و عند الحريم بـ الصاله
ام خلف : مبروك مبروك ربي يتمم على خير
ام محمد : امين يارب
ام فيصل : امين يارب عقبال الباقي
ام فهد : امين يارب
ام عبدالرحمن : ايوا ويش يسوون البنات الحين
ام خلف : يجهزون نفسهم من فساتين و تسذا
ام فيصل ضحكت : مسرع ليه
ام فهد : لازم يخلصون نفسهم من الحين
ام محمد : ايه صادزه
'
و عند العيال ب المجلس
صقر : مبروك يخوك عسى ربي يوفقكم و يهنيكم
محمد : الله يبارك فيك و عقبال الباقي
حسين : امين امين
ضربه راكان على كتفه و ضحك : حسينووه من تبي
سالم : ورعان اهجدوا
راكان : سم طال عمرك
'
و ف بيت ابو روضه
عند روضه الي كانت ب غرفتها بكامل انهيار بعد م وصلها العلم انه محمد انخطب و راح الي كانت تتمناه يرجع و امها الي تحاول تهديها
ام روضه : بس ي روضه بس
روضه بصوت عالي : وش الي بس تدرون انه راح بسببه ولا انا موافقه عليه قسم بالله ي يمه م اسامح ابوي على ذي الحركه
ام روضه : استهدي بالله ، خلاص الولد انخطب ربي يوفقه يعني وش تبينه يسوي يقعد ينطرس اكيد امه تبي تشوف احفادها وش فيك انتي
روضه انهارت و م قدرت تتحمل : اهه ي يمه اهه كان الأمل الوحيد الباقي لي اهه بس
طلعت امها و تركتها لحالها
'
و عند ريهام الفهد ب الغرفه
فهد : ريهامي وش فيتس ياعين فهد ؟
ريهام ابتسمت وقالت : ابد والله تعبانه شوي
فهد : عسى ما شر بسم الله عليتس
ريهام : ابد لا تحاتي انت انزل و اذا فيه شي بعلمك
فهد : اكيد !
ريهام : ايه اكيد
فهد : طيب يلا انتبهي
ريهام : تمام حبيبي
'
و عند بيان بـ غرفتها
بيان : خلوف وراك م نزلت لتحت ؟
خلف ابتسم وقال بهدوء : مصدع شوي
بيان قربت منه وقالت : بسم الله عليك وش فيك
خلف : يوه ي البيان والله م فيني شي لا تحاتين كلها صداع من الشغل و حوسه و غيره
بيان راحت لغرفتها تاخذ علاج مسكن الألم و اخذت كوب ماء : يلا سريع كل لك حبه
ضحك خلف و سحبها لعنده : م قلت لس م فيني شي !
ابتسمت بحنية : عشاني طيب !
م قدر يقاوم حركاتها الطفوليه الي تجذبه : لعيونس م نقول لا
باسته على خده و ضحكت : ايه شاطر
خلف : مو كذا ي بيان
ضحكت وقالت : اقول كل و خذ لك غفوه بصحيك على المغرب
خلف زفر براحه : طيب
اخذت سيف لحضنها و نزلت للمجلس عند البنات
'
و عند البنات ب المجلس
ديم : يوه بنات وربي التوتر لاعب فيني لعب
اميره : ليه يعيوني ليه
ديم : ياخي مدري
بيان : إذا عشانك م تعرفين محمد واجد ترا م يوتر عادي م اكون بيان إذا م حبيتوا بعض
ضحكت نيلان وقالت : اي والله صادزهه
بيان : و اعطيس اكبر مثال الجوهره و ريهام تزوجوا وهم م يدرون عن رياجيلهم شي و هذا هم م تلقين احد زيهم يحبون بعض مرره ! الله يديم محبتهم
ديم : بياننن احبتسسس وربيي
قاطعتهم ام فهد بدخولها : بناتي بسألكم وين ريهام
سُميه : والله يميمتي مالها حس هاليوم
ام فهد : بسم الله مو عوايدها والله ، اطلعوا وحده منكم تشوفها
بيان : اناا بروح لها
ام فهد : تمام يلا عجلي
بيان : طيب أمور امسكي سيوف
طلعت مسرعه لعند ريهام و دقت الباب
بطلت ريهام الباب : هلا والله
بيان : هلا فيتس
ريهام : حياتس
دخلوا الغرفه و جلسوا على الكرسي
ريهام : معليش والله الغرفه مكركبه
بيان : يوه محد غريب عادي
ريهام : ايه عسى ما شر
بيان : وش فيتس مختفيه مالس لا حس ولا خبر
ريهام : والله ي بيان اقولتس الصدز تعبانه شوي
بيان : بسم الله عليتس من ويش
ريهام : مدري والله ، الفجر جاني مغص مو طبيعي و قبل شويه استفرغت ( أكرمكم الله )
بيان : اووه اووه ريهام يمكن تكونيين حاامل م فحصتي؟
ريهام : لا والله عندس جهاز الفحص؟
بيان : ايه عندي ثواني بجيبه
طلعت مسرعه و دخلت الغرفه تدور بين الادراج و فز عليها خلف فتح طرف عينه وقال : بيان وش فيتس رجعتي؟
بيان : هاه ابد ارجع نام
و اخيرا لقته و طلعت بهدوء و اتجهت لعند ريهام
بيان : خذيه
ريهام : تمام اصبري هناا لا تروحينن
بيان ضحكت : طيب
دخلت ريهام الحمام ( الله يكرمكم )
بعد دقايق بسيطه طلعت وهي مصدومه : بيان عانييي
بيان سحبت الجهاز من عند ريهام : وووولل مبرووكك
ريهام : يويلي ذا حلم ولا علم
بيان : عللمم وانا اختس علممم
ريهام ضمتها بفرح : يوهه الحمد لله ياربي
بيان : طيب اسمعي انتي روحي المستشفى تأكدي افضل
ريهام : ايه صادزه
بيان : تنزلين ولا؟
ريهام : بشوف كيف
بيان : تمام
'
و فبيت ذياب :
الجوهره : ذيابي
ذياب فز عليها وقال : لبيه ي روحه
ابتسمت وقالت : طالع ؟
ذياب : ايه رايح للعيال متجمعين فبيت عمي ابو سلطان
الجوهره : ايه حلو اجل ابيك تنزلني عندهم بعد البنات هناك
ذياب : طيب جهزي نفسس و خلصي منتظرس
الجوهره : امسك بنتك ثواني وبجي
ضحك و اخذ نجد لحضنه : طيب عجلي
'
و على المغرب فـبيت ابو سلطان تحديداََ
ف المجلس عند البنات
بيان : هلا والله جوجووو
نيلان : ودلببووسيييي
الجوهره ضحكت : هلا فيكم حبايبي
ود : هاتي هاتي بنتس
الجوهره : امسكي
اخذت ود نجد لحضنها و ابتسمت : يقلبي تبارك الله
نيلان : اويلي اويليي
بيان : جت نجد و نسيتوا سيفي !
