عند شهد الي كانت باقي بالطريق هي و الباقين
قاطع سوالفهم رساله جاتها من رقم غريب
فتحت الرساله و كان المرسل ....
ابتسمت لما عرفت من يكون و حاولت تتمالك ابتسامتها قبل يلاحظها احد
ردت على المرسل و تكلمو شوي و بعدها سكرت فونها سندت راسها ع الشباك وهي مبتسمه و تهوجس
وصلو كلهم بنفس الوقت نزلت جنى و لحقتها لين
و نهاد و شهد و سدن و سديم صارو ينزلون الاكل
دخلت جنى و شافت سما طايحه بالارض و على طول راحت لها حاولت تصحيها هي و لين بس ما في فايده
طلعت لين و قالت للباقين و شغلو السياره و نقلوها للمستشفى على طول
جالسين و ينتظرون الدكتور يطلع و كل وحده فيهم خايفه اكثر من الثانيه
بعد دقايق طويله طلع الدكتور
نهاد : هاه دكتور وش فيها
الدكتور : انهيار عصبي حاد رح تضل عندنا كم يوم الين تستقر حالتها اعطيناها مهدئات و منوم و بس تصحى بنسوي لها اشعه و تحاليل ان شاءالله و نشوف وش فيها
لين : نقدر ندخل عليها
الدكتور : لا لازم لها راحه بس تعرفو سبب الانهيار
ناظرو ببعض و سكتو
نهاد : اي دكتور مجرد مشاكل و ظغوط
الدكتور : لا ما يصلح كذا المريضه تحتاج قدر كبير من الراحه و لازم تبعد عن الزعل و المشاكل
نهاد : ان شاءالله
راح الدكتور وهم جلسو ع الكراسي و الصمت طاغي ع المكان
جنى بهمس لنهاد : الي تفكري فيه غلط
نهاد وهي ماسكه راسها و منزلته : لا الي صار لها بسبتي انا زدت عليها
جنى وهي تمسح ع ظهر الي جنبها : لا مو غلطتك لا تقولي كذا
سكتت نهاد بينما تكلمت سدن : ما ينفع كلنا نظل هنا يله ارجعو للبيت ارتاحو و انا بضل مرافقه معها
نهاد : لا انا الي بضل
سدن : لا ما يصير ارجعي انتي بالذات و ارتاحي تعبانه من امس ما نمتي
نهاد : لا بخير انا اتركوني اضل معها
جنى : نهاد علشاني روحي و ارتاحي افضل لك
نهاد : لا بضل
شهد : ما ينفع و هي بخير و نايمه الحين و بس تصحى بنجيها خل نرجع و انتي نامي و ارتاحي
كانت رافضه فكرت انها ترجع بس مع اصرار البنات وافقت بالموت
اتجهت لسياره و راحو كلهم معها ما عدا سدن الي قررت انها بترافق مع سما الين تصحى
عند سجى الي رجعت للبيت و اتجهت لغرفة جنى حاولت تفتحها بس زي العاده مقفله
راحت لغرفتها و تسطحت وهي تفكر كيف تسوي خطتها
قاطع تفكيرها اتصال جاها رفعت الفون و حصلت المتصل (ماما توته )
ابتسمت لما شافت اسم المتصل
سجى وهي تمثل الزعل : الو
توبا : الو يا روحي انا وينك ما تكلميني
سجى : ويني انا او انتي الي اتصل و ما تردي
توبا : اسفه يا روح ماما انا تعرفين كيف السستم بالبيت ما نمسك فوناتنا الا اذا خلصنا شغل و طول الفتره الي راحت القصر كان فيه مناسبات و بس اخلص شغلي اكون تعبانه و انام على طول
سجى : بس مو عذر ذا يعني لما تصحي ما ترسلي علي او تطمني على بنتك مسافره مختفيه عنك ما افتقدتيني
توبا : الا افتقدتك يا بعد حيي و كيف ما افتقد قطعه من قلبي
سجى : لا تفكري اني برضى بذي الكلمتين الي قلتيها
توبا : و كيف اراضيك يا روحي امري و بلبي لك الي تبينه
سجى : لا عاد تقطعين عني كذا خفت عليك ترا لما ما رديتي
توبا : لا تخافي يا روحي انا بخير الحمدلله
سجى : اشتقت لك ماما
توبا : و انا مشتاقه لك وكثير يا بعد روح ماما
سجى : ماما وش رايك تجين عندي خاطري اشوفك
توبا : ياريت يا بعد روحي
سجى : يا ريت لو اقدر ارجع و اشوفك بس ما ابي ارجع لذاك المكان مرا ثانيه
توبا : لا تفكري ترجعي يا روحي انتبهي لنفسك و اشتغلي على مستقبلك عدل ولا تفكري ترجعي انتي بنتي سجى حبيبتي القويه لا تضعفي ولا تفكري باحد غير نفسك حتى انا لا تفكري فيني انا نهايتي بموت ف لا تشيلي همي
سجى : ماما وش ذا الكلام بسم لله عليك الله يحفظك و يخليك لي
توبا : و هذي الحقيقه يا بنتي انا كبيرة سن و ما اقوى على شي و ايامي معدوده ف ابي تحفظي و تفهمي كلامي عدل مستقبلك ثم مستقبلك لا تفرطي فيه ولا تفكري توقفيه او تسمحي لاي ضرف انه يمنعك تكمليه ادرسي و توظفي اصرفي على نفسك خلي لك اسم بين الناس
خلي الكل يعرف اسمك من اعمالك خلي لك مكان بين كبار المناصب ما في شي صعب عليك يا روحي اعرفك ذكيه و قويه و تقدري تسوي كل شي
سجى : يا بعد روحي انا ابشري يا قلبي بنتبه لنفسي و بسوي زي ما قلتي و بتشوفي اسمي بكل مكان
توبا : فديت بنتي يا ناس
سجى : يا بعد روح بنتك الله يحفظك و يخليك لي
توبا : يله حبيبتي بروح الحين قاعدين ينادون
سجى : ماما انتبهي لك و لا تتعبي نفسك في شي احبك كثير
توبا : و انا احبك يا روحي استودعتك الله
سكرت سجى وهي تحس بضيق و فرح بنفس الوقت
سكرت عيونها و ع اساس تنام بس تذكرت الي تبي تسويه ففتحت فونها و ارسلت لجنى
: وينك عمي سئلني عنك و ما عرفت وش اقول له اتمنى تكوني موجوده قبل صلاة العشاء لان عمي اصر ع ذا الشي ولو خالفتي بتزعلين
سكرت فونها وهي مبتسمه تعرف ان جنى بتنجلط من الرساله
تغطت متجهزه لنوم و كلها ثواني و نامت
