حَظ المكَان اللَي يضوي فِيه قَمَرين قَمْر السَّماء وَقَمر وَجْهك المُعتاد .

البارت الثاني والثلاثين

راحت براءه مع بنات الريف لبيت الخاله رمله اللي عندها كل أخبار اهل الريف واللي سكنوا الريف ،كانت براءه تسمع أخبار من عندها وما سمعت طلاق ريفال وغيث زادت غيرتها اكثر وعرفت ان غيث وثق في ريفال جن جنونها وقررت تستخدم اخر حل لها اللي واثقه مليون في المائه ان ريفال بتموت مش إلا بتطلق وبترجع لغيث او تزوج المهم ما يكون غيث مرتاح وهي لا ،روحت بيتها ومن غبائها أخذت نفس الرقم اللي راسلت غيث منه وسجلت رقم ابو محمود من تلفون أبوها وراحت الغرفه بعذر انها مريضه تشتي ترقد، رنت على التلفون جاوب ابو محمود وقال :الو؟
تأكدت براءه انه ابو محمود وقالت بتمثيل الحزن :ريفال وينش عابد يقول اليوم بتهربوا جهزتي ملابسش؟أساسا ليش تزوجتي غيث وتعرفي ان صالح بيتزوجش ويغطي فضيحتكم و....
انتفخت عروق ابو محمود بغضب وهو من اهل الريف اللي ما يرضوا بالغلط ابدا وعاد لو وصلت المسأله مسأله عرض ما يترددوا في قتل البنت ولو للحضه غلق التلفون في وجهه براءه وأخذ جنبيته ونزل متوجهه لشقه ريفال وغيث ، أما براءه خبت تلفونها وراحت السرير ترقد بانتصار بعد ما خطتها نجحت .
في غرفه غيث :
رجع غيث من دوامه تاعب وقرر يشوف فلم دخل الغرفه ما شاف ريفال لكن سمع صوتها عند ماما لطيفه والبنات تطمن وراح فوق السرير ومعه مشروب طاقه وشوكلت ،حط القطعه الثانيه في الكيس لريفال وفتح فلم اكشن وقاطع روقانه دخلت ريفال وفي يدها جهاز فحص الحمل وسرعان ما خبته في الدولاب لكن غيث شافه وابتسم
ريفال:لمن هذي الابتسامات
غيث:الفلم رهيب تشوفي؟
ريفال :من افلامك اللي تطلع السكر اسلم مشتيش
ابتسم غيث وقال :خذي الشكلاته من الكيس
ريفال بحب :شكرا
اكتفى غيث انه ابتسم وراحت ريفال لدولابها خرجت خيوط باللون البُني واتجهت ل زاويه الغرفه حطت الشكلاته مع الخيوط وقررت تسوي بدله صغيرة لبنتها او ابنها وتحط الجهاز في البدله وتفاجئ البيت كله وكل ما شافت المقاسات اللي تحدد عليها كل ما ابتسمت بلطافه، سحب غيث على الفلم وجلس يتأمل ضحكاتها المش مفهومه وكل ما لفت عليه سوا نفسه انه يشوف الفلم ،قاطع روقانهم دقة باب غرفتهم بقوة وبصوت ابو محمود :رييفالل
حطت ريفال الخيوط وقالت بحب :لا تفتح انا شفتح لابي اخيرا جاء عندنا
غيث:طيب
فتحت ريفال الباب وقالت بفرح :حي...
وقبل ل تخلص كلامها اخذ ابو محمود يده ضرب ريفال بكل ما اوتي من قوة وبحجم ريفال الصغير   ارتمت ريفال لعرض الدولاب مصدومه وسرعان ما تدخل غيث رخى يده ولطم ابو محمود لما حس انه كسر فكه ،ما اهتم ابو محمود ورفع جنبيته وقال :بعد شغسل شرفي صدق اللي قال البنات عار!