اميره قربت وهي تاخذ سيف ل حضنها : عيوني سيوف محد يحبه كثر عمتتهه
بيان : يحظهه والله
سيف وهو يهمس : بباا..باا = ( بابا )
بيان : يوه سيوف وش فيك م عرفت اميره
اميره : افا ي ذا العلم معاد يبغاني
فزت و ضربت رأسها بخفه : يوييليي ويلااه نسيت اصحيي خلفف
ضحكت اميره : اركضييي
طلعت وهي تركض بسرعه و فتحت الباب بقوه و دخلت وقالت : خلليف قم قمم اذن المغرب
خلف تهمهم بتعب وقال : همم
بيان : يلا عاد قم
جلست وهي تحاول تحبس أنفاسها و قام خلف : وش فيتس بسم الله بشويش على نفسس
بيان : نسيتكك وانت نايم
ضحك وقال : م راح اطير يعيوني بشويش
ابتسمت وقالت : ايه صح بعدك مصدع ؟
ابتسم وقال : والله من اشوفتس يروح الصداع والي معه
ضحكت وقالت : يوه قم قم اكيد يبونك تحت
قام و دخل للحمام ( الله يكرمكم ) ياخذ شور و طلع بدل ملابسه لبس ثوب اسود و لبس ساعته و عدل شماغه و رش عطره العّود المعروف ! و طلع و كانت بيان ب الغرفه قاعده تعدل الميكب حقها ابتسمت وهي تشوفه من طرف المرايه وقالت بحنيه و حُبَ : يارب اني استودعتك حبيبي وكل دنيتي !
ابتسم وهو يسمعها وكرر نفس الجمله : يارب اني استودعتك حبيبتي وكل دنيتي .
فزت و قامت من مكانها و قربت لعنده وهمست ف اذنه : احبك تدري ولا م تدري !
خلف شدها عليه وقال : اهيمتس يروح الخلف انتي !
ضحكت وقالت : طولنا خلاص رح يلا
ضحك وقال : اصبري عليي بس
ضربته على كتفه بخفه و نزلت لعند البنات
اميره : سلامات والله م بغينا !!
ضحكت بيان وقالت : ولد اخوتس الي يقعد عنده معاد يبغى يروح
غمزت لها وقالت : اووه اوه لذي الدرجه لعب فيتس ههههههههههههههههههههههههههههههههههههههههههههههههههههههه
بيان : اييه لعب فيني والله
سُميه : تهقون بلاقي واحدن زي خلف و الفهد و ذياب ؟
نيلان : م فهمت ؟
سُميه : يعني بلاقي واحدن زيهم يحبون حريمهم هلكثر
ود : ان شاء الله بنلاقي ان شاء الله هههههههههههههههههههههههههههههههههههههههههههههههههههههه
'
و ف المجلس تحديداََ
طلع سالم من المجلس و صادف فلاح برا : فليييحح يوللدد
ضمه فلاح بعد انقطاعهم فتره عن بعض : سلومم يوه ي كثر الشوققق
سالم : وجع أن شاء الله علامك م ترد عليي
فلاح حك شعره وقال : غيرت رقم
ضربه على كتفه وقال : لين متى بتقعد تغير لي كلشوي رقم
ضحك وقال : خلاص خلاص اخر مره
سالم : م علينا والله وحشتني ياخي
فلاح : وانتت بععد
سالم : تعال تعال العيال داخل
سحبه فلاح وقال : اصبر وش الي تعال اخاف ازعجكم
سالم : يمال الوجع ي فلاح تزعج من تراهم جماعتنا تعرفهم
فلاح : طيب امش
دخلوا للمجلس و جاء بعدهم غيث م لحق يدخل لأنهم قفلوا الباب دق الباب و م حسوا على صوت الباب الا البنات لأنهم كانوا قريبين من الحوش
اميره : منهو جاء الحين
بيان : روحي افتحي طيب
اميره : ثواني
تقدمت اميره و فتحت الباب و تجمدت من شافت غيث بحكم انها تعرفه و شافته من قبل يوم جاء لهم
ابعد غيث انظاره احتراما لها : السلام عليكم
اميره بتوتر : عليكم ال..سلام تفضل المجلس هناك
ابتسم بهدوء و دخل بعدها
أسرعت اميره لعند البنات : يمه يمه يقلبي
نيلان : وش فيتس شايفه جني
اميره : شفت فارس أحلامي والله مهوب جنيي
ضحكت بيان وقالت : يويلي منهوو ذا
اميره : غغيثثث مدير خخخلففف
م حست الا وهي تسمعه يضحك و الصدمه ان بعده م دخل المجلس
اميره ركضت وراء الباب الخاص للمجلس الخلفي و طلعوا البنات كلهم وراءها : ييممه لايكون سمعنيييي اويلييييي ويلاااهه
ديم : شكله دورتس جاي وانا اختس
اميره : تخيلوا يطلع متزوج بتجيني جلطه قسم بالله
بيان : لا وين مهوب متزوج وحيد امه بعده
اميره : يعطيس العافيه خليتي عندي آمل شوي
ضحكت وقالت : وياس يعيني
دخلت عليهم ام سلطان وقالت : وجع صوتكم واصل لين داخل وش ذا
اميره : معليش يمه
ام سلطان : ادخلوا للمجلس او اقعدوا بهدوء
و كانوا البنات متجمعين و جالسين ف الجلسه الخارجيه مع سوالف و ضحك م حسوا الا بجوال ديم الي يدق
رفعت ديم الجوال وقالت : يمه رقم غريب !
