللي انقتل في ابو فواز
- هل بتنجح خطه قمر ونايف
- رايكم بعلاقه رهف وتوق وهل بتستمر في البارتات الجايه والا رهف بتكون ضيفه بس
اكتبولي رايكم بالبارت وتوقعاتكم للجاي قراءة ممتعه للجميع 🤍.