وبحركه سريعه قدر غيث يسحب الجنبيه من يده وقال بعصبية :اهدأ اهدأ يا قوي ايش في ؟
ابو محمود :وصلني اتصال ان هذي الحقيرة بتهرب مع واحد وفوق هذا كله بيستروا على فضيحتهم
غيث بسخريه :فضيحتهم! الفضحيه ان واحد زيك أبوها ،وقبل لا يسوي اي شي شك غيث انها براءه حب يتأكد وقال :وريني الرقم يا ملعون
فتح ابو محمود تلفونه بعد ما غيث سيطر على حركاته ، شاف غيث الرقم وطابقه مع رقم براءه الوهمي وقال بكرهه :هذي الي طلقتها دخلت لي قبل كم يوم لكني حظرتها وما دريت ان حقارتها اتوصل لهذي الدرجه
انحرج ابو محمود اللي كان بيقتل بنته بتصرف متهور لف بنظره وشاف ريفال مدوخه وتحتها دم وقال بغصه :ريفال!!!!
لف غيث وشاف المنظر جن جنونه وسحب مقرمه وغطاء على وجهها ودهف ابو محمود من قدامه وتوجهه بسرعه البرق لسيارته ولحقه ابو محمود وراح هو وأبو محمود المستشفى.
سمعوا البنات الصوت وقالت ماما لطيفه :الله يسمعنا خير بس
توجهت ماما لطيفه مع البنات لغرفه غيث شافت دم في الأرض والجنبيه فوق السرير شهقت ملاك وقالت: سمعت صوت إسلام اخي نزل لعندهم
طيف :لقاء الجبابره
دقتها ملاك وقالت:مش وقت دمش الخفيف
مسكت ماما لطيفه على رأسها وقالت :ريفال!
ملاك بخوف :ريفال ؟ رريفاللل ؟
شافت طيف توترهم وما كانت اقل منهم توتر وحبت تروق الجو وقالت بحسن نيه :في فلم هنا شغال الظاهر طبقوه عليها المسكينه
دنت ماما لطيفه واخذت شبشبها ورجمته لفوق طيف كتمت طيف الضحكه ورجعت تدور مع البنات على ريفال واشتغلت تحقيقاتهم الجنائيه اللي تزيد التوتر بس توترت ماما لطيفه اكثر وقالت :ملاك اتصلي على الزفت إسلام ولا الزفت غيث
ملاك :غيث تلفونه هنا واسلام مايرد
ام محمود :ايش في ؟
طيف :لا تخافي بس شكل ريفال مرضت واخذها غيث المستشفى
ام محمود بخوف:لا ريفال بخير ونزل إسلام وهو معصب ايش في يا بنات ؟
ملاك بصوت واطي :يارب ما يكون اللي في بالي صح
ام محمود ببكي: ايش في بالش ؟
ملاك :كيف سمعتي
شمس بحده:مش وقت الان خلونا ندعي الله لما يجي واحد منهم ونعرف
جلسوا البنات ام محمود بالقوة ويدعوا الله انها تعدي سليمه وكل واحده جاء في بالها الدراما خاص بها
في المستشفى:
غيث :والله يا إسلام لو يحصل في مرتي شي ل تدخل بعدها
ابو محمود :ايش عرفني ان هذا كله عمل الحيه براءه وبعدين مرتك هي بنتي!
غيث بعصبية: لا تذكر اسمها! وكنت بتقتل بنتك بدون ماتتأكد يلي ما تخاف الله
ابو محمود بحزن :تعرف تربية اهل القرى والريف
غيث بأعلى صوت :يا معاق مرتي كانت بتروح ضحيه تربيتك الحسنه
ابو محمود :غيثث!