الجوهره : افتحي شوفي يمكن ضروري ؟
بطلت ديم الاتصال : السلام عليكم
المُتصله : عليكم السلام
ديم : منو معاي ؟
المُتصله : معاس روضه
ديم : منو روضه اعرفس انا ؟
روضه : يمكن م تعرفيني بس انا طليقة محمد
ديم بتهمهم : همم طليقة خطيبي يعني
روضه بنرفزه : ايه
ديم بصوت خفيف : بنات الحقوا طليقة محمد الي داقه
الجوهره : يمال الوجع وش تبي ذي
ديم : ايوا علميني وش تبين
روضه : انتي الي وش تبين ليه خذيتي محمد ليه وافقتي عليه
ديم : والله يحبيبي مو شغلتس
روضه : الا شغلي
ديم ضحكت بغرور وقالت : حبيبتي هو الي خطبني و وافقت عاد فرصه مقدر افوتها
روضه نزلت دموعها بعدم تحمُل : انتي خذيتي مني شيء انا احبه ومحد رح يحبه كثرري افهمي
ديم ضحكت ب استفزاز : هذاك اول ياعيني الحين انا الي محد رح يحبه كثري و بتشوفين ي البزر
روضه : ان م خذيته م اكون روضه
ديم : ليه انتي متأكده انه رح يوافق ههههههههههههههههههههههههههههههههههههههههههههههههههههههه
سحبت الجوهره الجوال من ديم و قالت : ي الوصخه انتي م عندس كرامه جايه تتكلمين مع وحده انخطبت و زواجها م باقي عليه شي و جايه بكل برود تقولين باخذه ومدري وشو الله يرزقني ثقتس بس حبيبتي خلاص محمد صار ل ديم و ديم صارت ل محمد حطي المعلومه ف مخس ولا اصيدس تجين تدقين عليها تفهمين ولا م تفهمين و اذا م فهمتي الكلام محمد يفهمس بطريقته انتظري اتصال منه
وقفلت الاتصال بوجهها
ضحكت ديم ب اندهاش : جوجي شكلتس معصبه و انفجرتي عليها
الجوهره زفرت براحه وقالت : تصدقين والله اني ارتحت هههههههههههههههههههههههههههههههههههههههههههههههههههههههه
بيان : اسمعي ديم انتي بعد علمي محمد يكلمها و يقول لها صدقيني ذي بتنشب بحلقس
ديم : إذا بعدها اتصلت يصير خير خلني اتزوج و اقهرها
ضحكوا البنات و جلسوا يكملون سوالف و ضحك
الجوهره : بيون وين بتحطين سيف الحين؟
بيان : يوه وربي تعبت خلاص بعطيه ابوه
ضحكت نيلان وقالت : الله يعين بس
الجوهره : اهه ي بيان ع الاقل انتي ولدس كبر شوي ذي بعدها توها كلشوي تصيح
بيان : عادي عادي تتعودين عليها بعدين بيصير روتين
الجوهره : ي صبري بس
رفعت بيان جوالها و اتصلت على خلف و لٰكن م رد عليها
قامت و اخذت سيف و اتجهت لغرفتها ع ساس تنومه
و صادفت خلف الي يدور على الشاحن بين الاغراض
بيان بهدوء : وش فيك
فز على صوتها و ابتسم بهدوء : ابد ادور على شاحني
أشرت على الطاوله الي جمب السرير بمعنى هناك
خلف : يوه اخيرا م بغينا
بيان : على وين
قرب باسها على خدها و طلع بعجله : بعدين اقولس
ضحكت وقالت : يحلوك بس
قربت و حطت سيف على السرير همس سيف بهدوء : نن..نه
وابتسمت و أخذته لحضنها و ..
