من احدهم

١- شاب من احد افراد هذا المجتمع

"من احدهم "

أنا ماتجوزتش لحد دلوقتي، والسبب في ده مش ظروفي المالية لإني الحمد لله أقدر أعمل بيت، ولا ف عدم رغبتي في الجواز لإني عندي الرغبة دي كمبدأ ومن زمان، ولا ف إني ماقابلتش بنت الحلال لإن فيه بنات حلال وكل حاجة
أنا متطلباتي في الست اللي هتجوزها اتغيرّت واتطوّرت بالوقت، يعني وانا عشرين سنة كنت بافكر قد ايه هتبقى جميلة، وف نهاية العشرينات كنت بافكر ازاي تبقى شبهي وتجمعنا حاجات، ودلوقتي بقى كل تفكيري (انها تقبلني)
شخص زيي عاش وراح وجه ولف ودار وتعب وقتل واتقتل، اتغيرت فيه حاجات كتير، واكتسب صفات ماكانتش فيه، يعني انا مثلاً بقيت عصبي لأتفه الأسباب، وأميل معظم الوقت للسكوت، باحب الهدوء وباكره الاسئلة الكتير وكسر الخصوصية والكلام الكتير ف التليفونات مثلاً
أنا بنضف بيتي وباكوي هدومي وباعمل أكلي وباظبط المنبه فباصحى لوحدي وكل حاجه ف مش محتاج واحدة تخدمني عشان الزوجة شريكة مش خدامه
انا إشكاليتي الحقيقيه في اللي قولته، نفسي اتفهم صح، نفسي في اللي تحس بيا وتقبلني، مزاجي وتقلبه، ضغوطاتي ومشاغلي، تحب تقعد جنبي وقت سرحاني وهي قابله انها تسكت، واحدة ماتكرهنيش ف نفسي أو تحسسني بعيوبي كإنها اكتشفتها أو كإني ماكنتش اعرف العيوب دي ف تفضل تعايرني بيها وتسرد قد ايه انها مستحملاني وف أقرب مشكلة تقولي(انت عمرك ماعملتلي حاجه حلوة وعمرك وعمرك)
أنا على عكس الانطباع اللي ممكن تاخده عني(اني فرحان بحياتي دي) أنا اكتر حد في الدنيا محتاج حبيبة وزوجة

ريحة وروح ف كل مكان في البيت، عطف ورحمة وود، مشاركة واهتمامات مشتركة، نكون بنحب حاجات زي بعض مهما كانت تافهة، سينما اغاني قراية تمشية تربية حيوانات طاولة ان شالله نكون احنا الاتنين بنحب نقلي بطاطس بالليل مثلاً
أي حاجات بنحبها سوا ونعملها سوا ونكوّن فيها رصيد مع بعض
واحدة أنام مغمض وانا حاسس ان كل الدنيا موجوده، واني تمام وبخير، واني لقيت الباقي مني، الست اللي احميها وترعاني، واصونها وتخلي بالها عليا، ونتقابل ف منطقة مختلفة عن أي حد، طفل وطفلة بيشوفوا العالم من عيون طيبة وبال مرتاح

المتعة بتنتهي مهما طالت انما السعادة مابتنتهيش
المتعة في السرير بتخلص، المتعة ف الأكل بتنتهي بمجرد الشبع، المتعة في اللبس في السفر في السلطة وفي الفلوس
انما السعادة هي في الطريقة اللي بنعمل بيها كل ده، السعادة ف الحضن اللي يطمن، الأكلة اللي حد عارف انك بتحبها ف عملهالك، في اللبس اللي يشبهك والسفر لمكان بتحبه إلخ

ف انا ماتجوزتش عشان منظومة الشراكة دي مايخسش منها أي عنصر، مش باجري ورا الـ perfection وباقول ياكده يابلاش، انما كل أمنيتي اقابل اللي عندها مني كتير فيكون عندها فيّ كل حاجه
أنا راجل فعلاً شايف ان الجواز هو أدق وأعظم وأشمل علاقة إنسانية ومستنيها بكل الحب، وربنا يعترني ف الست اللي تغلبني التجاعيد في وجودها، وابقا معاها واحمي مقامها، الست اللي انا مش مكسوف انحني أو اعيط قدامها، والإنسانة اللي انا موجود علشان تتحقق أحلامها، وعشان ألحق حبل غرامها لو تاه أو داب

الست اللي تكون عارفه ان انا مش كداب♥️