كانت بتحصل بينهم مضرابه لكن قاطعهم صوت الممرضه بخوف وقالت : من منكم زوج ريفال إسلام بدر السروري ؟
غيث :كيف حالتها وايش فيها ؟
الممرضه خلود :الحمد لله ريفال فيها رضوض في الظهر خفيفه جدا بس الشي المؤسف
غيث بمقاطعه :ايوةة؟؟
الممرضه خلود :كانت في بدايه حملها وللاسف فقدت الطفل
مسح غيث على عيونه وقال بصوت هادئ مخيف :قتلت حفيدك يا إسلام اللي هو ولدي ؟
الممرضه خلود :ممكن نعرف سبب الحادث ؟
لف غيث لعند ابو محمود وقال بعصبية تعكس هدوئه المؤقت :أبوها
خافت الممرضه من شكل غيث واستدعت الامن اللي كان مقابل لهم توجهه العسكري لقمان لعند غيث وقال :اخي النقاشات العائله خارج المستشفى لوسمحت التزم بالهدوء وعبي استمارة المريضه وتوكل على الله
ما حب غيث يكبرها عبئ بيانات ريفال وقال:متى اقدر اشوفها
الممرضه خلود :لما حضرتك تهدأ
حاول غيث يهدأ علشان يشوفها وقال ونظراته لأبو محمود كلها كره :إسلام روح البيت طمنهم تلفوني نسيته هناك وهاته معك مع عبايتها واللثام
ابو محمود بحزن :ان شاء الله
رجم له غيث مفتاح السيارة ألتقطه إسلام وتوجه للبيت
وفي غرفه ريفال :
دخل غيث مع الممرضه للغرفه وقال :متى تقوم؟
الممرضه خلود :شويه وتفوق ان شاء الله لكن بترقد عندنا اليوم
غيث:ضروري؟
الممرضه خلود :لا بس اذا عندكم في البيت بتكون في راحهه تامه ونفسيتها مستقرة وعندكم حد في البيت دكتور نقدر نصرف لها العلاج وتخرج
غيث :عمي دكتور وجدتي خبيرة في أشياء النساء، والراحهه اكيد ان شاء الله
شافت الممرضه خلود كيف غيث حتى ما شاف لوجهها بس كان يتأمل ريفال وقالت :اذا تقدر تخرجها بعد ما نطمن عليها ،واضح اخذتوا بعض عن حب
اكتفى غيث بسكوته حست خلود باحراج وخرجت من الغرفه وخلتهم على انفراد .
كان غيث يمسح على رأسها ويردد قران بصوته الرخيم صحت ريفال اللي اخر شي تذكرته فعايل
براءه فيها وقالت بتعب: وين انا؟
غيث:اخيرا صحيت غيمتي؟
ريفال ببكي:ايش فعلت بها علشان تفعل فيني هذا كله؟
حزن غيث على ريفال وطيبتها وقال :خلاص شر وانقلع
ريفال بحزن :وانت صدقت ؟!
حضنها غيث وقال :اكذب الكل واصدق غيمة الغيث الطاهره
ابتسمت وسط بكاها وقالت:والغيمه ما تكمل إلا بغيثها
غيث :والغيث ما يسكن إلا بغيمته
بادلته الحضن بقوة وكان اول حضن بينهم برضاهم الاثنين ،عدلت ريفال جلستها وقالت :ليش انا هنا
غيث :لانش ماوريتني جهاز فحص الحمل زعل النونو وراح
ريفال بصدمه :سقطتت!!
حب غيث يغير مزاجها وقال :نجيب بدله عشره عادي
ضربته بعلبه المنديل اللي كانت جنبها وقالت بحزن: الله يعوضني
ابتسم غيث وقال :يعوضنا*
قاطعهم دخول بنات ال مُنيف كلهم شهق غيث وقال :حتى هنا
ملاك :حسبي الله ونعم الوكيل عليك يا إسلام ليل نهار
غيث بضحك :امين
ماما لطيفه:حرام عليش
شافت ام محمود غيث بنظرات حقد ما اهتم لها غيث وقال: دام جيتي يمه انا شخطى اخذ علاجاتها وأذن الخروج
ماما لطيفه :وكرم تحت روح معه هو وصلنا
غيث: وين إسلام
راحت مامالطيفه مع غيث لباب الغرفه وقالت:عمري ما شفت إسلام وجهه شاحب حتى لما اعمامه سرقوه وقال ايرقد وحط مفتاح السيارة في غرفتي خلاص حرام عليكم الان ضميره ايعذبه طول عمره
غيث :كسروا يده ان شاء الله يستاهل
مامالطيفه :غيث!!!!