'
صادفت ام خلف ولدها الي طالع بعجله : بشويش يمه بشويش
ابتسم وقرب يبوس رأسها : ي بعد حيي مستعجل والله جدي يبيني
ام خلف : تلحق طيب بشويش
طلع و اتجه لعند جده
ابو سلطان : ايه و هذا هو خليف جاء
فهد : شسمه ترا رايحين للعزبه الليله جهزوا نفسكم
زفر سالم وقال : يوه وقت العزبه الحين بعد
ابو سلطان ضحك وقال : ايه يسلوم وقتها
سالم : سم طال عمرك
سعود همس وقال : رايح انت بعد ؟
خلف : اجل
سعود : احسبك بتقعد مع حرمتك
حط يده على كتفه وضحك : الود ودي اقعد معها بس جدي وانت تدري
سعود : يلا يخوك معوض خير
ابو سلطان : يلا الحين روحوا اقعدوا مع العيال
فهد : ان شاء الله
'
بعد صلاة العشاء تحديداََ عند ريهام بـ الغرفه
كانت جالسه ترسم بكُل حُب و مشغله اغاني هاديه خلصت منهم و قامت راحت تفرفر بين ملابسها علشان تنزل تسلي نفسها مع البنات رغم التعب الي تحس فيه اخذت لها مخّور طويل لونه وردي فاتح و فتحت شعرها و علقت الشال على رأسها و حطت لها ميكب خفيف و نزلت لعند البنات تقدمت للصاله تسلم على الحريم : مبروك يخالتي ربي يتمم لهم على خير و عسى أن شاء الله نشوف عيال ديوم
ام محمد : امين ي حبيبتي و نشوف عيالتس ان شاء الله
ابتسمت بهدوء : ان شاء الله
مسكتها ام فهد على جمب : بعدس تعبانه ؟
ريهام : ايه شوي ، بشوف اذا فهد فضى بروح المستشفى افحص احتمال كبير اكون حامل !
ضمتها ام فهد عشان تخفف عنها التوتر : م عليه ي بنتي م عليه أن شاء الله يجينا الخبر الزين و تطلعين حامل
ابتسمت وقالت : ان شاء الله
ام فهد : لا تطولين شويات و قولي ل فهد ياخذس لأنهم بيروحون الليله للعزبه و رح يطولون
ريهام : تمام
'
دخلت للمجلس عند البنات الي كانوا متجمعين و بدوا يرحبون فيها بحُب
جلست جمب بيان و جلسوا يسولفون
همست بيان بهدوء وقالت : شصار ؟
ريهام : والله للحين م صار شي جيت شوي اقعد معاكم قبل لا اروح افحص
اميره : وجع بيان و ريهام وش عندكم
ضحكت بيان وقالت : ابد ولاشيء
ريهام : لا تحاتون م فيه شي
الجوهره : علميني وش فيتس؟
ريهام : والله م فيني شي خلوني اتأكد بس و بعلمكم كلكم
ضحكت الجوهره وقالت : حلو
'
ب الصاله عند الحريم
ام محمد : وش فيها ريهام وجهها مقلوب ؟
ام فهد : م فيها شي الحمدالله
ام عبدالرحمن : صادزه انتي ترا واضح
ام فهد : قلت لس م فيها شي تعبانه شوي وانتم م لقيتوا سالفه الا بنيتي وجع
ضحكت ام خلف وقالت : بنيتس هاه ههههههههههههههههههههههههههههههههههههههههههههههههههههههه
ام فهد : ايه ايه
ام فيصل : تعالو م تحسون اسبوع شوي عليهم متى يلحقون يخلصون و يسوون
ام خلف : ابك عادي م يحتاج بنخلص ان شاء الله
ام فيصل : ان شاء الله
'
بعد مرور الوقت ف المجلس عند البنات تحديداََ
ريهام : بيون اسمعي بطلع انا بشوف فهد مانيب قادره
بيان : ايه طيب طمنينا بعد م ترجعين
ريهام : ان شاء الله
طلعت دخلت غرفتها و دقت عليه : فهد وينك
رد عليها وقال : تونا بنمشي ليه ؟
ريهام : ابيك ضروري اطلع بسرعه
فهد : ثواني طيب
طلع بكل سرعه و دخل الغرفه : شصار
قربت منه وقالت له كلشيء ب التفصيل
حط يده فوق يدها و ابتسم بهدوء : طيب ليه متوتره
ريهام : مدري مدري
ضحك وقال : منتظرس ب السياره خلصي و انزلي
ريهام : مخلصه اساساََ جايتك الحين
فهد : طيب
نزلوا و تقدموا للسياره و دخلوا للمستشفى دخلت ريهام تفحص و انتظرها فهد عند مقعد الانتظار
*
ب الغرفه تحديداََ
الدكتوره : وش تحسين فيه ؟
ريهام : مدري مغص من اليوم
الدكتوره : طيب نشوف
حطت الدكتوره السونار على بطنها و بدت تضغط بشويش ابتسمت و أشرت على الجهاز بمعنى شوفي
مسحت دموعها بحنيه : يقلبييي
الدكتوره : معقوله م حسيتي كل ذي الفتره صارلك شهر و اسبوع
ريهام : والله م حسيت الا أمس و اليوم
الدكتوره : مبروك مبروك
ريهام : الله يبارك فيس بس بسالتس وش سبب الآلم القوي ذا ؟
للدكتوره : ي حبيبتي هذا شيء طبيعي جداََ بسبب الهرمونات و كذا رح تحسين بذا الآلم اول 3 آشهر و م عليكي شي ان شاء الله
ابتسمت وقالت : ان شاء الله
قامت تعدل نفسها و طلعت و شافت فهد الي جالس ب الكرسي قربت جلست جمبه وهي تمسح دموعها : ابشرك بنصير ام و اب
فتح عيونه ب اندهاش : صادززهه
ريهام : ايه والله
حط كفينه على وجهها و مسح دموعها : ي بعد حيي ليه الدموع طيب
ريهام : مدري احس اني فحلم
مسك يدها بحنيه : مهوب حلم ياعين الفهد واقع بتصيرين ام و بصيرر ابب
شدت عليه بقوه : ان شاء الله
ابتسم بهدوء وقال : مشينا للبيت ؟
ريهام : مشينا
و ف السياره تحديداََ
ريهام : تخيل بعد صار لي شهر و اسبوع و انا توني ادري
ضحك وقال : يلا اهم شي درينا الحمدلله
كررت وراه : الحمدلله
فهد : اقول تدرين اني رايح العزبه و يمكن نطول
ابتسمت بضيق : ايه ادري
فهد : ليه متضايقه طيب
ريهام : والله مدري احس اني احتاجك مدري ليه
ابتسم وقال : ابشري م طلبتي شي
ابتسمت بهدوء : تبشر بالخير
'
بعد م وصلوا للبيت
ام فهد : هاه بشري بشري
ريهام : ابشرتس يخاله بيصير عندس حفيد/ه
ام فهد : مبروك ي بنتي مبروك عسى أن شاء الله تولدين ب السلامه
ريهام : امين يارب
ام فهد : اطلعي ارتاحي الحين واضح انس تعبانه
ابتسمت وقالت : ان شاء الله
-
طلعت لغرفتها و راحت تفرفر ب الملابس و اخذت لها لبس نوم خفيف لونه سماوي بلوزه كت و بنطلون قصير و سوت بشعرها ذيل حصان و مسحت مكياجها تقدمت و انسدحت بآلم و كان فهد مقابلها ب الكرسي ابتسم و قرب ينسدح جمبها و حط رأسها على صدره و جلسوا يسولفون و يضحكون
ريهام : فهود بسألك كنت تبي تروح معهم ؟
فهد : اكيد ليه
ريهام : صدز يعني تبي تروح
فهد : ايه ابي اروح بس شلون اخلي حبيبتي لحالها وهي تبيني ؟
ابتسمت بهدوء وقالت : احببكك !
