الصفحة الخامسة..
دفتر مذكرات..
بقلم حنان الموسوي *
،،،،،،،
أنهى أحمد شرب شايه وقال لأخيه ثابت :
**_ أيي بالخير عليه.. والمطلوب..؟
راح ثابت يحوص في مكانه، ويتنحنح، بعدها قال :
**_ خوية گلت.. بلكت تقبل ياخذ بتنا ولاء.. ونتناسب والخير
يصير خيرين..
**_ وأنت تريد توسع ثروتك على حساب حياة بنتي ولاء..؟!
داضبط إبنك حسين بالأول وخليه يدير باله على مرته وجهاله
وذاك الوكت تعال احچي لي بأبن كاظم..!
راح ثابت يتصبب عرقاً، ثم قال :
**_ خوية ترة سعادة بناتك تهمني.. وأعوذ بالله إذا ردت بيهن
سوء.. ولوما أعرف نصير شنو هو.. ثق بالله ما أطلب منك ولاء
له.. أني لو عندي بنيّه چان نطيتها لنصير.. بسّ ما عندي ..
والولد متمكن وعنده بيت وسيارة وأموره ماشيه.. فگلت ليش ما
نصاهره.. و..
فقاطعه أحمد قائلاً :
** _ تمام خوية.. صار معلوم.. كل شي بأمر الله...
**_ ونعم بالله ... هاا شو وگفت على حيلك..؟!!
** _ أروح أشوف شغلي.. متواعد ويّ معمل الحديد يجهزوني
بعوارض حديد.. ولا تنسى تجرّ أذان إبنك حسين.. اودعناك.
**_ الله وياك أبو عهد..
ذهب أحمد لمتابعة بعض شؤونه، وبعد ساعات، عاد متوجها إلى
بيته مارّاً بجنب بيت شامية خفف مسيره واقترب من سور البيت
علّه يسمع صوت بسمة أو يلمحها، لكنه لم يسمع سوى صوت
فراسة وهي تهذي بصوت عالٍ.
وبعد أن عاد لبيته وقضى وقتاً طيباً برفقة ولاء ومحاسن ومهدية،
حتى شارفت الساعة على الثانية عشر، طلب من مهدية أن تعِدّ سريره، ففعلت ما أمر، وها هي تجلس بقربه وقد ارتدت له
قميص نوم بلون بنفسجي :
**_ هواي صاير لك عايفني..؟!
حنى رأسه وبدأ يمسح بلحيته وقد سرح بفكره نحو بسمة، وكيف أتته الجرأة ولمس شفتها، فباغتته مهدية و قبلته على خده وقال مستنكرا فعلته :
**_لااا..!!
تفاجأت مهدية من ردّة فعله، وعادت إلى الخلف، وراح أحمد
يتعوذ من الشيطان وقال لمهدية :
** _ أشرب جگارة واجيچ... مو تنامين..
طبع قبلة على وجنتها، وخرج من الغرفة وفكره منشغل ببسمة.
جلس على الاريكة وبدأ يدخن وهو مغمض العينين وقد تراءت
له بسمة بملامح وجهها وجسدها النحيل وعزة نفسها وملمس
شفتها الطرية ونعومة خدها.
أطفأ سيجارته وذهب حيث تنتظره مهدية وأتمّا ليلتهما سويا.
..
أما بسمة فلم يهنأ لها جفن منذ أن لمست يد أحمد وجهها كانت
شاردة الذهن تفكر به وتسأل نفسها مرات ومرات عن السبب
الذي دفعه للقيام بما قام به..
،، هذا شيريد منّي.. يريد يكسر رگبتي على بو يتيمة وأمها خِبله
ومالها والي يطلع وراها.. يريد يتونس بيّه ومن يشبع يذبني ذبّة
الچلب الاجرب.. شنو الخير اللي راح يجي من وراه وهو متزوج
وبناته بطولي.. أكيد هذا يريد يتملعب بيّه.. ؟!!. لا.. مستحيل
اخلّيه يمسّ شعرة منّي ويسوي اللي بباله.. انه مو تايهة له.. وإذا
على مساعدته فـ الله الغني.. من يجي لازم اوگفه عند حدّه وما
انطيه مجال يتجاوز أو يهيني و يستغل ضعفي وحال أمي وبيبي..
مهما تكون مكانته ومنو هو..يريد يراهق براسي تالي وكت.. ؟!!