غيث بضحك :خلاص اسف اسف
تحرك غيث وفي قلبه مشاعر مخلوطه ما بين الحزن والفرح وتوجهه لعند كرم، وعند البنات :
طيف :يا هبلا تزعلي!ايش القوه هذي رافعه ضغطها من دون اي مجهود شخصي
ام محمود بكرهه:الله يرفع روحها انا عارفه كيف اتصرف معاها
الكل بحماس :كيف؟
ام محمود :صبركم وانا بنت صالح !
شمس :حتى اسمها ما تعامل معاها بتقدري لها انتي ؟
الكل : هههههههههههههههههههههه
ام محمود :اللي يقرب لخط بناتي والله لو كان اكبر كبير
طيف :عز الله يعزش
ام إسلام :ايش الحب العظيم ذيه ،بدل ماتغار هي خلى البنات يغاروا منها
ملاك :الله !
ريفال :مقهورة على اللي راح وهو عاده ما وفاش
شهر وانا عادني قلت بخيط له بدله
طيف :واصلي الخياط دامش زوجه غيث
ريفال :ماما لطيفه خذي حقي والله ما اقدر اقوم افرشها
ماما لطيفه بمزح:عادني ضربتها قبل شويه بالشبشب لكن الظاهر تشتي بالفرده الثانيه
ام كرم بضحك :مسخاكم على بنتي
طيف :شفتي يا نبع الحنان
ام شمس :المفروض تنضرب بحزام
ام كرم :المفروض
الكل: هههههههههههههههههههه
راحت هيلا جنب اختها ريفال وقالت :ايش يقولوا
ريفال :قليلات أدب معليش منهم يا هيلاتي
شمس :هيلاتي او كنتوري
طيف :يا ثقل دم الحوامل
ملاك :يسعد مساكي
انهاروا البنات يضحكوا عدا الامهات اللي مافهموا اصلا وقالت هيلا :ذلحين بيكون معانا عصاير لما م
نروح البيت
ام محمود :ااصص اللي يسمعش يقول ان احنا نحرمش من الاكل
ماما لطيفه بضحك :عادي يا جيهان الجاهل دائما مكذب اهله
ضحكوا البنات ورن تلفون ماما لطيفه وقالت: غيث يرن يالله انخطى
ام محمود بحده :ما تخرج وعاد مالها ساعتين
ام كرم: تجلس في المستشفى والقرف والخسارات واحمد موجود لو حصل شي ونحنا ما انقصر معاها
ماما لطيفه :نسيتي اني اعرف اتعامل مع هذي الحالات ولما سقطت سهام جلست عندي يومين بس
ام إسلام :اذكر الله يحفظش وقمت كأني ولا فيني شي
ابتسمت ماما لطيفه ورضخت ام محمود للامر الواقع وقالت طيف :تعرفي تلبسي العبايه او نلبسش؟كما الرجل الشرقي الغيور وصى عليها مع إسلام
ريفال بضحك :اقدر هاتي
لبست ريفال وقامت بمساعده طيف وقالت: والله مافي احسن من لبس ماما لطيفه سريع وفخم (وكان لبس اي جده صنعانيه عباره عن مقرمه لكن تستخدم في نفس الوقت لثام وقطعه قماش بشكل مربع تسمى ستاره تلف فيها جسمها ومنقشه بنفشات قديمه جميلة جدا )
طيف :ونشهد
ماما لطيفه :اللهم لا حسد
الكل: ههههههههههههههههههه
نزلوا البنات مع ريفال ومحاوطينها من كل اتجاه وخوفهم عليها باين من عيونهم لدرجه كل ما شافهم في المستشفى تكلم على جمال المنظر ،توجهوا لسيارة كرم وسيارة غيث اللي راح يجيبها ووصلوا البيت بفرح عكس خروجهم منه وقررت ماما لطيفه ان ريفال ترقد عندها يومين .
