في اوسطهم

البارت الرابع والعشرون

بسم الله
اللهم صل على محمد وآل محمد وعجل فرجهم ♥🌿
♡♡♡♡♡♡♡♡♡♡♡♡♡♡♡♡♡♡♡
تمارة:_

ياحسافة على الشايف نفسة مو مهم وساكت يرضي حرگة گلبة بالعذاب..
بيت مشدد بثوابت تافهة
ولإنها بلا معنى بلا قيمة
هوت گدام اول سطو..

طفولتي خراب فوضوي
اشوف اهلي يكرهون شموع وحاقدين عليها
امي،  اخوية،  وحتى زوجتة من زوج
ابوية ماإلة  رآي بهل الموضوع من ينفتح صاحبة السكوت
من وعيت أكثر فهمت الصاير بالضبط شنو..

تعامل وفي چان خشن وياي
ضرب،  إهانة،  شك
وامي بدل مادافعلي تگلي

_ كلة من شموع سودنتهم علينا
_ محد خبلت الولد غيرة

كبرت مهشمة ذاتياً..
بعدني توة أوصل خمسطعش سنة
زوجوني..
طفلة ومالگت أمان باهلها
وعائلة محاصرة مكانة المرأة
فقط بهل المشروع الفاشل

فأكيد فرحانة بالطربگة والهوسة
وحتصيرلي غرفة وحدي
واطب واطلع
ووفي ميگدر يسويلي شي..

وياريتني مااخذت براءة من سجن وفي
رحت لبقعة أشد اذية
وبكل ذرة تعب أحس بيها
تنزرع مقابيلها ذرة حقد على هلال وشموع..

ماشفعن وگفاتهم وياي
ولا گدرن يصدن ساتر الكلام المسگي بي عقلي..

طلگت
ورجعت ادرس خارجي
موسعة  دائرة حريتي لإن وفي ترك البلد بسبب الأحداث واخذ عائلتة وراح..

وبلشت اشتغل
فمن رجع خبصنه وهوبز بس سكتة ابوية رغم خباثته استمرت علية..

ومن وفاة شموع بدأت أمي تدرس موضوع زواجي من هلال
تقرا براس أمة وتحرض الاقارب والمعارف
يلومنها وحتى يستهزئن
بلكي عواطف تجبر هلال عالزواج..

وفشلت
بس بقت بالهة هاي هالفكرة

بجية صفوان للعراق المشبوهة
صار شكم موقف بينا
وهنا أمي رجعت لساحة التخطيط..

مرة چنت اسولف وياه وانتبهت على اعراض غريبة ظهرت علية
إيدة ترجف
عيونه حمر
ودارسة لعلم النفس ماتفوت عليها
عرفت مدمن شرب

وعادتي الدمرتني رحت حچيت لأمي..

_ ماتردين تبردين گليبچ بعد كل السنيين
_ شنو؟
_ تريدين تخلين هلال يحس بكل التعب العشتي؟
_ شسوي؟
_ اسمعيني..

خطة أمي كانت بالصميم
ماينكسر هلال إلا بناتة..

عرضت  على صفوان اقاسمة نص راتبي مقابل تنفيذة

چذيت کدام ميادة وصلت  إلها بحچيي عن وجود علاقة بينه

وإجة الدور الاصعب
تمثيل الضحية
تفاصيل الحادثة كلها مفبركة
لا حضنت صفوان ولا وفي شافني
مجرد مسرحية گدام ابوية
واتقنة دور الاشرار آني ووفي تماماً.