عند ابو سلطان بمجلس الرجال اللي الكل مايدري ويش صاير
نايف قام يشوف جوال راكان اللي مايقدر يتكلم وياليت اللي شافو وش صاير ولا يكون نايف
نايف بصرااخ: مااااااااجدددد
ابو سلطان مصدوم: علامك يابوك شفيه ماجد
نايف: يبه يايبه ماجد ماجد تكفى يبه
ابو علي: ياولدي شفيه ماجد
نايف اللي مايدري يبكي ولا يروح له احتار
سلطان اخذ من نايف وقرا المكتوب: لاحول ولا قوه الا بالله يابوي ابو ماجد يطلبكم الرحمه
الكل مابين ان لله وان إليه راجعون ، لاحول ولا قوة الا بالله ،
عمر: كيف كذا وش السبب متى صار
ابو سلطان: اي وليه ماحد قال لنا ولا عندنا علم
ابو راكان: ياولد قلت لك ابو ماجد مايرد احد جعله الجنه
ابو علي: امشو خلونا نشوف اخبار عنه
نايف اللي طاح على ركبه ولا تكلم ابداً يفكر برفيق عمره وابو ماجد اللي يعتبره مثل ابوه ويعزه حيل
علي اللي حس على نايف ابو فهد: قم نشوفه
ابو سلطان: يابوك مايصير تجلس كذا ولا تكلم تعال معنى خلنا نشوفه
عمر: يمكن بعد مب صحيح
نايف اللي كل تفكيره ماجد يبي يروح له: يلا خلونا نروح بسرعه
والكل طلع ابو سلطان وابو علي وابو راكان ركبو مع راكان
وسلطان وعمر وعلي راحو بسياره نايف والسواق سلطان لان نايف مو قادر يركز وخافو عليه
سلطان: ياولد استهدي بالله وتعوذ من الشيطان والميت يحتاج ندعي له ياخوك مو كذا
عمر: اي يانايف مايصير تواجه ماجد كذا وضعك هو يحتاج من يواسيه لاتزيدها عليه
علي: صح يابو فهد تصبر عشان ماجد
نايف اللي كان ساكت مارد عليهم ابد وينتظر متى يوصل
.........
عند الشياب
ابو علي: يا فهد الحين حنا مشينا بس وين الوجهه ماندري هم وين
ابو راكان: صح ماندري وينه مادقيتو على احد
راكان: نايف يقول دق على ماجد اكثر من مره مايرد
ابو سلطان: الله يعينه ويصبره هالمسكين شلون تبونه يرد لكن خلونا نروح لمستشفى الديره ونسالهم عنه
ابو علي: اجل ياراكان دق على العيال عطهم علم
راكان: ابشر
دق راكان على سلطان: الو يابو فهد
سلطان: هلا هلا لبيه
ركان: لبيت حاج اسمع الحين عندكم على وينهو فيه ابو ماجد
سلطان اللي فعلاً من الصدمه حركو لكن ماعندهم اي خبر عنه ووينه ناظر العيال: هي انت وياه ابو ماجد وينهو فيه
العيال تكتفو بيعني مادري
علي: نايف ماتدري وين ابو ماجد
نايف بضيق: لاوالله مادري حاول تدق على ماجد مافيني اكلمه الحين
عمر: انا بدق
الكل يلا بسرعة
سلطان: الو راكان تسمعني
راكان: اي اسمه عرفتو وين!
