قبل ما تبدأو قراءه ادعو للثانويه العامه ان ربنا يجبر خاطرهم ويحقق أحلامهم ♥️
______________________________________
_ صاحبي يا صاحبي عم الناس
= ازيك يا مليكه
_ ايه مليكه دي معلينا خد الايس كريم بتاعك اهو علشان تعرف اني جدعه ورجوله وروحت جبت انا مع أن انت معايا والمفروض انك تروح انت تجيب علشان انت الراجل وكده بس يلا مش مهم كده كده جمايلي مغرقاك
= مليكه انا عاوز اقولك حاجه
_ الله طعمو حلو اوي ياض يا محمد
= مليكه ممكن تسمعيني
_ ايه مليكه الي انت مسكهالي دي انا مابحبش مليكه دي منك انت ديما بتقولي يا لوكه وبعدين كل بقي الايس كريم هيسيح وهيبقي طعمو وحش وانجز علشان نشوف هنروح فين
= ا......
_ صحيح ماقولتليش ايه رايك في القطتين الي انا عملاهم في شعري دول
= حلوين اوي شبه الطفله فيهم
_ والله انا طفله فعلا في واحده عندها 22 سنه نازله بسلوبيت جينز تحته تيشرت ابيض عليه ميكي موس وعامله قطتين في شعرها سبحان الله والله السن ده رقم بس فعلا
فضلت باصص في الأرض مش عارف اقول ايه ، دي طريقتنا ديما مع بعض بنكون بمنتهي العفويه بنتعامل علي طبيعتنا جدا بس المره دي انا فعلا مش عارف هقولها ايه ومش عارف رد فعلها هيكون ايه .
مليكه بتلذذ : امممم تحفه ، في ايه ياض انت ساكت كده ليه وكملت وهي بتبصلو وبتغمزو بايديها : مالك
محمد وهو باصص في الأرض : عاوز اقولك حاجه مهمه
مليكه وهي بتكمل اكل : محمد بالله عليك أنجز خلينا نشوف هنروح فين انا لحد دلوقت حيرانه مش عارفه هنعمل ايه
محمد : مليكه انا بتكلم بجد
مليكه وهي بتبصلو : ده الحوار بجد بقي وكملت وهي بتقف قدامو وبتبصلو : في ايه ، في حاجه صح
محمد وهو بيهز راسو : ......
مليكه : اكيد في حاجه ما انت عمال يا مليكه يا مليكه وانت عمرك ما قولتلي مليكه دي ، في ايه يا محمد مالك
محمد : ا...انا ا...انا ا.....
مليكه : في ايه يا عم هو انت بتتعلم الكلام ما تتكلم علطول قول في ايه
محمد : ا...انتي انتي عارفه اني بقالي فتره تعبان وروحت للدكتور وكده
مليكه : ايوه وطلعو شوية برد في جسمك والحمد لله بقيت كويس
محمد : ب...بعدها بكام يوم الدكتور كلمني وطلب تحاليل تاني وقالي انو عاوز يطمن وكده
مليكه : ماقولتليش انت الحوار ده
محمد : ك...كنت فاكر انو عادي شوية تحاليل والموضوع هيخلص
مليكه : هاا
محمد : عملت التحاليل والنتيجه طلعت امبارح والدكتور كلمني و...وقالي ا.....
ملكيه : قالك ايه
محمد : ق...قالي ا...ا...
مليكه : ما تخلص يا محمد ايه اللعب بالاعصاب ده انت عارف اني مابحبش كده
محمد : قالي اني عندي كانسر
اتصدمت كأن حد جيه من ورايا ضربني علي دماغي ضربه جامد اوي كأن حد كب عليا مايه ساقعه تلج في الشتا ، بقيت مذهوله بصالو وساكته متنحه وهو باصص في الأرض ، محمد صديق طفولتي صاحب عمري الي مؤخرا من سنه بقي خطيبي ، محمد كان جاري كنت بلعب معاه في الشارع من وانا عندي خمس سنين كبرنا وبقينا نقرب لبعض اكتر وبقينا اقرب اتنين لبعض بقي صاحب عمري اقرب واحد ليا في الدنيا اكتر حد فاهمني في الدنيا يمكن فاهمني اكتر ما انا فاهمه نفسي فضلنا مع بعض طول حياتنا بنعمل كل حاجه مع بعض بنفرح مع بعض بنزعل مع بعض بنتوجع مع بعض ديما مع بعض اكتر واحد في الدنيا بتعامل بطبيعتي معاه اكتر حد في الدنيا بكون مرتاحه معاه اكتر واحد ببقي متاكده اني لو ميلت عليه هيسندني الوحيد الي لو لجأتلو هيحميني ويساعدني طول عمرنا سوا محمد اغلي بني ادم عندي في الدنيا لحد ما من سنه قالي انو بيحبني وانو عاوز يتجوزني وافقت لاني فعلا مش هلاقي حد زيو ولا حد يفهمني ويحبني قدو ولا انا هعرف اكون بالراحه والعفويه دي مع حد غيرو بس الحقيقه اني عمري ما اتعاملت مع محمد برسميه علي انو خطيبي بقي وكده لا طول عمري بتعامل معاه علي انو صاحبي بحكيلو كل حاجه من غير ما افكر بقول كل الي انا حساه وانا متاكده انو هيفهمني علاقتنا مريحه اوي وانا بحبها اوي واني اسمع خبر زي ده وكمان محمد يبقي حقي اتصدم .
حطيت الايس الكريم علي العربيه وبصتلو وانا بجد مش عارفه اتكلم من صدمتي .
