🍃 مشاعر_صامتة 🍃| ( مكتملة )

🌛بارت 116🌜

🌺مشاعر صامتة🌺
                   بقلمي✏️: خولة غزالي🌹
    

اما عند إلياس جر مرتو عندو و بدا كيدورها و يصفر نطق بابتسامة: تي فين كنتي مخبية هادشي كامل ازين شناوا مانعاودوش لعرس
بتاسمات ليه باستو فحنكو و نطقات: بصح جيت زوينة
جرها مركبها فلوطو و نطق: جيتي كتقتلي
بتاسمات ليه فالمقابل سماح لي كانت شادة فألاء بانت ليها أسماء ركبات مع راجلها و تا حنان اما نجوى واقفة كدوي مع ياسر نطقات بمزاح: لا صافي انا لي بايرة
شافت فألاء نطقات: و نتي ماغتمشيش عند راجلك
بتاسمات ليها ألاء هزات عويناتها تشوف فين خلاتو تا لقاتو واقف قدامها و عينيه عليها بتاسمات ليه بحب و نطقات: ناصر
عض حنكو مد ليديه كيدخل ليها خصلاتها فزيف و نطق بهيام: دكتورتو
شاف فعويناتها خضرين لي كانت بارزاهم بلميكاب و نطق: فاتِنتي جيتي تفتني
بتاسمات بحب عويناتها كيبريو و هادشي زادها جمال على جمال خلاه ينطق بلا مايحس: بلا مانمشيو لعرس نمشيو لدارنا؟
بدات كترمش بزربة خافتو لا تدور ليه فلخوا و هي عارفاه كيدوي من نيتو ما قاطع نظراتهم غير سماح لي شدات فناصر و نطقات: ابعد من لبنت خليها تحضر لعرس و نت بقا ليك غير نقاب لي مادرتيهش ليها
شاف فيها و نطق بجدية: ماكرهتش راها كتفتن
بتاسمات سماح ياله اتنطق تا تلفتو لعند ياسر لي نطق: ناصر نگافات ايركبو مع لؤي صافي
اومأ ليه ناصر فحين سماح لي قلبها كان كيضرب ملي سمعات سمية تفكرات بيها شي حوايج فالماضي نعلات شيطان و نطقات: انمشي مع نگافات نت دي ألاء صافي
نطقات هكا محاولة منها تخليهم براحتهم و هي عارفة مزيان خوها مع ألاء كيزعم عليها بزاااف و هي كتحشم قدامها ففضلات تخليها فراحتها و تاهوا جاتو مزيانة أومأ ليها مخلياها منساحبة متاجهة هي و نگافات ناحية لوطو لخرى اما عميد ديالنا جر ألاء من خصرها و نطق: الاء
هي سمعات سميتها سرطات ريقها عرفاتو ايقول شي حاجة امكن ما تعجبهاش اومأت ليه براسها فحين هو نطق و عينيه فشفايفها: نوصلو تنقصي شوية من هادشي لي فوجهك واخا؟
بتاسمات ليه ابتسامة بريئة مخلية سنيناتها يبانو خلاتو غارق فيها و نطقات: واخا لي رتاحيتي ليه
ديك ساعة تحنى لراسها قبلها فجبهتها راضي عليها كل رضى عمرها خصرات ليه خاطرو بعض مرات كيقول راني محكر عليها و لكن غيرتو كديرها ماباغيش لي يشوف فيها من حجاب و دارو ليها غير باش تا حد ما يتفتن فشعرها عند بالو مقوي عليها ماعارفش انها عينيها تعطيهم ليه و هي كتشوفو كفاش كيخاف عليها و دايرها فوق راسو تاهوا مايخصرش ليها فعلاش ترفض ليه هو حب بيناتهم متبادل و تا تفاهم حاضر بيناتهم بجوج بيهم بدماغهم و عقلهم بجوج بيهم واعييين و متقفين خاطيهم تصرفات لبراهش غادين على مبدئ ان كولشي كيتحل بتفاهم
بعد منها و شد فخصرها و تم متقدمين ناحية لوطو ديالو مركبها و ركب مكسيري سابقهم مايتسناهمش واخا يكون حمق
اما سماح لي حلات لباب لور و نطقات موجهة هضرة لجوج نگافات: طلعو البنات
شكروها و طلعو فالمقابل هي حلات باب قدام و طلعات بلا ماتشوف فشكون لي سايق ديما كتسمع ان  ياسر عندو خوه و لكن عمرها شافتو و لا سولات عليه و لي ضارها كتر نهار خرجات من مصحة و شافت ياسر فكرها فشخص عزيز على قلبها بزاااف جاها كيشبه ليه
نطقات ملي دخلات بهدوء: سلام عليكم
حسات براسها تجرات من ليديها بجهد تا توعتات عقدات حواجبها و حطات عينيها فليدو لي شادة فليديها سرطات ريقها من ريحة لي كتشم مستحيل تنساها خلات قلبها يرجف هزات عينيها باش يطيحو فعينيه خلات بؤبؤ ديالها يتوسع بصدمة و تنطق بصوت خافت: لؤي
هو فالمقابل كيشوف فيها و عينيه تايهين فيها ،قطع تيلي و مع بغا يهبط بانو ليه طلعو لور شوية طلعات حداه شي وحدة و لكن دغيا هز راسو ملي سمع صوت لي مستحيل ينساه كان عندو دور كبييير باش يخليه يصبر فديك مصحة و غير شافها بلا مايحس قربها ليه و عينيه متلهفين ليها عام و نص خلاتو فيها بلا ما تشوفو و لا تبقا تزورو غير بسباب غلط دارو بسيط حيت من مورى ما خرجات جات لعندو و لقاتو معصب و ماطايقش راسو تناقشو و قال ليها ماتبقايش تجي لعندي تاحد ما طلبك دارتها ليه على قد فمو ندماتو تا ما قد ،طول مدة لي كان فالمصحة تجددات لقائتهم تحدتو مع بعضياتهم عاود ليها و عودات ليه كانت ليه صديقة شوية ولات حاجة خرى دازت 5 شهور و خرجات خلاتو وحيد و مع دلك كانت كتجي كل سيمانة تا نهار قال ليها ماتبقايش تجي تماك مابقاتش عتبات عندو كان ناوي يخرج يقلب دنيا عليها باش يلقاها و يعرفها شكون ساعة كتاب ليه يشوفها بعد من ساعة من خروجو
هي فالمقابل قلبها كان كيضرب سرطات ريقها و نطقات ببرود: حيد ليديك عليا وعتيني
نطق و هو مبعد ليدو من عليها دار فراجة لنگافات: اش تديري هنا
شافت قدامها كتصيب حوايجها و نطقات: كنظن ماشي شغلك
عض شفايفو كاتم غضبو و نطق: سمااااااح سولتك
تنهدات هي عارفاه مزيان من بعد ما دخل لمصحة تبدلات شخصيتو على اول سيمانة ليه شخصيتو تخلطات مابين شخصية ضعيفة و شخصية حنينة ولات شخصيتو تابتة و حنينة و لكن فنفس لوقت ملي كيشعل كيفقد سيطرة على راسو داكشي لي خلاها تردد و تنطق مبعدة على صداع: نجوى كتبقا مرت صاحب خويا
كمش حواجبو و كسيرا ملي شافهم كسيراو: شكون فيهم خوك
نطقات بصوت بارد: ناصر
بتاسم و نطق: اممم

يتبع....✏️

هاني زوجتهم ليكم كلهم ماخليت تاحد باير 🙂باقا اسماح نفك حريرتها🥺