لم أكن بغيّا

البارت الثامن والأربعين

مساء العافية على اجمل عيون

من اشتاكلك صفّة ضلوعي تطيح
وتغندب الدنيا والسواد يحل
اليمر ويشوفني يلكاني بس أخيال
من نبرة كلامي يعرف فأكد خل

#يمامة

مشاهدة ممتعة للجميع تفاعلكم عالبارت

°°°°°°

اليوم كاعدة من الصبح  نشيطة وفرحانة بيت جدو كلهم معزومين يمنة عالغدة

طلال قبل يوم ما خلة شي ما جابة  اللحم كومة تكوم بالوكت الي الناس جانت بحسرة اللحمة

فاكهة من كل نوع  كال انو أهل الجنوب عدهم اهم شي العزوبية والي يروحلهم ودهم يفرشون ارواحهم عالسفرة
وكال هاي اول طبتهم النة لازم نسوي شي مرتب  اني طبعا ماعرف اطبخ طبخ قوي
المرة الي التشتغل عدنة بالبيت هيّة لزمت الطبخ واني اساعدها بالثرم والتحضير

طلال،ها ايسل وين وصلتن

حاجيتة واني اثرم ....دجلة دجلة يمعود

,يأبة دجلة ولايهمج بس لساني متعلم على ايسل  بس تدرين دجلة لايكلج أكثر

،اني من زمان اصلا ما حابة ايسل مدري منين جايبتة ذيج الماتتسمة

،الله يرحمج يمة لو مسميتني فرات

،ارجوك لاتشغلني بالسوالف عن شغلي عندي خطار اليوم  يله شرف المحل من فضلك

،اوووو صارت ما تتحاجة بعد 

،ايي طبعا بس تضوجني اودي على خوالي يجون يهدون عليك بس مو تستخدم رتبتك ضدهم

،هههههههه  رايح بوية رايح اسبح وابدل
احضر روحي حتى نسابتي يشوفوني حلوو

طلع من المطبخ يضحك واني اضحك احساس شكد حلو انو اني ام بيت ويجيني خطار اقوم بواجبة
رجعت أعزل بحوض الاماعين حجت المرة

،الله يسعدكم خالة تدرين اول مرة من يوم الشتغلت هنا اشوف الباشا هيج يضحك من كلبة 

،شنو ماجان يضحك

،هوى اصلا جان قليل يتواجد بالبيت.. يعني جنت اجي اخلص شغلي وروح وماشوفة.. عكس هسه.. وهوة يتعامل وية الكل برسمية ماعداج انتي هيج يدخل للمطبخ يشاقيج ويضحك وياج  مبين هواي يحبج

،انتي من شوكت تشتغلين هنا

،من وكت المرحومة أمة  جنت اجي انضف.. والحجية اقوم بواجبها من توفت كلت نكطع رزقي.. بس الباشا الله ينطي مابطلني خلاني مستمرة   لأن اني هذا هو رزقي والباشا  هم ما مقصر موصيني شحتاج من البيت مسواك اكل اخذ وياي وكل شهر يطيني زايد فوك راتبي .

،البيت بيتج خالة واني هم اكلج اي شي تحتاجي اخذي

،بعد عمري ولله ما تقصرون