𝙎𝙤𝙣𝙜 𝙍𝙚𝙘𝙤𝙢𝙢𝙚𝙣𝙙𝙖𝙩𝙞𝙤𝙣🎧: 𝘽𝙤𝙮𝙛𝙧𝙞𝙚𝙣𝙙 𝙗𝙮 𝙅𝙪𝙨𝙩𝙞𝙣 𝘽𝙞𝙚𝙗𝙚𝙧
- BOYFRIEND -
ဒီနေ့ ရာသီဥတုက လှတယ်။ ကြည်လင်နေကျ နွေရဲ့ကောင်းကင်ထက်စာရင် အုံ့မှိုင်းနေတဲ့ ကြပ်ခိုးရောင်မိုးတိမ်တွေက အနုပညာပိုဆန်တယ်လို့ထင်တယ်။ ပြီးတော့ ခပ်ဖွဲဖွဲကျနေတဲ့မိုးစက်တွေ။ အကာအရံမဲ့နေတဲ့ မျက်နှာထက်ကို ထိတွေ့သက်ဆင်းလာတဲ့ အဲ့ဒီမိုးရေစက်လေးတွေကို သူသိပ်သဘောကျတယ်။ မနက်က အမှတ်မထင်မြင်လိုက်ရတဲ့ စိတ်ပျက်စရာမြင်ကွင်းနဲ့ယှဥ်ရင် မိုးစက်မိုးမှုန်လေးတွေက သူ့ကိုအများကြီးအေးချမ်းစေတယ်လေ။" ဒီကို ရောက်နေတာပဲ.."
" အမေ့.."
အာရုံတို့ကိုပျက်ပြားသွားစေတဲ့ အသံတစ်ခုကြောင့် ရှင်းမ်ဂျိတ်ခ်ပုခုံးလေးတွေ လှုပ်ခါသွားရတယ်။ ဒါကထိတ်လန့်မှုကြောင့်မဆိုသာသော်ငြား သူ ဒီအသံကို မျှော်နေခဲ့မိတာပဲ။
" မိုးတွေရွာနေတယ်ေလ။ ဘာလို့ ထီးမယူလာတာလဲ။"
ပိုင်စိုးပိုင်နင်းရှိလွန်းတဲ့ အမိန့်ဆန်ဆန်အသံဟာ နည်းနည်းလေးမှ နာခံချင်စရာကောင်းမနေခဲ့။
" ဟက်...စိတ်ကောက်နေတာပဲ"
" ခင်ဗျား စကားကို ဆင်ဆင်ခြင်ခြင်ပြောပါ ဟီဆွန်းရှီ..။ ကျွန်တော့်မှာ ခင်ဗျားနဲ့စနောက်ချင်စိတ်ရှိမနေဘူး။"
ခပ်ပြတ်ပြတ်ဆိုတော့ ထိုသူက ခနဲ့ဟန် ပြုံးပြန်တယ်။ အကြိမ်တိုင်းစွဲလမ်းစေတဲ့ အဲ့ဒီအပြုံးတွေကို ဒီတစ်ကြိမ်တော့ သိပ်ကြာကြာမကြည့်ဖြစ်တော့။ စိတ်ဆိုးနေသေးတာကြောင့်လည်း ပါမယ်။ ဒါမှမဟုတ် ထိုသူပြောသလို စိတ်ကောက်နေတာကြောင့်လည်း ဖြစ်နိုင်ပါတယ်။
" ကိုယ့်ညီမဝမ်းကွဲလေးပါ။"
လှည့်ထွက်တော့မယ့် ဂျိတ်ခ်ခြေလှမ်းတွေက ဇက်ကြိုးဆွဲခံလိုက်ရတဲ့ မြင်းရဲ့ခွာတွေလို တုံ့ခနဲ ရပ်သွားရပြန်တယ်။ အီဟီဆွန်းဆိုတဲ့ ခန့်မှန်းရခက်တဲ့ ဒီလူက သူ့ကို ဘယ်လိုချုပ်ကိုင်ရမလဲ ကောင်းကောင်းသိနေပုံပဲ။ နှုတ်ခမ်းတစ်ဖက်တည်းကို ပင့်တက်သွားစေတဲ့ မထီသလို အပြုံးတွေက ဒီလူ့ရဲ့ သင်္ကေတဆိုလည်း ဟုတ်တယ်။ နောက်ပြီး စီးကရက်ကိုရှိုက်ရင်း မှေးစင်းသွားတတ်တဲ့ မျက်ဝန်းလှလှလေးတွေဟာလည်း တစ်သက်တာ ပျော်ဝင်ချင်စရာပဲ။ ပါးလွှာနေတဲ့ နှုတ်ခမ်းပါးဆီကနေ မှုတ်ထုတ်ခြင်းခံလိုက်ရတဲ့ စီးကရက်ငွေ့တွေကတောင် မနာလိုချင်စရာကောင်းတယ်။ ဒီလူကဘာလုပ်လုပ်ကို ငေးချင်စရာကောင်းနေတာက ခက်လွန်းသည်ပဲ။
YOU ARE READING
𝐁𝐎𝐘𝐅𝐑𝐈𝐄𝐍𝐃 (𝐇𝐞𝐞𝐉𝐚𝐤𝐞)
Romance" ဟီဆွန်းရှီ..." " Hmm?" " ကျွန်တော်သာ ခင်ဗျားကောင်လေးဆိုရင် အခုဘာလုပ်မလဲ။"