_مش أنا قررت أحكي لك كل حاجة عني؛ لالا متبصليش من تحت النظارة وتعمل فيها هاني سلامة، ايه النظرة دى؟!
بص أنت لازم تسمعني.
_مع كل كلمه كانت بتقولها كان نفسه يضحك ويقولها أجري من هنا ياشاطرة العبى بعيد، بس حس نفسه بيسمع مسلسل كوميدى مش هيتكرر أبدا، فبدأ يسمع بتركيز...
_السكوت علامة الرضا، طالما ربعت إيديك، وابتسمت تبقى موافق تسمعني، المهم بقا
اسمي...
حطت ايديها على دماغها تفكر، لالا مش مهم اختار الإسم اللى يعجبك، دى كلها اسماء وأنا نفسي أغير اسمي
عمري بقا، لالا مش مهم خالص، أحمد حلمي بيقول سنك فى البطاقه غير سنك مع حد بتحبه غير سنك.... برده مش مهم، المهم أنى أبان أصغر منك
دراستي بقا يا سيدي.... أممم لالا بردو مش مهم، دى كلها شهادات على الحيطان هو فيه حد بيشتغل بالشهادة بتاعته؟!
**أنت بتبرق لي كدا ليه؟! ومبتسم كده ؟ مدت ايديها شدته .وهي بتقول: تعالى بس نقف فى جنب بدل الناس ما تتفرج علينا
_الغريبة أنه ماشى معاها مستمتع، ونفسه يضحك أوى بس خايف هيبته تضيع فى لحظة، وحقيقي سبحان من خلاه متحكم فى أعصابه.
=وقفنا فين؟ أيوة نكمل، بابا بقا دا راجل سكره، اسمه
لا مش ضرورى الواحدة بتتكتب على اسم جوزها، أيوة صح وبيشتغل.. مش مهم بردو لأنه على المعاش مش هيفرق كتير
يووووه وماما كمان على المعاش، ولو اتكلمنا عنها هشتكى منها أصلى مش عجباها خالص، ومش بتكلم كلمه إلا وأبو وردة بيرد عليا
__لا مترفعش حواجبك كده ويكأنك منصدم من كلامي، أمي هعمل أى يعني؟ في الأول والآخر أمي
نكمل كلامنا اخواتي
عندي اخوات كتير، أصل اللى برتاح ليهم واحبهم بيبقوا اخواتي، بس تعرف ماليش أصحاب خالص، هههه أنا مش محتاجة، أنا بعامل الناس كلها حلو ...دا كفاية جدا
أيه تانى عايز تعرفه عنى..
_كان نفسه يضحك أوى ويقولها هو أنا كنت عرفت أولانى عشان أعرف تانى؟! وقبل ما يستوعب لقاها بتقول: احكي لي عنك أنت بقا..
__اسمك أي؟
حاول يفتح بقه يتكلم بس لقاها بتقول: مش مهم اسمك، هو فيه حد أصلا بيناديك بيه كله بيقولك يا دكتور ودا كفاية
_عندك كام سنه؟
_لالا مش مهم، المهم أنك أكبر منى، إحنا اتفقنا إن السن دا رقم ملوش لزمة
_طبعا واضح بتشتغل أى وخريج أى؟ يبقى ساكن فين؟
صح صح فى المستشفى، هو فيه دكاترة تعرف بيتها فيها ولا بيدخلوها!! أنا موافقة ما إحنا هنشتغل سوا بعد الجواز ونروح ونيجى سوا
بس فيه مشكلة واحدة...
بصلها بتركيز أوى ونفسه يعرف أى المشكلة دى بعد كل اللى قالته، واتفاجيء بيها بتقول
لما نخلف هنسيب العيال فين؟
اتكلم هو أنت ساكت ليه! مش تفكر معايا
هنا بقا فقد اقصى درجات انه يمسك اعصابة وضحك بصوته كله، خلى كل اللى رايح واللي جاى بيتفرج عليه ويقول الدكتور جراله أى ما كان بعقله.
_اهدى يا دكتور الناس هتقول عليك أى بس، طيب لقيت حل للمشكلة دى ولا هنعمل اى؟
سؤالها كان جاد جدا علشان كدا كان مع كل كلمة بتنطقها بيضحك أكتر
لحد ما هى اتكلمت من جديد وبجديه
_تصدق كنت فاكرة انك عاقل وقولت هتجوز دا، طلعت منيهم، أنا مش موافقة اتجوزك
لحظة كان بياخد نفسه من الضحك سمع كلامها واخيرا اتكلم
_انتى بردو
_اخيرا، اخيرا لقيت لسانك
حط ايديه فى جيبه وقبل مايمشى قالها
_أنا إنسان طبيعى وليا لسان واحد، لكن، لكن أنت ماشاء الله عندك سبع السن
ضيقيت عنيها وبصتله وهي بتقول
_الحلاوة لما بتكتر بتموع النفس
لوهله بدأ يستوعب هي تقصد أى
يعني أنا حلاوتي بتموع النفس والأبراج اللي طايرة منك حلها أي ....
ومشي يضرب كف علي كف
........
#وفاء_الغرباوي
#متمردة