سلطان: لاوالله ماندري لكن بنحاول ندق على ماجد ونعطيكم خبر يلا بسكر
راكان: فمان الله
ابو سلطان: يارجال مافي غير مستشفى الديره خلونا نروح له وفعلاً توجهو له
___________
عند الحريم
بين سوالف البنات والضحك والطقطقه
ام سلطان: ترا الليله عشاكم عندنا ولا فيه مفر ولافي عذر
ام راكان: والله وجلسنا واستانسنا جعلها دايمه لكن والله اعتذر ورنا ابو راكان وراكان
ام سلطان: ابو راكان وراكان يتعشون معانا مافي عذر
ام علي: انا والله عشان لينا تبيكم بنجلس
لين اللي بخاطرها تقوم وبنفس اللحظه وناسه ماتبي
جود: عاد يابنات والله جاني تكاك من البيت ليه ماتجون
عاد انتي يا لينا قريب بيتكم
غدير: ياروحي ياجود تعرفين حنا مانقعد اذا ماكان عندنا ضيف نروح للعزبه وبيتكم بعيد واخواني مايقعدون من بيجيبني
لينا: حسبالك يا جود مابي والله ابي اجيك بس امي ماتخليني الا معاها اروح
جود: خيره خيره اهم شي اجتمعنا
غدير: ايوالله وهذي الساعه المباركه
لينا: ياعمري والله
لين: ماتحسون سوالفكم نفسيه؟
لينا: الله اعلم من النفسيه ياختي قومي اذا مب عاجبتك
البنات بضحك يا لين انتي بكل شي منفسه اعوذ بالله اضحكي شوي ولا يعني صرتي جامعيه معاد لك خلق لنا
لين: والله معاد لي خلق للديره بكبرها
جود: الله اكبر عاد وين بتروحين ! حسستيني راعيه سفر وانا مادري اقول اهجدي مالك غير الديره وش زينها
لينا بضحك: تكفين جود اسكتي لاتقلب علينا تقول بتتوضف وتسافر ومعاد تجي الديره
غدير: اوف صاحبه السفر تقلب علينا الله يالدنيا وهذي هي تخيل بس اجل لو حصلت يمه منك يالين
لين: والله من زين ديرتكم لا شوارع زينه ولا مطاعم فخمه وكوفيهات
جود بضحك: تكفين ياراعيه الكوفي مافيه افضل من قهوتنا شوفي طعمها تجنن قالت ايش قالت كوفي ومطاعم
لينا: ايي ومطاعم الله يكرم النعمه اكثرها زيوت شوفي طبخ اهل الديره من نظافته ولذاذته ماتخلين شي
غدير: ايوالله يازينها
لين: اف منكم اللي يجيكم رايق يطلع منكم منفس
لينا: اقول خفي علينا
غدير بضحك: خلاص بنات خلوها تعيش باحلامها
الكل ههههههههههه
جلست لين عند امها
ام علي: وين البنات ليه جيتي
لين: جالسين بالحوش قلت بجي اجلس عندكم شوي
ام سلطان: يهلابك
ام راكان: الا لين انتي باي صف
لين: ثاني جامعه
ام راكان: ماشاء الله عسى ربي يوفقك
لين: امين خالتي وياك
وجلسو سوالف كباريه وضحك وطقطقه وجهه ثانيه البنات اللي ماخلو سالفه ماقالوها
__________________
عند الشياب
وصلو المستشفى وقفو عند الاستقبال يسالون عن ابو ماجد
موضف الاستقبال: مافي عندنا احد بهذا الاسم
الكل مستغرب وين بيروح يعني واللي بالديره يقولون طلعو العصر
دق راكان على العيال وعلمهم ان مافي احد بالمستشفى وقال لهم ارجعو البيت مافي احد عندهم
نايف كان متردد يرجع لكن مايقدر يرفض ابوه
وراحو البيت والكل جلس بالدوانيه
جاء ابو سلطان وابو علي وابو ركان وراكان
دخلو الدوانيه وجلسو مابين اتصالات لشخص يقرب لهم ولا احد رد
ابو سلطان: قومو نصلي المغرب تاخرنا
الكل قام وصلو جماعه ونايف قال بيروح الغرفه
نايف كان حاط شماغه على كتفه والطاقيه والعقال على راسه وباين عليه التعب وضايق: ياولد
جود: غدير شوفي في احد ينادي
غدير: هلا نيوف امر
نايف: شوفي لي طريق بادخل الغرفه
غدير يلا بنات نروح الصاله لحد يدخل
قامو البنات وراحت غدير تفتح لنايف اللي كان واضح عليه التعب
غدير باستغراب وخوف: نايف صاير شي!!!!
