مات قلبي وانا حي
البارت 8 💔
👌🏻👇🏻 😍
وصلت زينب بيتهم
اكرم: هاه بشري
زينب: قد سرت عند ناس وعرفت ناس لكن زيما هولا ماقد بسرت اخلاق ونظافه وحسن ضيافه ماشاء الله
اكرم: ما قالوا لش
زينب: قالت عيستشيروا البنت ويقولوا لأبوها ويردونا خبر
اكرم: تصدقي مدري ليش اشتيها تكون مرة ابني
زينب: كيف
اكرم: من كثر ما مدحتي البنت واحترام اهلها حبيتها
زينب: هههههههههه ماقد اتحاكيت منها الا امس واليوم
اكرم: داري بس احياناً فيه ناس يدخلوا قلوبنا من غير ما نعرفهم
زينب: الله يقدم ما فيه الخير
في بيت بهاء
وتحديداً في غرفة بهاء ونبيله
بهاء: من اللي جاء وما يشتوا
نبيله: بيت اكرم ال..... جوا يشتوا اميره لأبنهم
بهاء: ايوه
نبيله: قالت الام انها بسرت اميره في العرس وحبتها وقالت تشتيها لأبنها اسمه سلطان يدرس في مصر دكتور قلب
بهاء: اها
نبيله: قالت لو نشتي نسأل على ابنها سوا في صنعاء او في مصر وهي نفسها في البنت
بهاء: خير نسأل على الولد وعلى اهله ونسأل اميره ولو فيه نصيب بينهم الله يتمم لهم على خير
نبيله: خلاص انت اسأل على الولد واذا كان ابن ناس نسأل اميره ونبسر ما رأيها
بهاء: ان شاء الله يلا طفي الضوء نخطى نرقد
في غرفة سيلا واميره
سيلا: اميره
اميره: هاه
سيلا: مالها امي من بعد ما روحوا الضيوف جالسه تبسر الى عندش
اميره: الله اعلم
سيلا: تقولي جوا يتقدموا لش
اميره: الله اعلم
سيلا: ولو وافق ابي وامي عتوافقي
اميره: الله اعلم
سيلا: مالش مكنتيني الله اعلم الله اعلم
اميره: كان ما اقول لش وامتدت فوق السرير طفي الضوء انا نوم
سيلا: طيب
وكل واحده رقدت وفي راسها الف سؤال وسؤال
اليوم الثاني
في بيت اكرم
سلطان: كيف حالش يا اماه قد انا فاقد لش قوي
زينب ببكى: وانا فاقده لك يا روح امك
سلطان: لا تبكي انا فدا لش
زينب: اي حين عتروح
سلطان: باقي لي هذا الشهر وبعدين اروح واجلس عندش وااااصل
زينب: يلا روح عشان ازوجك
سلطان بمزحه: قد تزوجت واحده مصريه وبديها معي
زينب: ماهو ماهو منك صدق
سلطان: ههههههههه ماشي انا حلفت ما اتزوج الا على يدش
زينب: وانا قد بسرت لك بنت زيما القمر
سلطان: وقد سرتي تتقدمي او مريعه لما اجي
زينب: قد سرت طرحت لهم خبر عشان ماحد يشلها
سلطان: هههههههه انا فدا لش خلاص اشتي يكمل هذا الشهر بسرعه عشان اجي ابسر خطيبتي
( سلطان شاب يبلغ من العمر26 سنه ابيض شويه عيونه كبار ورموشه كثيفه ومعاه غمازه في خده الشمال طويل وجسمه حلو واحلى ما فيه اناقته انسان اجتماعي وحنون ويحب خواته اكثر شي في حياته)
أنت تقرأ
حب ع الانترنت ... مات قلبي وهو حي
Ficción Generalقصة من الواقع حدثت بالصدفة.....بعنوان (كيفَ أهـربُ من عينيك..؟كيفَ أهـربُ مِن أشواقي إليك؟!ومِن لـهفتي عليك..!أفِرُ هـاربةً مِنكَ إليك..!أَطـيرُ مبتعدةً عنكَ لأسقُطَ بين يَـدِيكْ..!) تابع واقرأ #اليمن #صنعاء