باسها على خدها وقال : اهواتس تدرين ولا م تدرين
ابتسمت بخجل وقالت : يحظي والله
ضحك و رفع الفراش يدفيها : يلا حبي نوم
ضحكت معاه و ناموا
'
و عند بيان بـ غرفتها رفعت جوالها و دقت على خلف تتطمن عليه : خليييف
رد عليها وقال : لبيه ي دهر قلبي و رجعانه
ابتسمت وقالت : وصلت ولا بعدك
خلف : شويات و نوصل ليه عسى ماشر
بيان : ابد اسأل عنك بس
ابتسم وقال : ابد لا تحاتين إذا وصلت بقولتس
بيان : ان شاء الله
ضحك وقال : سيوف وينه
بيان : مسرع اشتقت له توك شفته
خلف : ولدي شسوي لازم اشتاق له
ضحكت وقالت : عسى ربي م يحرمني منكم
ابتسم وقال : ولا منس ي بعد حيي
بيان : يلا حبيبي انتبه من الطريق الله يحفظك
خلف : ان شاء الله ، فمان الله
-
اليوم الثاني صباحاََ فبيت ابو سلطان
ام سلطان : يالله صباح خير
ام عبدالرحمن : صباح النور يمه
ام سلطان : وين البنات غريبه م صحوا للحين
ام فهد : والله يخاله سهروا لين الفجر ومحد فيهم يبي يصحى
ام خلف : نبي نروح نشتري الأغراض نبي نخلص نفسنا
ام سلطان : مع من بتروحون العيال كلهم راحوا مع جدهم
ام فهد : ايه صح يوه نسيناا
'
و عند ريهام الفهد ب الغرفه
فتحت ريهام عينها بهدوء و ابتسمت بخفه من شافت نفسها نايمه على صدر فهد صحت و قامت بهدوء دخلت للحمام ( يُكرم القارئ ) تاخذ لها شور ، بعد م خلصت طلعت و اتجهت للغرفه تفرفر بين ملابسها و تتكشخ بحكم ان البنات رح يتجمعون هاليوم لبست لها فستان خفيف يوصل لين الرُكّب لونه بنفسجي فاتح ماسك من على الخصر و فتحت شعرها سوت له ويفي خفيف و ميكب خفيف رشت عطرها الهادي و جلست على الكرسي تطقطق على جوالها ، دقايق و صحى بعدها فهد ابتسم وهو يشوفها قدامه متكشخه بـ جمالها الفتان : وش ذا الصباح الزين
فزت على صوته و قربت لعنده : صبااح الخيير ياوجه الخيرر
سحبها لعنده بقوه : لمين الكشخه
ضحكت وقالت : بشويش يعيني نسيت ولا وش
فهد : لا م عليس م نسيت ولدي
رفعت حواجبها و ضحكت : وش دراك انه ولد يمكن بنت
فهد : الي يجي من الله حياه الله
باسته على خده بِحُب و طبعت القلوس عليه ضحكت بخفه : اوه معليش
ضربها على رأسها بمزح : متعمده هاه
ريهام : اسمع تبي هاليوم تروح للعيال عادي ترا لا تقعد عشاني إذا ف خاطرك تروح
وقف و تقدم لعندها : وشلون اروح و اخلي هالزين
ضحكت بخجل وقالت : يوه فهيد بس عاد
ضحك و دخل للحمام ( يُكرم القارئ ) ، و طلع لبس ثوبه الأبيض و تبخر قال بهدوء : ريهامي نازل تبين شي ؟
ابتسمت وقالت : لا ي حبيبي انزل شوي وجايتكم
ابتسم وقال : تمام
نزل للصاله
اندهشت ام فهد من شافته ينزل والكل يحسبه راح
ام فهد : فهيد انت م رحت معاهم ؟؟؟
قرب باس رأسها و قال : لا والله م رحت قلت اقعد مع ريهام افضل
ام فهد : اها ايه زين شخبارها هاليوم
فهد : الحمدلله زينه بعد شوي بتنزل
ام فهد : ايه حلو ، بتروح لجدك و العيال ؟
فهد : والله مدري عاد بشوف الوضع كيف
ام فهد : يوليدي إذا على ريهام لا تحاتي عليها انا امها و خواتها كلنا موجودين
ابتسم وقال : جعلني م انحرم منكم ، بس ي يمه المشكله ماهيب كذا البنت تخاف تنام لحالها و انا مانيب راضي اروح و اخليها
ام فهد : تخاف ليه ي حبيبي كلنا موجودين فلبيت م عليها شي
فهد : يصير خير ان شاء الله بشوف كيف
ام فهد : طيب براحتك فكر ، شسمه رح للمجلس البنات نازلين بعد شوي
ضحك وقال : محد غريب يمه
ام فهد : يمال الوجع بنات عمار هنا
اندهش وقال : خوات صقر ؟
ام فهد : ايه
قاطعهم دخول ود الي كانت بكامل كشختها و رزانتها : ي خاله جدتي وين
انصدم فهد وهو اول مره يشوفها : يمه من ذي
ضربته على كتفه بقوه : قم جعلك ال مانيب قايله
م حس الا بـ ريهام الي نزلت و شافتهم عضت شفايفها بحرقان ، ابتسمت تحاول تكسر الغيره الي بداخلها : اوه متجمعين
ضربته ام فهد من جديد : قم قم اذلف للمجلس
فهد : سمي طال عمرس
طلع من الصاله و اتجه للحوش على الجلسه
و طلعت ريهام وراه جلست جمبه : ي حيوان وش تسوي ب الصاله و البنت موجوده !!