ومن هنا ل تركيا :
كانت امل وترف راجعين من المول بعد ما اخذوا نواقصهم شافت ترف اشجار العنب مُثمره وقالت:امل تعالي ندخل نغني ونقطف زي كل سنه
امل :ما ينفع الفرقه ناقصه
ترف :جي على الأقل ناكل
امل :قدام
فتحت امل الباب حق مزرعه المجمع وشافت في لوحه جنب اشجار العنب مكتوب عليها:
تمضين دائماً على عجلٍ مثل قصيدةٍ بالغة العذوبة، يقرأها المرء لمرة عن طريق الصدفة ويتعجب منها ويعود ملهوفًا باحثاً عنها لشدّة تأثيرها فيه!
امل :ترف شوفي
راحت ترف شافت الكلام وقالت :نفس الخط اللي مكتوب وراء جدار بيتنا
امل :اقطع يدي اذا ماكان هتان يا ترف!
ابتسمت ترف باحراج واخذت صورة للكلام وراحت
امل :وين بتروحي اعتترففيي
ترف :يختي لا تحطي شي في ذمتش يعني مافي عربي إلا هتان
امل:ترف كل شي واضح احكي باحترامش قبل ل اكتشف والعن خير خيرش
ما استحملت ترف وحكت لها كل المواقف مسكت امل على رأسها وقالت :حصل كل هذا بدون ما اعرف
ترف :اوذنتي عرفتي خلاص
ضربتها امل وقالت :امشي امشي البيت حسابش هناك
ضحكت ترف وتوجهوا للبيت فتحت لهم دُجى وقالت :يبناتت ريفال سقطت
ترف بصدمه :لحضههه متى ثبت الحمل علشان تسقط
دُجى :شوفي
شافت ترف رساله طيف اللي حكت لهم كل شي وقالت امل : طيف هذي شغلوها صحافه
دُجى بضحك :تربية ترف ايش متوقعه
ترف :مش وقتكم تعالوا نتحمد على سلامة البنت
امل :يوووه كسرالله يدك يا اسلام
الكل:امين
وفي اليمن:
وصلت ريفال لسرير ماما لطيفه ودخلت ماما لطيفه في يدها اكل صحي وقالت:عوضي اللي فقدتي بالأكل
ريفال :كثر الله خيرش يمه
ابتسمت ماما لطيفه وفتحت طيف الباب بقوة وقالت ريفال جاوبي ترف
ماما لطيفه :سرعتش في نقل الأخبار أسرع من ردود ترف
الكل :هههههههههههههههههههه
ترف :ماما وحشتيني
أخذت ماما لطيفه التلفون وقالت :وانتم والله ايش الجديد في عرسش ياامل
امل :معندنا هنا معازيم كلهم من طرف ام هتان ف بنخلي العرس في البيت وبتصلح لي الميكب والشعر ترف والزفه ديجي وخلاص
ماما لطيفه :والفستان والكسوه ؟
ما حبت تقول قصه الفستان وقالت :كل شي الحمد لله والعرس بعد بكره
طيف :صوروا كل شي كككل شي
ترف :تشتي تشوفي تعالي
طيف :النذاله مش وقتها يا ترف
ترف بضحك :انا نذله؟؟!
