في كل حزة لك مع البال ميعاد

بارت"14"

في بيت ام السيف دخلت بفرح وشافت السيف مستعد ييتجه لدوامه ونطقت:- مبروك يالسيف مبروك بنت جسار وافقت عليك مبروك عليك هالقلب الحنون احتوا حبك وارتاح لك
السيف بفرحه:- يايمه صحيح ميعاد وافقت؟؟ ولا تمزحين
ام السيف بدموع:- والله انها وافقت عليك والله
حضن السيف امه وابستم وهو سعيد ونطق اللهم لك الحمد عيدي هالسنه عيدين
ابو السيف:- اخترت لك مهره وبنت رجال انشهد انك خذيت ياولدي مبروك يولدي
السيف :- تقدم يبوس راس ابوه ونطق الله يبارك فيك يالغالي
ابو السيف :- اسمعني ياولدي يوم الجمعه اخذ ابوك وتقدم لهم واخذ راي اخوانها وخوالها وموافقتهم
السيف :- يبه الجمعه بعيد ليه ماهوب اليوم؟
ام السيف بضحكه:- صبرت الايام كلها عجزت تصبر يوم
السيف:- بكلم سياف يجي ونخليها خطبه وملكه ولا وشرايك يايبه ؟
ابو السيف :- توكلنا على الله وعسى ربي يبارك لكم ويتمم لكم على خير
ابتسمت ام السيف:- كنت اتمنى هاليوم كيف وانت ماخذ ميعاد ياكبر فرحتي
ركب سيارته وتوجه لدوامه وهو مبسوط ويحس ان قلبه بيطلع من قو الفرح ونطق بحب:

المحبه من الله ، و الغلا له سبايّب
‏و انت سبة غلاك اني احبك من الله

الساعه4 العصر نزلت ميعاد على صوت ماجد اللي ملى البيت كالعاده اول مايجي ترجع الحياه لبيتهم ويمتلي سرور

تقدمت ميعاد تسلم عليه ونزلت دموعها من تقدم يحضنها ونطق بحب:- كبرتي يابنتي وبشوفك عروسه الله يتمم فرحتي فيك والله انها من احب الايام لقلبي
شدت على حضنه لان كلامه يلامسها دايم تشوف ابوها لانه ياخذ اسلوبه وملامحه وحتى كلامه
غاليه بغيره:- ماشاءالله بس تحبون ميعاد وتحضنونها يارب ترزقني ب اخو يحبني
تقدم سلمان يحضنها:- انا اخوك وصديقك وش تبين ما اكفيك ؟
ليلى ناظرتهم بحب وابتسمت براحه وهي تشوف كيف يلمون بعض بحب وحنيه ونزلت دموعها من تذكرت ان ميعاد بتروح مع السيف وتبتعد عنهم صحيح بتروح بعد سنتين لكن تشوف ان هذي الايام قليله وبتمشي بسرعه
لمحت ميعاد دموع عيونها وفزت تحضنهتا ونطقت بضحكه :- افا ياليلى تغارين على عيالك عشانهم يحضنون بعض
ليلى ب ابتسامه :- لا والله الا مبسوطه وانا اشوفكم امان بعض

طلع ماجد وتوجه لبيت جده لجل يعلمه ان بكره خطوبه ميعاد واهل الديره بيجتمعون عندهم ولابد من حضوره لانه كبير العائله ووجوده مهم

دخل وابتسم الجد بحب ونطق:- يامرحبا يولد جسار واقول ليه الديره منوره اثاريه نورك
تقدم وباس راس جده بحب ونطق:- النور نورك وعساني كل ماجيت القاك
اخذتهم السوالف ودخل نياف ورحب بماجد اللي كان يجهل فعايل نياف مع اخته ودخل ابو نياف بحب ورحب بماجد اللي كان الكل يحب وجوده

سطام :- الا ماقلت لنا وش عجل جيتك هالمره العيد باقي عليه ايام
ماجد ب ابتسامه :- جاي لجل ميعاد بكره خطبتها على السيف ابن بهاج وابي حضوركم عند هل الديره كلهم
نياف فز ونطق بحده :- افا يولد جسار تبدي الغريب على ابن خالك؟
ماجد :-يانياف ربي ماكتب نصيبك عندنا وهالامر منتهي من عدة شهور
نياف:- لكن ميعاد لي ووالله بياخذها غيري وانا ولد سطام
ماجد بعصبيه:- يولد سطام احترم نفسك وبنات الرجال ماتجيب طاريهم على لسانك
نياف:- والله ماتروح لغيري وهذا العلم جاكم
تقدم ماجد وشد ياقته ونطق:- اسمع يانياف هالمره بسامحك لجل الشيبان اللي بينا لكن بنت جسار تطريها على لسانك والله ل اقطعه لك
نياف فك يد ماجد وطلع من المجلس بعصبيه وقهر وهو يشوف انه خسرها فعلاً وكان يفكر ان كلام جدته صحيح ورفضها له من باب المكابر وفكر وقال بتاخذ السيف عشان تقهره وتغيضه طلع من البيت وهو متوجهه ل السيف لجل يمنعه منها
اعتذر سطام وابو سطام من ماجد اللي كان معصب وتقبل عذرهم بصدر رحب ونطق احنا اخوان ومابينا زعل ولا تشيلون هم بينما كان بصدر ماجد نيران ماراح تطفي الا بوفاه نياف
عند السيف كان واقف قدام مكان عمله ينتظر نياف اللي اتصل عليه وقال ابيك بموضوع بينا وكان متوقع هذا الشي لكن طلع له بهدوء وابتسامه مخفيه
السيف رحب بنياف ونطق:- ارحب يابن سطام امر وش بغيت بي ؟
نياف بنرفزه:- اسمع ياولد بهاج ميعاد ماتبيك ومجبورة عليك وانا وياها من صغرنا وحنا محجوزين لبعض انتبه تدخل بينا
عصب السيف من طريقه كلامه ونطق :- هالكلام قبل سنين لكن هالايام ميعاد حرم السيف وانتبه تجيب طاريها على لسانك
نياف بقهر وعصبيه :- والله ماتدخل عليها وان ترفضك هي بنفسها وانا اللي بتصرف
السيف توجه له ومسك رقبته ونطق:- والله ان قربت ظلها يابن سطام لتكون حفرة قبرك بيدك واني ل ارمي لحمك للكلاب
نياف :- الوعد بينا والايام بتثبت لك كلامي
ركب سيارته نياف واتجهه للمزرعه وكان يقول هذا الكلام لجل يبعد السيف لكن كلامه هذا زاد السيف عناد
نطق السيف بهمس:- ميعاد اقوى من انه يكسرها هالخبل