ابتسم بخفه وهو يشوف غيرتها : طيب م صار شي وش فيتس
ريهام : فهد بتجلطني انت ولا وشو
فهد : بسم الله عليتس
ريهام : يعني تبيني اطلع عند العيال عادي عندك
فهد : اعقبي !
ريهام : يعني كذا نظامك
ضحك و قال : شلون اشوفها وانا عيني م تشوف الا ريهامي
ابتسمت بهدوء وقالت : يابعد ريهامك
ابتسم وقال : ايه كذا ابتسمي لا يضيق صدرس م يلوق عليس الزعل
طلعت ود للحوش وقالت : ريهام تعالي بسرعه
ضحك وقال : يلا حبي روحي لهم
ضربته على راسه بخفه وقالت : رايحه رايحه
'
وعند بيان الي كانت لابسه بلوفر اسود مع بنطلون ابيض وسيع و كعب خفيف اسود و مسويه بشعرها ذيل حصان اخذت سيف ل حضنها و نزلت الصاله عند البنات
'
فـ الصاله تحديداََ
ود : تعالي انتي مو ع الأساس العيال راحوا وش يسوي فهد هنا
ريهام : شتبين فيه انتي
ود : يمه منتس اسأل ترا
اميره : يوه ي البزران بس ! تضاربوا بعد هذا الي ناقص
ود بأستفزاز : والله عاد انا موافقه بس غيري خايف ؟
ريهام : استغفرالله يارب صبرني
ود : وش فيتس هاه ؟
ريهام : والله لو م عندي ظرفي كنت موافقه بس ربي فالها
ضحكت وقالت : صرفتيها ب ظرف ؟
ريهام : صرفتها ؟ حبيبتي انا لو مانيب حامل كنت اخليتس تصيحين الحين كليتراب بس
شهقت اميره وقالت : وشو وشوووو
ريهام : اسكتي انتي بعدين اعلمس
درعمت عليهم بيان وقالت : اووه وش ذا الصوت العالي شصاير
تداركت ود الوضع بهدوء بعد م حست انها كبرت السالفه : يوه رهوم امزح معتس والله ، بعدين مبروك مبروك
زفرت بهدوء وقالت : يبارك فيتس
اميره : صادزه انتي ؟ ومن متى
ريهام : ايه امس رحت فحصت و طلعت حامل
اميره : مبروك مبروك
ريهام : يبارك فيتس
بيان : نيلو و الباقي وين
ود : والله خواتي رجعوا امس الليل مع اوسي
اميره : يوه يع انتي بعد اوسي و اوسي
ضحكت وقالت : تعودت !
اميره : ايه صح قالوا اخوتس دكتور ؟
ود : ايه صقر شلون دريتي
اميره : سمعت عنه كثير و توني ادري انه يقصدون اخوتس
ود : اهاا
بيان : بنات وربي توتر مليون للحين خلف جواله مغلق اخاف فيهم شي
ريهام : تعوذي من ابليس م عليهم شي ان شاء الله
'
ف العزبه تحديداََ
ابو سلطان : يالله صباح خير
سعود : جدي بنطول هنا ؟
ابو سلطان : نشوف يمكن بكره نجي ولا بعده شفيك مستعجل
سعود : هاه ابد
اخذ ابو سلطان جواله و دق على فهد : ي الفهد
رد عليه فهد : لبيه ي جدي
ابو سلطان : الليله القاك موجود منت بأحسن منهم عشان تقعد فلبيت وهم هنا
زفر بهدوء وقال : ليه ي جدي م قلت لك انا امس
ابو سلطان : يوليدي ريهام م عليها شي يعني خلف م عنده حرمته و ولده م قال شي المهم كلمتي وحده و عطيتك العلم
فهد : طيب طيب
'
سالم : ي جدي وربي الشمس صدعت ب ام امي خلاص
ضحك ابو سلطان من حالتهم : ادخلوا ادخلوا نكمل الليله ان شاء الله و فهيدان جاي
قطب عبدالرحمن حاجبه وقال : مو عساس م يقدر يجي
وليد : ايه صح
ابو سلطان : بيجي خلاص كلام زايد م ابيه
درعم عليهم خلف وضحك : والله جدي صادز تسولفون واجد
ابو سلطان : وين ابوك و عمك
خلف : راحوا يشترون لنا اكل وكذا
ابو سلطان : ايه زين
'
بعد أذان المغرب فبيت ابو سلطان تحديداََ
دخل فهد للغرفه و بدل ملابسه ( لبس له بلوفر لونه سماوي و بنطلون ابيض و رش عطره و لبس ساعته و نزل يعلم امه و ريهام ) نزل للصاله و قرب يبوس رأس جدته و راح لأمه و قال : يمه انا رايح العزبه جدي حلف عليي اجي
ضحكت وقالت : زين يمه انتبه
همس بهدوء وقال : نادي لي ريهام شوي
قامت و اتجهت للمجلس تنادي ريهام و طلعت ريهام من المجلس أخذها فهد على جمب قالت بهدوء : وش صار
فهد : اسمعي انا رايح العزبه
فتحت عيونها بصدمه : اما
مسك يدها بهدوء وقال : جدي يبيني اجي غصب عني ولا انا الود ودي اقعد معتس بس شسوي
ريهام بِتوتر : ططيب عادي رح لا تحاتي م عليي شي
فهد : اكيد !! ترا ادري عنس خوافه
حاولت تتدارك الوضع و تسيطر على مخاوفها : ايه اكيد اكيد بس طمني عنك إذا وصلت طيب
فهد : طيب ان صار شي علطول تدقين تمام !