طيف :زي اخوش مازن
ترف :دوري من يصور لش
الكل:ههههههههههههههههههه
دُجى :والله ل اكلم مازن
طيف :كلميه وسلمي عليه
دُجى :قليله ادب والله بس يوصل
ضحكوا البنات وسلموا على ريفال بعد ما تطمنوا عليها وتطمنت ام مازن عليها وعلى عمتها لطيفه غلقوا المكالمه وراحوا البنات يجهزوا البيت لعرس أمل
ترف :لو نسوي ورد في السلالم يعني كذا لما تنزل يحاوطها من اليمين ورد ومن اليسار
دُجى :والكوشه نستأجرها نفس لون الورد
امل :ما اصدق اني عروسه ابدا
ترف :بنعيد العرس في اليمن بس الان نسوي عرس علشان سعود ل ينهار
ضربتها امل وضحكت دُجى ومن هنا ل ريف اليمن وتحديدا بيت براءه :
كانت ام براءه جالسه تتقهوى على مناظر الريف وكيف الدنيا رجعت خضراء مع الأمطار قاطع روقانها اتصال من رقم غريب جاوبت وقالت :الو؟
ام محمود :اخذت رقمش من الخاله رمله معي حُسن؟
ام براءه :ايوة ماعرفتش وانتي ؟
ام محمود :انا جيهان زوجه إسلام ابن بدر
ام براءه :بيت السروري ذكرتش حياش الله
حست ام محمود بقهر لانها تعرف حُسن من ايام زمان انها انسانه راقيه ومُخلقه عكس بنتها تماماً وقالت:الله يحييش
ام براءه :ايش الريح الطيبه اللي جابتش ،أمريني ؟
ام محمود :ما يأمر عليش ظالم (وحكت لها قصة ريفال من لما بنتها رسلت ل غيث )
مسحت ام براءه دموعها وانصدمت ان مع براءه تلفون وقالت :والله ما انا داريه ما اقلش يختي ،ما قصرت عليها بشي لكن الله كريم الله يهديها ،انا اسفه والله ياختي واوعدش معد تقرب لكم ولا بطريقه
سمعت ام محمود صوت الكسره في صوت ام براءه وقالت :مسامح والله اني اعرفش والنعم فيش بس براءه الله يهديها
حست ام براءه باحراج وقالت :امين ،استودعتش الله
ام محمود :خاطرش مع السلامه
غلقت ام براءه الخط وفتحت الباب على بنتها بدون ما تدق شافت براءه في يدها التلفون انصدمت براءه وما عرفت كيف تخبيه ما استحملت ام براءه اللي سمعته وتأكدت لما شافته ضربتها وقالت:تعرفي سليمان اللي جاء تقدم لش ورفضناه علشان كبر سنه ؟
براءه ببكي :يمه لا انفدالش
ام براءه بعصبية: ولا كلمه بخلي ابوش يرد له بالموافقه والعرس بداية الاسبوع واذا رفضتي ساعتها بكلم ابوش اللي سويته مع بنت إسلام
انهت حُسن كلامها مع بنتها كسرت التلفون قدام عينها وغلقت الباب بقوة انصدمت براءه وانعاد شريط حياتها قدامها حست بندم لكن ما ينفع الندم بعد المصيبه واضطرت توافق على الأمر الواقع وتزوج سليمان .
