تريد ترجع ؟
رجع سنيني البگتهن
واحچيلي عن ذيچ الرسايل
وين راحن شگگتهن ؟
ذمة عيوني برگبتك
جيب حگهن ،
انا ماباريك ذمة
ان شاء الله تضوك الضگتهن .قبل شهرين...
جانت دنيا مَغرب و واكفة أفرش سَجادة الصلاة بغرفة خواتي و لابسة عباية الصلاة، ماما وخواتي كاعدات يسولفن، و حمودي يلعب بألعابه..كملت فرش السجادة و سئلت امي..
-يمه صار يومين گلبي مأذيني، و احلامي كلها تخوف مادري ليش.
گالت: گلبج يحس يَزهيرا..
- ليش ، شصاير..
- سوه عملية.
- منو!
گالت وهي تباوعلي صفح: جساار.
زهرة: بلحظتها حسيت وگع عليه ثكل چبير، رجليه ماكدرت احركهن، ايديه ترجف و عيوني أتجمعت بيها الدموع بس ما كدرت ابچي گبالها!!
جاوبتها واني صوتي يرجف: عملية شنو؟ ليش هو شبي!!
- عملية لظهره، يگولون مو زين.
- الله يشفيه..
شلت سجادتي بنفس اللحظة و رحت لغرفتي أصلي، ما أتحملت أضم دموعي أكثر، دخلت لغرفتي و أول ما سديت الباب الدموع گامت مدري من ياعين تنزل.
صليت واني ابچي!..و بالي و فكري كله صار يمه، كملت الصلاة و سجدت سجدة طويلة، كل دموعي وكعت بيها و كل شوغات روحي!
دعيتله هواي انو يتشافئ..و بمكان ما أروح اقرا لأن عندي فترة مراجعة!، صرت أفكر بيه! و أنشغل بالي كلش بعمليته
و صحته..جنت حايرة..قبل جان من يتمرض أدزله و أتطمن عليه و أبقئ اسأله عن علاجه و أذكره بيه، هسه ماكدر حتئ أدز رسالة وحدة لأن خطب و صار شهر ونص علئ خطوبته!
اتحملت وجع روحي گوه، جنت اصبر روحي و اگول لا زهرة خليج قوية، مراسلتج اله ماراح تفيدج بشي، راح يجاوبج مثل كل مرة ببرود و تبقين تاكلين بروحج، سمعي أخباره من أخته ولا تسمعيها منه.
وفعلاً هذا السويته..جانت اخته تحجي عنه وعن صحته ومن خلال كلامها أتطمنت عليه..
بس طول هالأيام جنت أدعيله و روحي مفرفحة جانت عليه..هذا كله واني اگول نسيته ومايهمني!
ومرت الأيام و مرت و أسمع أهلي يتحضرون يردون يرحون للبصرة، واخته"زوجة عمي" هم تريد تروح هي و ولد عمي وبناتها..
جانت روحي تتطشر مني بكل مرة أسمع بيها خبر يخص عرسه..لحد ما بيوم الإثنين راحوا للبصرة، عمي و زوجته و ولد عمي وبناته..
الإثنين 2023/6/19
الساعة 4:30 صباحاً.زهرة: متمددة بفراشي و مگابلة صورته بالتلفون و أسمع موسيقئ، تَمر الذكريات گبالي وحدة وحدة و أحس ويَ كل ذكرئ روحي تطلع..
بطني أذتني كلش لأن عندي قالون عصبي و خاصةً من أفكر يأذيني..
طفيت التلفون و الموسيقئ، و روحي بعدها تلّوب..
گلبي يريدني احجي وياه، و عقلي و ظروفي ترفض أحجي وياه!
أنت تقرأ
نظرات جنوبية
Roman d'amourعندما يجتمع الهدوء البغدادي مع عاصفـةً من الاضطرابات الجنوبيه ... عندما يجتمع القلب النقي ..مع القلب المتهور عندما يجتمع الماء والنار ...تنطفئ النار بسبب الماء لكن!! تبقئ اثآر الحطب المحروق ويبقئ ذلك السواد في قلب تلك الفتاة ... عندما تلتقي الزهرة م...