ريهام : ان شاء الله
طلع مسرع و ركب للسياره و اتجه طريقه للعزبه
'
عند البنات ف الليل
ود : اقول شرايكم نطبخ لنا اندومي او شي
اميره : من وين ان شاء الله
ود : امانه لا تقولين م فيه
اميره : والله م فيه
ود : شرايكم نروح البقاله طيب نشتري لنا
بيان : صدقتي نفستس صح
اميره : والله فكره بروح اشوف امي
طلعت اميره مسرعه لعند امها : يمه يمه
ام سلطان : ويش ويش
اميره : تكفين يمه تكفين نبي نروح البقاله شوي تكففين
ام سلطان : لحالكم مستحيييل
اميره : معانا رهوم و بيان م بيصير شي تكفين
ام فهد : خليهم يروحون ان شاء الله م عليهم شي
ام سلطان : بسرعه طيب لو درا ابوتس بيذبحنا
نزلت مسرعه بكل فرح وقالت مشينااا
ود : كفو عليتس
أنفال : طيب مشينا يلا
بيان : اسبقونا انتم جايين حنا
اميره : تم
تقدموا اميره و ود و انفال و سُميه و اريام و ديم البقاله
ريهام : يوه احس خفت مابي اروح
بيان : بكيفس عاد انا رايحه مستحيل أخليهم لحالهم
ريهام : اقولتس اجل مشينا
طلعوا بيان و ريهام متأخرين و كانوا البنات سابقينهم وكان الطريق ظلام م فيه الا كم نور وجلسوا يسولفون بهدوء م حسوا الا بـ اثنين وراهم : يلبيه وش ذا الزين
لفت عليهم بيان و تجاهلتهم بخوف : رهوم مخابيل ذول نركض ؟
ريهام : نركض وش مخبوله انتي بعد نسيتي ولا وشو
بيان : يوه انتي بعد
تكلم واحد منهم وقال : وش فيكي يحلوه لا تخافين م راح ناكلكي
بيان تمسكت بيد ريهام بقوه وقالت بكل هيبه : ي الوصخ انت وياه ورا م تذلفون
تكلم وقال : ليه العصبيه طيب
بيان بصوت عالي : اننققلعع ي البزرر م عندك أخلاق
طلعوا البنات مسرعين من البقاله و تجمعوا كلهم و انصدموا من شافوا عددهم
ابتسم وقال : اوه طلع فيه حلوين زياده يعني
ديم : وجع أن شاء الله وش يبون ذول
قرب واحد منهم و سحب ديم لجهتهم ارتعبت ديم من المنظر الي تشوفه و قربت بيان الي كانت اشجع وحده فيهم سحبتها و صرخت ف وجهه : قليل ادب جعل ايدك الكسر يوم مسيتها ي الوصخ ي عديم التربيه
رفعت اريام جوالها و اتصلت على محمد ينقذهم من الوضع الي هم فيه قالت بصوت ههااادي : حمموود الحقنا بسرعه حنا عند البقاله انا و البنات و فيه اثنين وصخين هنا
محمد : ابن ابوي صدز ثواني و جايكم
وكانت ديم وسطهم تصيح و تشاهق من الخوف
ريهام : يوه بنات خلاص امشوا
قاطع طريقهم واحد منهم وقال : على وين مش هتروحي مكان
مسكت على بطنها بتوتر وهي حاسه انه بيغمى عليها من الرعب الي قدامها : ياربي وانت ربي
م حسوا الا بـ سيارة محمد الي جاء و صف قدام ذول الاثنين : شعندك ؟
ضحك واحد منهم وقال : انت الي شعندك
ضحك محمد وقال : اللهم صبرني انت مخبول ولا وشو اذلف اذلف
رد عليه وقال : مراح اذلف وش بتسوي
محمد بنبرة حاده : بتذلف ولا كيف ترا اقدر الحين اخذك و ارمي بك ف السجن بتهمة تحرش !