وفي بيت محمد بن أمين ال مُنيف :
دخل غيث غرفه ماما لطيفه وقال :يالله تعالي الغرفه
مامالطيفه :غرفة من يا قُمري اترقد عندي يومين
رفعت ريفال حاجبها بحناك أشر لها غيث بيده اوريش ضحكت ريفال وقالت ماما لطيفه :العشاء في المطبخ روح كله ونحنا انرقد
غيث :شبعت الحمد لله
ضحكت مامالطيفه وراح غيث غرفته حط الشال الاسود على راسه ورقد وفي غرفه ماما لطيفه :
ماما لطيفه :لا تقولي ماما لطيفه ظالمه شوفي أخذت حقش
ريفال :والله انش محزم بس حرام
ماما لطيفه :ارقدي ارقدي بس
ضحكت ريفال ورقدت جنب جدتها ورقدوا كل أبطالنا بخير وفي صباح اليوم الثاني :
قامت ترف وراحت أخذت دش وراحت تاكل سمعت صوت في الصاله راحت تشاقر من الباب شافت ناس يصلحوا كوشه حق امل حست ان مراسم العرس ابتدأت ضحكت واخذت صورة لذكرى واخذت اكلها وراحت الحوش الخلفي حق البيت اللي تشوفه زي الحديقه الصغيره وكانت تأكل والهواء يلعب بشعرها ، نسيت ترف ان في طاقه في الصاله تطل على حوش ،كان هتان يصلح الكوشه مع مازن والعمال لف وشاف شعرها يلعب به الهواء حس في قلبه نيران وقال :مازن ابروح الحوش اجيب باقي الديكور
أشر له مازن ب تمام وراح هتان الحوش وقال :صباح الخير للخير نفسه
لبست ترف الحجاب بسرعه اللي كان على كتفها وقالت بتهديد :هتان روح ولا شضربك
رجع هتان نظره للارض وقال :اتحداتس
ترف :تتحداني؟
هتان :يالقويه ادخلي انعكاستس يبان للعمال
انحرجت ترف واخذت أكلها وراحت الغرفه جنب خواتها اللي عادهم راقدات
اخذ هتان العمود ومشى وتذكر الشامه اللي في نحر ترف وقال :
قلبي تعلق بين مبسم وسلسال
على نحر منتوقة العنق ريمه
اللي نحرها ميزته حبة الخال
يشبهه نحرها طيف مركاز خيمه
قالت تحداني وانا قلت من قال
انا خسرت ومعترف بالهزيمه
مازن من وراه :صح لسانك جيت احسبك تهت وانك تهوجس
انفجع هتان وقال :الله لا يصح بدنك استغفر الله ما تعرف تتنحنح
ضحك مازن وضربه ب أشياء الكوشه جرى هتان ل الصاله وأخذ مازن العمود الثاني وتذكر من شعر هتان طيف اللي ما تغادر عن عقله ولا كتاباته ابدا.
عدا الوقت وراحوا العمال وبداو البنات يصوروا كوشه امل ويتفقدوا لو شي ناقص وصوت الزفه في وسط البيت معلنه بدايه مراسيم زواج امل
امل بحماس :مكيجيني زي مكياج خاله ندى
ترف بنفس الحماس :كم عندي امل؟عيوني لش
باستها امل وزغرطت وزغرطوا وراها البنات
ومن هنا لليمن:
كانوا البنات متجمعات فوق سرير ماما لطيفه جنب ريفال وقالت طيف :بنات بالله تعالو نطلب بتزاء
ريفال :والله جبتي ما في النفس
شمس بتعزيز :وعلى حسابي
ملاك :وانا الان بطلب
ماما لطيفه :والاكل اللي قشيتوه قبل شويه ؟
طيف :مقبلات
ماما لطيفه :ماشاءالله الله لا ضركم بس
ضحكوا البنات وراحت ماما لطيفه عند زوجات عيالها وبقوا البنات بس في الغرفه وقالت طيف :شطلع بيتنا اقهوي عماتي وارجع
ملاك :لا تتأخري
طيف :المفروض انكم فوق عندهم يا حوامل
ملاك :هاتوا الشبشب الثاني حق ماما لطيفه
الكل: ههههههههههههههههههههه
طلعت طيف ومرت عشرين دقيقه ورن تلفون ملاك وقالت :الطلب تحت
شمس :رني على طيف تنزل تجيبه
ريفال :تلفونها هنا
ملاك :من بينزل وانا حامل حتى ما طلعت لعند امي
شمس :فلوسي حولتها لهم والله لو راح ل تدفعوا من جيوبكم
ريفال :وصل التلميح انا شخطى يا حيوانات
شمس :لا انتي عادش مريضه
ملاك :مابش وحده تجلس عند ماما لطيفه وتقول مريضه وهي تخرج بالبيض البلدي وترجع بالعسل السدر
ريفال :اووريكم
ضحكوا البنات ولبست ريفال لثامها وعبايتها ونزلت فتحت ربع الباب ومدت يدها أخذت البتزاء وقبل ل تطلع كان غيث واقف بحركته المشهروة قدام البوابه ينتظر كيان ،شاف يد طلعت من بوابة عمارتهم وما كانت هذي اليد الفاتنه بالاسواره الذهبيه الا يد ريفال زفر بعصبية وتوجهه ل عند الباب وقبل ل تقفل ريفال البوابه مسك الباب غيث وقال: بنتتت
ريفال :انت هنا مش كنت اتسير مع كيان؟
غلق الباب وراه وقال :الحمد لله اني هنا ،تنزلي انتي ليش ما اتصلتي لي او خليتي واحد من عيال عمي
ريفال :مافيش حد
غيث:مافي حد ومحمود ايش يسوي ؟اتصلي لي من عند ماما لطيفه وين ما كنت بجي وتنزلي وانتي مالش يومين من لما خرجتي!
