နေခြည်။
နေခြည်ဆိုတာ အသက် (၂၄)နှစ် အရွယ်ရှိတဲ့ အသားခပ်လတ်လတ် မိန်းကလေးတစ်ဦးဖြစ်တယ်။
နာမည်နဲ့လိုက်အောင် အဝါဖျော့ဖျော့ အဝတ်အစားလေးတွေ၊ လိမ္မော်ဘက်သန်းတဲ့ အရောင်တွေနဲ့ အနီရောင်ထဲက အဝတ်အစားတစ်ချို့ကို ကြိုက်နှစ်သက်တယ်။ ဝတ်ဆင်လေ့ရှိတယ်။
နောက်ပြီး သူ့ကို ဗဟိုပြု လည်ပတ်နေတဲ့ လူတွေကလည်း ဒီစကြာဝဠာထဲ ရေတွက်မရအောင် ရှိနေပြန်တယ်။
အဲဒီထဲကမှ နေခြည်ဟာ သူနဲ့လားလားမျှ မသက်ဆိုင်တဲ့ 'အမွန်' နဲ့မှ သံသရာထဲ ဝင်တိုက်ခဲ့ပါတယ်။
နေခြည့်စိတ်နဲ့ အမွန့်မှာ တငိုငိုတရယ်ရယ် ဖြစ်ရတဲ့ အချိန်ကာလတွေ ရှိဖူးသလို ပစ်ထားလိုက်တော့မယ်ဆိုပြီး အချစ်မရပ်သွားနိုင်တဲ့ စိတ်ကြောင့်လည်း လူပြောခံရတဲ့ အခြေအနေမျိုးတွေပါ ရောက်ဖူးတယ်။
ဒါပေမယ့် နေခြည့်ကို အမွန် မမုန်းပါဘူး။ ဘယ်တော့မှ မမုန်းဘူး။ စိတ်ဆိုးတာ၊ စိတ်ပင်ပန်းရတာတွေသာ ရှိချင်ရှိမယ်။ တစ်သက်နဲ့တစ်ကိုယ်တော့ နေခြည့်ကို မုန်းတယ်လို့ မစဥ်းစားမိဘူး။
အမွန်က နေခြည့်ကို ပျော်စေချင်တယ်။ နေခြည်ပျော်ရင် အမွန်လည်း ပျော်တယ်။
လူတွေက နေခြည့်ကို 'ချစ်မိသွားစေနိုင်သော ကြောက်စရာကောင်းသည့် အလံနီ' လို့ တိတ်တခိုး နာမည်တပ်ထားကြတယ်။ အစကတော့ ဘာကြောင့်မှန်း အမွန်လည်း မသိ။
ဒါပေမယ့် ပတ်သက်မှု အချိန်ကြာလာလေ အဓိပ္ပာယ်ကို သိလာလေပါပဲ။
နောက်ပြီး ဒီဝတ္ထုဟာ နေခြည့်အကြောင်းထက် နေခြည့်နာမည်အကြောင်း ပြောပြချင်လို့ အမွန် ရေးသားခဲ့တာ ဖြစ်ပါတယ်။