ضحك وقال : من بتكون لحتى تحطني ب السجن
ابتسم محمد بـ استفزاز و طلع الكرت الخاص فيه و حطه ف يد الرجال وقال : معك العميد محمد آل علي
اريام بِفخر : ونعم
ابتسم وقال : م عليس زود
هربوا الاثنين من سمعوا الاسم وهم يعرفون ذا الاسم من قبل
محمد : اركبوا انتم بسرعه لا يشوفكم احد
ركبوا البنات للسياره وهم متفشلين من نفسهم و كانت ديم على جمب تحاول تحبس أنفاسها و تكتم شهقاتها شافها محمد و قرب لعندها : وش فيتس يابوي خلاص راحوا
نزلت دموعها وهي مو مستوعبه و م قدرت تنسى أشكالهم ابداََ
ناظرها محمد وهو يشوف رجفت يدينها و خوفها مسك يدها بهدوء و حست بيده الدافيه و قال : ادخلي السياره انتي بعدس داخله ف صدمه
دخلت ديم للسياره و مسحت دموعها و شربت لها ماء تهدي نفسها
دخل محمد للسياره و زفر بهدوء و شغل المسجل و اشتغلت اغنية و بدأت من عند
" جردت سيفك و اطعنتني سهامك "
" من شفت طرفك قلت اهلا و لبيك "
" ياويل قلبي ثم ياويل حالك "
" ابلهفة المشتاق البيك و ادعيك "
ضحكت ود وقالت : يحلوكم بس
ضربتها ديم على كتفها : مو وقتس ابدا
اميره : محمد طلبتك تكفى لا تعلم امي وربي تذبحني
ضحك وقال : م راح اعلم احد بس ان شفتكم طالعين برا كل وحده شورها مع ابوها
اريام : ايه ابشر
وصلوا للبيت و نزلوا البنات للبيت
اريام : حمود نزل ديم لـ بيتها
ناظرها محمد من المرايه وقال : م ودك تنزلين معهم ؟
هزت رأسها ب النفي ( بمعنى لا )
محمد : طيب
نزلوا البنات و باقي ديم فقط جته لحظة ادراك ان الي معاه بتصير زوجته قريب ابتسم وهو يحاول يغير جوها شوي : هاه مستعده تصيرين حَرمي ولا بعدس
ابتسمت وقالت : مستعده بإذن الله
كرر وراها وقال : بـ إذن الله
وصل لعند بيتها وقال : فمان الله
ابتسمت بهدوء وقالت بصوت متذبذب : ايه صح مشكور على فزعتك
ابتسم وقال : ابد ابشري يـ الديمّي
قفلت الباب و ابتسمت : ديمّي ! واوو
دخلت لبيتها و كمل محمد مساره للبيت : م دريت اني باخذ هالبرائه كلها !
'
و عند البنات بـ الصاله
ريهام ضحكت وقالت : اهه وربي معاد بطلع معاكم
بيان : اشربي اشربي ماء
ود : الحين وقت الاندومي و فلم رعععبب !!
بيان : جوويي
اميره : رهوم تعالي اطبخي
سُميه : لا لو سمحتي رهوم م راح تسوي شي لازم ترتاح
ضحكت وقالت : يلبيه ي سمسومي
سُميه : وانا صادزه مخابيل انتم ولا ويش
ريهام : عاد والله كنت ابي اسوي بس مالي حيل حدي تعبانه
اميره : ابد ابد ارتاحي انتي بس
طلعوا البنات الصاله و كانوا ماخذين الأدوار كل شوي وحده تقوم تشوف الاندومي ، و اخيرا خلصت و شغلوا لهم فلم رعب و جلسوا مرعوبين و كل وحده تكابر انها م حست بخوف ، بعد انتهاء الفلم قفلوا و كل وحده اتجهت غرفتها
دخلت بيان عند سيف و نامت بحكم انها م تخاف الا شوي و متعوده
عكس البنات دخلوا مرعوبين رغم ذلك هم مع بعض فـ الخوف قليل عندهم
و نجي عند ريهام بـ الغرفه
بدلت ملابسها و انسدحت على السرير و كانت تناظر السقف بِخوف و تحاول تسيطر على نفسها و م جاها النوم كملت مواصله على جوالها تطقطق فيه تسلي نفسها شوي م حست الا بـ اتصال من فهد فزت و ردت بكل سرعه : فهودد
رد عليها وقال : ماشاء الله مسرع رديتي شكلس م نمتي
ريهام : م جاني النوم قسم بالله حسيت اني بفلم رعب
ضحك وقال : انا م قلت لس بقعد و انتي عاندتي
ريهام : ليتني م عاندت
ضحك وقال : يلا حبيي نامي م عليتس شي مهوب زين السهر بحاول ف جدي اجيس بكره ان شاء الله
ريهام : لا لا فهد م ابيه يهاوشك خلاص
فهد : ازهليني بس
ضحكت وقالت : طيب بكيفك عاد م راح اقول لا
فهد : ايه صح بعده بطنس يعورس ؟
ريهام : شوي مو واجد لا تفكر واجد انت الدكتوره قالت طبيعي
فهد : ايه زين يلا بطفي لا يصيدوني
قالت بهدوء : م كان ودي اطفي بس يلا ربي يحفظك
فهد : ان م جيتس بكره م اكون انا فهد
ابتسمت وقالت : ان شاء الله ان شاء الله يحبيبي يلا انتبه لنفسك
قفلت الخط و حاولت بقدر الإمكان انها تنام
-
يُتبع
-
( ارحبوا ي شيّوخ قلبي شحالكم عساكم بخير وصحة وسلامة ، معليش والله اختفيت فتره بس الظروف و غيره حاولت أطول البارت و هذا الي قدرت عليه لنا لقاء آخر شدوا دمعكم ي شيوخي عشان نكمل مع بعض 💗. )
أنت تقرأ
كل الامان في حُبك وكل الاماني قربك
Randomرواية كل الامان في حُبك وكل الاماني قربك للكاتبة : رهف القحطاني ✍🏻 - ثاني إنطلاقه لي 🤎. - ترقبوا معنا الروايه ✨.