نايف مارد دخل وتركها
لحقته غدير: نايف انا اتكلم معاك ابوي صاير له شي! اخواني!! تكلمممم نايف لاتروعني
نايف اللي شاف الخوف فيها: مافيه شي ياعيون اخوك
غدير: اجل شفيك كذا ضايق ياخوي غريبه نيوف مايناسبك الضيق
نايف والدمع بعينه ولايبي يبين: ابو رفيقي ماجد يطلب الرحمه
غدير بصدمه: هااا؟ وشهو!! ابو مين قلت
ناايف: عمي وابوي الثاني عبدالله عسى ربي يرحمه
غدير: ياروحي الله يصبر قلبك ياديم ان لله وان إليه راجعون
نايف: امين يارب
غدير: تبي اجيب لك شي؟
نايف: لا بجلس بالغرفه اذا حصلتو علم عنه علميني
غدير: ابشر
راحت غدير عند البنات
ام سلطان: امي غدير فيك شي
والكل يناظر فيها
غدير ماتدري شلون تبدا
جود: بنت شفيك
غدير: يمه ابو ماجد انتقل الى رحمه الله يحتاج دعواتكم
الكل مصدوم ويرددون ان لله وان إليه راجعون ، لاحول ولا قوة الا بالله
ام راكان: متى صار يامي
غدير: مدري ياخالتي نايف قالي الحين
ام سلطان: وشلونه اخوك اكيد ضايق
غدير: ايوالله وباين حيل ضايق
ام راكان: الله يعين ويرحمه يارب
الكل امين
________________
عند ابو سلطان اللي مايدري وش يسوي غير انه يعلق جوال ماجد من المكالمات
واخيراً رد ماجد
ابو سلطان: هلا وليدي اخبارك وينكم فيه من الظهر وانا انتظركم
الكل قمز عند ابو سلطان بيسمعون وابو سلطان يبعدهم
ماجد بنبره تكسر القلب: هلا عمي حنا بالرياض
ابو سلطان مايدري شيقول: اخبارك يابوك عساك طيب
ماجد بكسر: ماني بخير ياعمي ماني بخير
العيال مابين يبه ، عم ، ابو سلطان حط سبيكر نبي نسمع
ابو سلطان وهم ناشبينه ويتوعد فيهم: افا يابوي علامك
ماجد بصوت باكي: ابوي ياعمي راح وتركني انكسر ظهري ياعمي بدونه اهخ يابوي اهخ
ابو سلطان اللي ضاق من ضيقته: يابوك لاتضيق وتذكر ان كلنا ماشين بالطريق ماندري متى يومنا ومالك عن المقسوم يابوك وتذكر بعد انه راح للي اطيب مني ومنك ياولدي
ماجد: عسى الله يرحمك يابوي ويجبر كسرنا
ابو سلطان: امين وينك فيه ذالحين
ماجد: بمستشفى الرياض
ابو سلطان اللي مايدري شلون يساله متى الدفن: متى ترجع يابوك
ماجد بضيق: بعد ماندفنه
ابو سلطان اللي واخيراً بيقول متى: متى يعني عسى ربي يرحمه ويغفر له
ماجد: بعد صلاه العصر ونعود
ابو سلطان: زين يابوك انتبهلك
ماجد بتنهيده: ابشر
ركض عمر اللي نسى ان عندهم ضيوف وراح لغرفه نايف
البنات مصدومين بين شفيه ، وعسى ماشر ، ان شاء الله خير
ام سلطان: يامي غدير روحي شوفيه مافيني حيل اقوم اسمع
غدير: ابشري
عمر فتح الباب بقوه
نايف: بسم الله في احد يفتح الباب كذا ؟؟
عمر وهو يجمع انفاسه: اقول اسكت واسمع
نايف: وش تكلم
عمروهو يحاول يتكلم من الركض: ماجد ماجد
نايف اللي هنا واخيراً جاء اخبار عنه: شفيههههه تكلم
عمر: رد على ابوي وكان ضايق وهم الحين بالرياض والصلاه عليه العصر
نايف: اسالك بالله
عمر: تشوف الموضوع مناسب امزح فيه !
دخلت غدير: شفيكم فيه شي ؟
الكل لا بس بنمشي لعمي عبدالله
غدير: الله يرحمه بس وينهو فيه!
عمر: بالرياض بنمشي شوي ونعود معاهم
نايف اللي قال انا مقدر اصبر بروح الحين وانتم الحقوني
خذا شماغه والطاقيه بيده وحط عقاله على راسه
طلع من الصاله وعيونه تحت وهو مستعجل
جود شافت نايف انصدمت شكله كان وهو تعبان حلو
شعره الكثيف وشخصيته بالعقال وشماغه على كتفه
لين: والله صدق نايف الشي الحلو بالديره
لينا: اسكتي الله يفشلك مب وقته
جود: اول مره اشوف لين تكلم صح
لين: اصلا كل كلامي صح بس انتم ماتفهمون
لينا: تكفين اسكتي الناس ضايقه
وطلع نايف قال لابوه انه بيمشي الحين ودعوه
ابو سلطان: تمهل يابوك وانتبه لطريقك
نايف: ابشر يبه
حرك نايف وهو ينتظر متى يوصل
انتظرو البارت الجاي والاحداث 🫶