سمعوا البنات صوت غيث راحوا لطاقه اللي تطل ل البوابه وقالت ملاك :انزل اضربه وانا عمته
شمس بضحك :بيضغطش زي العطر
نزلت طيف وقالت بضحك :مالكم هنا متعلقات زي القرده
اشرت لها شمس تجي شافت طيف غيث وريفال وقالت :ذلحين بيجي تصعيد المواضيع
ملاك :خلونا شهود عيان لو حصل شي
نرجع لعند ابطالي وغيث اللي ما سكت :
غيث :ما تعرفي القصص اللي يخطفوهم أصحاب التوصيل او يتحرشوا فيهم بالكلام؟
لمعت عيون ريفال من عصبية غيث اللي ما يترجم غيرته إلا بهذي الطريقه وقالت بصوت مهزوز :خلاص لا تكبر الموضوع
غيث:اليوم ما بترقدي عند ماما لطيفه
ريفال بتسليك :طيب
تأمل غيث عيونها وقال :
اعاتبها ويلمع دمعها واغير الموضوع
انا الغلطان دامها توصل لمدامعها
ما استحملت ريفال شكله وكلامه حضنته وبادلها الحضن ،شافت طيف المنظر من فوق وقالت:لما يكون مصدر خوفك هو مصدر امانك :
ملاك بضحك :صوريهم ناخذهم محتوى
أخذت طيف صوره لهم من فوق ورجعوا البنات فوق السرير، استودع غيث غيمته وراح ينتظر كيان وطلعت ريفال عند البنات :
ريفال:ما ناكل فوق السرير
ورتها طيف الصورة وقالت :هذي بتزاء اللي صنعت بحب
ريفال باحراج :ما احب الرومنسيه غيروا الموضوع
الكل :ههههههههههههههههههه
ملاك :افتحي البتزاء ل تبرد ونشوف سنابات ترف لتجهيزات عرس امل يا المفعمه بالحنان
طيف :وانتم صدقتوا انها قامت لان مافي حد هي اصلا عارفه انه بيحضنها تستغل الفرص
ريفال باحراج :يا كككذاااابههه!
ضحكوا البنات كلهم وواصلوا تعليقات وريفال تسكتهم تجمع الكل حول مفرشه ماما لطيفه توسطت الجلسه البتزاء وفتحوا سنابات ترف اللي فيها ضحكوا وبكوا ما بين دموع الفرح ودموع انهم ما بيحضروا ومتحمسين بكره لعرس سعود وأمل .....

______
كيف عرفتوا ان الكاتبه تحب الاكل 😂بارت جديد وإحداث جديده ما تكتمل إلا ببارت اللي بعده لا تنسوا النجمه واشوفكم في بارت جديد يَحلوين 🤎🤎 .